61
Tamo a Qotei na taqatqajqa deqa pailyeqnu
1 O Abu Qotei, ni ijo pailyo endi quime. E ni qa akamitqa ni ino dabkala waqtime. Ni ino dabkala getentaim.
2 E sawa isaq di sosim ni pailmeqnum. E are tulaŋ gulbeibeqnu deqa ni na e osim meniŋ gogeq di e ulitbe. Meniŋ di goge koba. Meniŋ dena e buŋbosiq tulaŋ goge oqeqnu.
3 E qalie, ni na e geregere taqatbeqnum. Ni dadaŋ bul sosim e siŋgilatbeqnum. Deqa jeu tamo naŋgi na e padaltbqa keresai.
4 E ino atra talq di sqajqa tulaŋ arearetbeqnu. E dia gaigai sqai. E ino areq di uliesqajqa arearetbeqnu. Tuwe du du naŋgi naŋgo ai aqa bariq di ulioqnsib bole unub dego kere.
5 O Abu Qotei, e qalie, wau kalil e nami ni qa yqajqa mermem qaji di ni quem. Ni na tamo uŋgasari ino ñam qa ulaeqnub qaji naŋgi naŋgo segi mandam enjreqnum. E ino ñam qa ulaeqnum deqa ni na mandam di e dego ebem.
6 O Abu Qotei, ni marimqa ino mandor a wausau gargekoba sqas. Ni marimqa a mandamq endi sokobaiyqas.
7 Ni marimqa a gaigai ino ŋamgalaq di mandor sqas. E qalie, ni na ino mandor a tulaŋ qalaqalaiyeqnum. Ni na a uratosaieqnum. Ni ino kumbra deqa are qalsimqa mandor a geregere taqatoqne.
8 Ni degyqam di wau kalil e nami ni qa yqajqa mermem qaji di yoqnqai. Od, e bati gaigai wau di yoqnsiy ino ñam soqtoqnsiy louoqnqai.