19
Qotei aqa dal anjam a tulaŋ boledamu
1 Iga laŋ koqyoqnsim Qotei aqa riaŋ ti aqa ñam koba ti uneqnum. Iŋgi iŋgi kalil laŋ goge di unub qaji naŋgi na Qotei aqa maŋwa iga osorgeqnub.
2 Naŋgi na bati gaigai qolo ti qanam ti anjam mergobuleqnub deqa iga Qotei qa poigeqnu.
3 Bole, naŋgi medabu saiqoji. Deqa naŋgi anjam marqa keresai. Iga naŋgo kakro quqwa keresai dego.
4 Ariya naŋgi na tamo uŋgasari sawa kalilq di unub qaji naŋgi anjam minjrobuleqnub. Naŋgo anjam di giloqnsiqa qure qure kalilq di branteqnu.
Qotei a seŋ aqa tal laŋ goge dia gereiyetej.
5 Seŋ a tal dena nobqolo branteqnu. Tamo a uŋa osim warumq na oqedosim brantqas dego kere. Seŋ a areboleboleiyeqnaqa aqa segi gam dauryeqnu. Tamo naŋgi gurgurqab dego kere.
6 Seŋ a gaigai tauŋq na oqoqnsiq laŋq di walweloqnsiq olo bebeŋq aiyeqnu. Seŋ a tulaŋ kaŋkaŋeqnu deqa iŋgi iŋgi kalil seŋ aqa kaŋkaŋq dena uliesqa keresai.
7 Tamo Koba Qotei aqa dal anjam a tulaŋ tiŋtiŋ. Iga dal anjam di dauryeqnum deqa iga ŋambile bunuj ti unum. Tamo Koba Qotei aqa anjam a tulaŋ bole. Iga anjam di quoqnsim mareqnum, “Bole.” Anjam dena tamo uŋgasari powo saiqoji unub qaji naŋgi powo bole enjreqnu.
8 Tamo Koba Qotei aqa dal anjam a tulaŋ bole gisaŋ sai. Dal anjam di riaŋ koba ti sosiqa gago ŋamdamu suwantoqnsiqa are boletetgoqnsiqa iga powo bole egeqnu.
9 Tamo uŋgasari Tamo Koba Qotei qa ulaoqnsib aqa sorgomq di unub qaji naŋgi kumbra bolequja dauryeqnub. Naŋgo kumbra di bati gaigai sqas. Tamo Koba Qotei aqa dal anjam a tulaŋ bole tiŋtiŋ gisaŋ sai.
10 Anjam dena gol boledamu tulaŋ buŋyeqnu. Iga anjam deqa tulaŋ arearetgwas. Anjam di bisim qaq bul sosiqa bisim qaq tulaŋ buŋyosiqa qaqatiŋugetgeqnu.
11 O Abu Qotei, e ino dal anjam quoqnsim dena e powo bole ti unum. E ino wau tamo unum. E ino dal anjam dauryeqnum deqa ni na e awai boledamu ebeqnum.
12 Tamo yai a aqa segi une kalil geregere qalieqa kere? Tamo dego bei sosai. Kumbra uge qudei e yeqnum qaji di uliejunu deqa e geregere poibosai. Deqa Qotei, ni na ijo une di kobotime. Yim e ino ŋamgalaq di tamo bole une saiqoji sqai.
13 E ino wau tamo unum deqa ni na e saidbimqa e diqoqnsiy une yoqnqasai. Ni na gam getentbimqa kumbra uge bei na e taqatbqasai. Ni degyqam di e ino dal anjam gotraŋyqasai. E kumbra uge kobaquja bei yqasai dego. E une saiqoji sqai.
14 O Tamo Koba Qotei, ijo anjam maro ti ijo areqalo ti ino ŋamgalaq di bole tiŋtiŋ soqneme. E qalie, ni meniŋ bul sosim e ulitbeqnum. Ni ijo aqaryaibo tamo sosim e awaibosim sawa boleq di atem.