82
Qotei a Mandor Koba unu
1 Gate kokba naŋgi koroesonabqa Qotei a naŋgo koroq di sosiqa naŋgi peginjreqnu.
2 A na naŋgi endegsi minjreqnu, “Bati gembub niŋgi gisaŋ kumbra na tamo uŋgasari naŋgo jejamuq di une qametnjroqnqab? Bati gembub niŋgi tamo uge naŋgi areinjroqnsib olo tamo bole naŋgi qoreinjroqnqab? Ariya niŋgi degaib.
3 Niŋgi na tamo siŋgila saiqoji unub qaji naŋgi ti aŋgro mandum naŋgi ti beternjroqniy. Od, niŋgi na tamo gulbe qoboiyeqnub qaji naŋgi ti tamo mamnjreqnu qaji naŋgi ti pegiyo bati qa taqnjroqniy.
4 Niŋgi na tamo sougetejunub qaji naŋgi ti tamo iŋgi iŋgi qa truqueqnub qaji naŋgi ti aqaryainjroqnsib tamo uge naŋgo baŋq na naŋgi eleŋoqniy.” Qotei na gate kokba naŋgi degsi minjreqnu.
5 Gate kokba naŋgi powo saiqoji. Naŋgi tulaŋ nanari. Naŋgi ambruq di walweleqnub. Utru deqa tamo uŋgasari kalil mandamq endi unub qaji naŋgi kumbra uge yeqnub.
6 Deqa e na gate kokba naŋgi endegsi minjrem, “Niŋgi qotei bul. Niŋgi Qotei Goge Koba aqa aŋgro.
7 Ariya di uŋgum. Mandam tamo naŋgi moreŋeqnub dego kere niŋgi moreŋqab. Mandor kokba naŋgi moreŋeqnub dego kere niŋgi moreŋqab.” E na gate kokba naŋgi degsi minjrem.
8 O Abu Qotei, ni tigelosim tamo uŋgasari kalil mandamq endi unub qaji naŋgi peginjre. Sawa sawa kalil di ino segi.