29
Iga Qotei aqa kakro queqnum
1 Tamo Koba Qotei a riaŋ koba ti siŋgila koba ti unu. O laŋ aŋgro, niŋgi deqa are qalsib Qotei aqa ñam soqtoqnsib a qa louoqniy.
2 Od, niŋgi Tamo Koba Qotei aqa ñam soqtoqniy. A kumbra tulaŋ boledamu getento yeqnu deqa niŋgi a qa louoqniy.
3 Yuwal gogeq dia Tamo Koba Qotei aqa kakro branteqnaqa iga queqnum. Qotei a ñam koba ti sosiqa kola bul siŋgila na maeqnu.
4 Tamo Koba Qotei aqa kakro a siŋgila koba. Aqa kakro di tulaŋ bei. Deqa tamo kalil naŋgi aqa kakro quoqnsib ulaeqnub.
5 Tamo Koba Qotei aqa kakro dena ŋam kokba Lebanon sawaq di unub qaji naŋgi giŋgeŋnjreqnu.
6 Qotei a leleŋeqnaqa mana kalil Lebanon sawa ti Hermon sawa ti dia unub qaji naŋgi reŋgiŋoqnsib makau du du buloqnsib prugeleŋeqnub.
7-8 Tamo Koba Qotei aqa kakro kola bul sosiqa minjaloqnsiqa wadau sawa reŋgiŋyeqnu. Od, aqa kakro na Kedes wadau sawa tulaŋ reŋgiŋyeqnu.
9 Tamo Koba Qotei aqa kakro branteqnaqa ŋam kokba naŋgi reŋgiŋeqnub. Aqa kakro dena ŋam baŋga kalil koboteleŋeqnu. Deqa aqa atra tal koba miligiq dia tamo uŋgasari kalil naŋgi endegsib maeqnub, “Qotei a ñam koba ti unu!” Naŋgi degsib maeqnub.
10 Tamo Koba Qotei a Mandor sosiqa yuwal kokba kalil taqateqnu. A bati gaigai aqa awo jaramq di awoosim Mandor Koba sqas.
11 Tamo Koba Qotei a na aqa segi tamo uŋgasari naŋgi siŋgila enjroqnsiqa naŋgi boletnjreqnu. Deqa naŋgi are lawo unub.