90
Moses a anjam saej
1 O Tamo Koba, ni gago tal bul unum. Iga ni ombla unum deqa ni na iga taqatgeqnum. Nami ni na gago moma naŋgi taqatnjroqnsim naŋgo tal bul soqnem.
2 Ni bati gaigai Qotei sqam. Mana kalil brantosaisonabqa ni Qotei soqnem. Ni na mandam ti iŋgi iŋgi kalil ti gereiyosaisoqnem bati deqa ni Qotei soqnem. Bunuqna ni Qotei sqam.
3 Ni na tamo kalil naŋgi endegsi minjreqnum, “Niŋgi mandam tamo unub deqa niŋgi moreŋosib olo mandam bulyqab.”
4 O Abu Qotei, ino ŋamgalaq di wausau 1,000 a bati truquyala deqa a urur koboeqnu. Seŋ a oqsiq olo aiyoqujateqnu dego kere.
5-6 Tamo kalil naŋgi ŋeiobilqei bul unub deqa naŋgi sokiñalayeqnub. Ni na naŋgi urur kobotnjreqnum. Ya a dosim iga osi sumsim moiyoqujatgwas dego kere. Ñiŋ a nobqolo oqsim bilaq a qaŋgraŋqas dego kere.
7 Ni iga qa ŋiriŋoqnsim iga ugetgeqnum. Ni iga qa minjiŋ oqetmeqnu deqa iga ulaugeteqnum.
8 Ni gago kumbra uge kalil uneqnum. Une kalil iga uli na yeqnum qaji di ni na olo boleq ateqnum.
9 Ni iga qa ŋiriŋoqnsim gago ŋambile sqajqa bati truquteqnum. Od, gago so bati urur koboeqnu. Tamo a mondor titoqujatqas dego kere.
10 Iga mandamq endia wausau 70 segi unum. Iga qudei siŋgilaosim wausau 80 unum. Sosimqa bati deqa iga waukobaoqnsim gulbe iteqnum. Wausau di urur koboeqnaqa iga dego koboeqnum.
11 O Abu Qotei, tamo yai a ino ŋiriŋ aqa siŋgila qa poiyqa kere? Tamo dego bei sosai. Ino minjiŋ a tulaŋ kobaquja deqa iga ni qa ulaugeteqnum.
12 Ariya Qotei, ni na iga dalgime. Yim iga areqalo bole ti sosim endegsi qalieqom, “Bole, iga mandamq endi sokobaiyqa keresai deqa iga gago walwel geregere taqatqom.”
13 O Tamo Koba Qotei, bati gembub ni iga qa minjiŋ oqwas? Iga ino wau tamo unum deqa ni iga qa olo dulame.
14 Ni nobqolo gaigai iga qalaqalaigoqne. Yimqa ino qalaqalaiyo kumbra dena iga tulaŋ keretgimqa bati kalil iga mandamq endi sqom di iga areboleboleigwas.
15 Ni na bati gargekoba iga gulbe egoqnem. Ariya ni na olo bati gargekoba gago are boletetgoqnime. Iga wausau gargekoba sougetesoqnem. Ariya ni na olo wausau gargekoba gago are boletetgoqnime.
16 Iga ino wau tamo unum deqa ni na ino maŋwa kalil iga osorgime. Od, ni na ino siŋgila kobaquja babtosim gago aŋgro naŋgi osornjrime.
17 O gago Tamo Koba Qotei, ni iga qa are boleimim gago wau kalil siŋgilatime. Od, ni gago wau kalil siŋgilatime.