43
Tamo a aqa qure utru torei uratej
1 O Abu Qotei, tamo uŋgasari ni qoreimeqnub qaji naŋgi ijo jejamuq di anjam uge qametbeqnub. Deqa ni na e aqaryaibosim naŋgo anjam di gent. Yim naŋgi qalieqab, e kumbra bole segi yeqnum. Naŋgi gisaŋ anjam maro tamo unub. Naŋgo kumbra tulaŋ uge. Deqa ni na e aqaryaibosim naŋgo baŋq na e ame.
2 Ni ijo Qotei unum deqa e inoq boqnsim ino areq di ulieqnum. Ariya ni kiyaqa e qoreibeqnum? Kiyaqa jeu tamo naŋgi na e ugeugeiboqnsib are gulbetetbeqnub?
3 Ni na ino anjam bole ti ino suwaŋ ti qariŋyim ijoq bosim gam osorbim e ino segi mana bolequja Saion deq oqwai. Oqsiy tal ni unum qaji di miligiq gilqai.
4 Od, Qotei, e ino atra bijalq gilqai. Ni na ijo are miligi tulaŋ boletetbeqnum deqa e ni qa gilqai. Gilsiy gombiŋ na louoqnsiy ino ñam soqtoqnqai. O Qotei, ni ijo Qotei.
5 Kiyaqa e gaigai are prugbeqnu? Kiyaqa e are gulbeibeqnu? Di uŋgum. E Qotei qa ijo areqalo siŋgilatosiy aqa ñam olo soqtoqnqai. A ijo Qotei unu. A ijo aqaryaibo tamo unu deqa e padalqasai.