75
Qotei na tamo uge naŋgi ugetnjroqnsiqa olo tamo bole naŋgi aqaryainjreqnu
1 O Abu Qotei, ni gago jojomq di unum deqa iga gaigai ino ñam biŋiyoqnsim ino maŋwa kalil qa saoqnsim laqnum.
2 Qotei a endegsi mareqnu, “Tamo uŋgasari naŋgi peginjrqajqa bati brantimqa e kumbra tiŋtiŋ na naŋgi peginjrqai.
3 Mandam a reŋgiŋamqa e na mandam aqa utru siŋgilatit a bole sqas. Od, tamo uŋgasari kalil mandamq di unub qaji naŋgi ginda gindaŋabqa e na mandam aqa utru siŋgilatqai.
4-5 Bini e na meqe meqem tamo naŋgi endegsi minjreqnum, ‘Niŋgi diqoqnaib.’ Od, e na tamo uge naŋgi endegsi minjreqnum, ‘Niŋgi nuŋgo segi ñam soqtoqnaib. Niŋgi nuŋgo medabu waqtoqnsib e misiliŋboqnaib.’ ” Qotei a degsi mareqnu.
6 Tamo bei na tamo bei pegiyqa keresai. Seŋ oqo sawa ti seŋ aiyo sawa ti wadau sawa ti dia tamo dego bei sosai.
7 Qotei a segi na iga pegigeqnu. A na qujai tamo qudei naŋgo ñam aguq atoqnsiqa olo tamo qudei naŋgo ñam soqtetnjreqnu.
8 Tamo Koba Qotei a ya gambaŋ ojejunu. Gambaŋ miligiq di wain bunuj siŋgila koba ya ti bulyosai qaji di maqejunu. Qotei na wain di bilentimqa tamo uge kalil mandamq endi unub qaji naŋgi uyekritqab.
9 Ariya e bati gaigai Jekop aqa Qotei aqa maŋwa kalil qa mare mare laqnsiy aqa ñam soqtoqnsiy louoqnqai.
10 Qotei a endegsi mareqnu, “E na tamo uge naŋgo siŋgila kobotetnjrqai. Ariya e na tamo bole naŋgi siŋgila kobaquja enjrqai.”