149
Iga Qotei qa areboleboleigimqa louoqnqom
1 Niŋgi Tamo Koba Qotei aqa ñam soqtoqnsib lou bunuj na a qa louoqniy. O tamo uŋgasari Qotei dauryeqnub qaji, niŋgi louqajqa korooqnsibqa aqa ñam soqtoqniy.
2 O Israel, Qotei na niŋgi gereiŋgej deqa niŋgi a qa are boleiŋgeme. O tamo uŋgasari Saion qureq di unub qaji, niŋgi nuŋgo Mandor Koba a qa areboleboleiŋgeme.
3 Niŋgi lou tuoqnsib wagam qamoqnsib gombiŋ anjamoqnsib Qotei aqa ñam soqtoqniy.
4 Tamo Koba Qotei a na aqa segi tamo uŋgasari naŋgi tulaŋ areinjreqnu. A na tamo uŋgasari naŋgo segi ñam aguq ateqnub qaji naŋgi eleŋeqnu. Deqa naŋgi qoto buŋyeqnub.
5 Tamo uŋgasari Qotei dauryeqnub qaji naŋgi tulaŋ areboleboleinjreme. Od, naŋgi naŋgo bijalq dia louoqnsib areboleboleinjreme. Di kiyaqa? Qotei na naŋgi ñam kobaquja enjreqnu deqa.
6 Naŋgi naŋgo medabu waqtoqnsib Qotei aqa ñam soqtoqnebe. Naŋgi naŋgo baŋ na serie olekokba ojesoqnebe. Serie di tulaŋ qalat qala aiyel.
7 Serie dena naŋgi na sawa bei bei qaji naŋgo kumbra uge qa naŋgi kambatnjrsib ŋolawotnjrebe.
8 Naŋgi sil kokba ain na gereiyo qaji dena jeu tamo naŋgo mandor kokba ti gate kokba ti naŋgi tontnjrebe.
9 Qotei a nami jeu tamo naŋgo une qa peginjrqajqa bati atej. Ariya bati di brantimqa aqa segi tamo uŋgasari naŋgi qoto buŋyosib jeu tamo naŋgi di ŋolawotnjrqab. Naŋgo kumbra dena naŋgi ñam bole ti sqab.
O tamo uŋgasari, niŋgi Tamo Koba Qotei aqa ñam soqtoqniy!