48
Jerusalem qure a ñam koba ti wala bole ti unu
1-2 Tamo Koba Qotei a ñam koba ti unu deqa iga aqa qure koba Jerusalem miligiq dia aqa ñam tulaŋ soqtqom. Qure di Mandor Koba Qotei aqa segi qure. Iga gago Qotei aqa getento mana goge oqsim Jerusalem dia aqa ñam tulaŋ soqtqom. Mana di aqa ñam Saion. A tulaŋ boledamu goge koba. A sawa bebeŋq di unu. Tamo uŋgasari kalil mandamq endi unub qaji naŋgi mana deqa tulaŋ arearetnjreqnu.
3 Qotei a Jerusalem qureq dia tal siŋgila koba bul sosiqa aqa segi tamo uŋgasari naŋgi taqatnjreqnu.
4 Nami sawa bei bei qaji mandor kokba naŋgi korooqnsib Jerusalem qure qoto itoqnsib qure jojomyoqneb.
5 Ariya naŋgi qure unoqnsib tulaŋ prugoqnsib ulaugetoqnsib jaraiyoqneb.
6 Naŋgi ginda gindaŋoqnsib jaqatiŋ koba ti soqneb. Uŋa aŋgrotqa osiq jaqatiŋ ti unu dego kere.
7 O Abu Qotei, iga qalie, ni na mandor kokba naŋgi di padaltnjroqnem. Jagwa koba seŋ oqo sawaq na boqnsiq Tarsis qure naŋgo qobuŋ paraparainjreqnu dego kere.
8 Gago Tamo Koba Qotei a qoto tamo naŋgo gate koba. A nami aqa qure koba Jerusalem siŋgilatoqnej di iga quoqnem. Ariya bini iga Jerusalem miligiq di sosimqa endegsi uneqnum, Qotei na qure di bati gaigai siŋgilatoqnqas.
9 O Abu Qotei, iga ino atra tal koba miligiq di sosimqa ino qalaqalaiyo kumbra qa are qaleqnum.
10-11 Sawa sawa kalilq dia tamo uŋgasari naŋgi ino ñam soqteqnub. Od, ino ñam di sawa sawa kalil kereteqnu. Ni kumbra bole tiŋtiŋ na naŋgi taqatnjroqnsim naŋgo une qa naŋgi geregere peginjreqnum. Saion Mana ti Juda naŋgo qure qure ti naŋgi na ino kumbra di unoqnsib tulaŋ areboleboleinjreqnu.
12 O tamo uŋgasari, niŋgi Jerusalem qure miligiq di walwelosib aqa taqato tal olekokba sisiyoiy.
13-14 Niŋgi qure aqa dadaŋ ti aqa tal kalil ti geregere peleiyiy. Peleiyosib tamo uŋgasari bunuqna brantqab qaji naŋgi endegsib sainjroqniy, “Qotei a bati gaigai gago Qotei sqas. A na bati gaigai aqa gam bole iga osorgoqnqas.”