142
Tamo a Qotei na aqaryaiyqajqa deqa pailyeqnu
1 E siŋgila na Tamo Koba Qotei pailyeqnum. A e qa dulqajqa deqa e na a waiŋyoqnsim pailyeqnum.
2 E ijo are jaqatiŋ qa ti ijo gulbe qa ti akamoqnsim Qotei pailyeqnum.
3 O Abu Qotei, e gamq di walweleqnamqa tamo qudei naŋgi na e ojqajqa deqa kakaŋ waiyobuleqnub. Od, e are gulbeibeqnaqa padalqa jojomeqnum. Ariya di uŋgum. Ni na e taqatbeqnum.
4 O Abu, tamo yai na e aqaryaibqas? Tamo dego bei sosai. E ŋam ateqnum di e tamo deqaji bei unosaieqnum. Tamo yai na e taqatbqas? Tamo dego bei sosai. Tamo yai a e qa dulqas? Tamo dego bei sosai. O Abu, ni segi qujai na e aqaryaibeqnum.
5 Deqa Tamo Koba Qotei, e ni endegsi mermeqnum, “O Abu, e ino areq di ulieqnum. Ni na e taqatbeqnum. Deqa bati kalil e mandamq endi sqai di e ni ombla sqai.” E ni degsi mermeqnum.
6 O Abu Qotei, e are tulaŋ gulbeibeqnu deqa ni ijo pailyo que. Tamo uŋgasari e ugetbeqnub qaji naŋgi siŋgila ti unub. E na naŋgi buŋnjrqa keresai. Deqa ni naŋgo baŋq na e ame.
7 E tonto talq di sobulejunum. Ni tonto talq dena e oqeq atime. Yim e bole sosiy ino ñam soqtoqnqai. O Abu, ni na e boletbimqa tamo uŋgasari bole tiŋtiŋ naŋgi ino kumbra di unsibqa ijo areq di korooqnqab.