4
Tamo a qolo Qotei pailyeqnu
O Abu Qotei, e ni metmosiy pailmitqa ni ijo pailyo quetbime. Jeu tamo naŋgi ijo jejamuq di une qamibqa ni na e beterbosim merbe, “Ni une saiqoji unum.” O Abu Qotei, e qalie, e nami tulaŋ are gulbe ti sonamqa ni ijo are gulbe kobotetbem. Deqa ni olo e qa are boleimim ijo pailyo que.
O tamo uŋgasari, bati gembub niŋgi ijo ñam bole ugetetboqnsib e jemai eboqnqab? Bati gembub niŋgi anjam uge ti gisaŋ kumbra ti dauryoqnqab? Tamo Koba Qotei a na tamo uŋgasari aqa sorgomq di unub qaji naŋgi aqa segi qa giltnjreqnu. E Tamo Koba Qotei metoqnsim pailyeqnam a ijo pailyo queqnu. O tamo uŋgasari, niŋgi Qotei qa ulaoiy. Niŋgi une yoqnaib. Niŋgi nuŋgo bijalq di ŋeiesosibqa bati deqa niŋgi nuŋgo are miligi geregere tenemtoqnsib nuŋgo medabu getentoqniy.
Niŋgi iŋgi iŋgi Tamo Koba Qotei a tulaŋ areareteqnu qaji di oqnsib atraiyoqnsib a qa nuŋgo areqalo siŋgilatoqniy.
Israel tamo uŋgasari gargekoba naŋgi endegsib nenemeqnub, “Yai na iga boletgwas?” O Tamo Koba Qotei, ni segi na iga boletgwa kere. Deqa ni ino ulatamu na iga suwantgoqne. Ni degyqam di iga sawa ambruq di sqasai. E qalie, ni arebolebole kobaquja ijo are miligiq di ateqnum. Tamo qudei naŋgo bem sum ti naŋgo wain ti kobaqas di naŋgi areboleboleinjrqas. Ariya ijo arebolebole na naŋgo arebolebole di tulaŋ buŋyejunu.
O Tamo Koba Qotei, ni segi na e taqatbeqnum deqa e bole unum. E iŋgi bei qa ulaosaieqnum. E ijo bijalq di lawo na ŋeioqnsim urur qambumteqnum.