4
Pao Kurireu Uwari Ukare Nono Bopere
1 Imeardu kurire jiwuge imedage nure tagi. Tameartorukaba kuri aino boe eiamedu boei. Taipaga pemegado ewadaruji jao ewadaru umode nono Pao Kurireu batarure dubagai. Batrarodureuge emagare kodire inagoino. Ere tumaedo moto jamedu boe parugajeje tuwo boe ekiripagado Pao Kurireu bataru remawu piji.
2 Ainore tarduwamode Pao Kurireu Uwari bataru remawuji. Ia imedu akore Jesus Cristo aregoduie baru piji tuwo imedudo pudumi woe moto keje du nou imedu apore nou Pao Kurireu Uwari rakojere.
3 Mare ia imedu akomode Jesus aregodukaie baru piji. Akomode imedu nuie ema tu rugadu. Dukeje Pao Kurireu Uwari rakojekare nou imedu apo. Bope rakojere apo. Urugodure Jesus jiwu bope doge eimijera ure nou bope maku nou imedu ai. Marigudu tameardure nou urugodure Jesus jiwu aregodumoduie. Ča aregodure marigudu. Rakojere woe moto keje rugadu.
4 Mare tagi Pao Kurireu utugarege nure tagi. Tare nono itore emogadure. Pao Kurireu Uwari rakojere tagabo. Bope doge eragojere meartorukare Jesus jiwugebo. Mare Pao Kurireu Uwari rakare bope doge eiamedu boe ekori. Ča iage egore tumagoie Pao Kurireu bataruji mare ewadrarodunure. Pao Kurireu Uwari ure taragado tameartorukawo nou batrarodureugei. Ča tameartorukare ei rugadu.
5 Awu batrarodureuge emagore tu meartorukare Jesus jiwuge emeardaeji. Emagore tu meartorukare Jesus jiwuge ero jiboeji. Dukeje meartorukare Jesus jiwuge emeartorure nou batrarodureuge ewadaruji rugadu emeartorukare Jesusji kodi.
6 Mare pagi pameartorure Pao Kurireuji rugadu. Jorduware Pao Kurireu jiwu biapagamode awu iwadaruji. Meartorukare Pao Kurireu jiwu biapagamodukare awu iwadaruji. Ainore parore parduwawo boe jokodureu Pao Kurireu Uwariji. Ainore parore parduwawo batrarodureu bope dogei.
Pao Kurireu Meardu Kurire Boei Rugadu
7 Imeardu kurire jiwu imedage nure tagi. Pao Kurireu umode pameardu kurido pui. Ča pameardu kuriwo pui rugadu. Pao Kurireu ore nure tagi dukeje tameardu kurimode boei. Tarduware Pao Kurireuji dukeje tameardu kurimode boei.
8 Mare jorduwakare Pao Kurireu jiwu meardu kurimodukare boei. Pao Kurireu meardu kurire boei marigudu. Boe emeardu kurimodukare boei dukodire boe erduware nou boei, nou boe erduwakare Pao Kurireu jituji.
9 Pao Kurireu meardu kurire boei rugadu. Dukodire ure tonaregedu mitodu rawuje pagae moto ka paro pegareu moriče pamugu pemegawo Pao Kurireu apo du akedukawo. Dukodire parduware Pao Kurireu meardu kurire boei duji.
10 Ainore ure rugadu. Emare meardu kurire boei boetoji. Pagi karega. Parduwakare pameardu kuriwo Pao Kurireuji. Emare meardu kurire pai boetoji. Dukodire ure tonaregedu rawuje mato moto ka bitoduwo paro pegareu moriče tuwiagoduwo paro pegareu piji.
11 Ainore Pao Kurireu rore. Meardu kurire pai rugadu. Dukodire pameardu kuriwo pui jamedu. Imeardu kurire jiwu imedage nure tagi.
12 Boe erdukare Pao Kurireuji mare pameardu kurimode pui dukeje Pao Kurireu mugu pemegamode pagabo. Umode pameardu kurido pui rugadu.
13 Pao Kurireu ure Tuwari maku pagai. Dukodire parduware pamugu pemegare apo duji. Parduware mugu pemegare pagabo duji jamedu.
14 Pao Kurireu ure tonaregedu rawuje boe etae. Čerdure ji rugadu. Dukodire čere boe ewie aino. Umode boe ekinorudowu nure nou Pao Kurireu onaregeduče rugadu.
15 Pamagomode boe ewiagai Pao Kurireu Onaregedu nuie Jesusče dukeje pamugu pemegamode Pao Kurireu apo. Pao Kurireu mugu pemegamode pagabo jamedu.
16 Pagi parduware Pao Kurireu meardu kurire pai rugadu. Dukodire pabagudukare Pao Kurireuče. Pabogurukare pamagowo ji.
Ainore Pao Kurireu ure. Meardu kurireu nure ema rugadu. Dukodire pameardu kuri raimode boei dukeje pamugu pemegamode Pao Kurireu apo. Pao Kurireu mugu pemegamode pagabo jamedu.
17 Ia meri keje Pao Kurireu umode boe erdudo turo pegareu moriji. Mare meartorure Jesus jiwuge emoridodure marigudu dukodire epogurumodukare nou roino jiwu meri keje. Pameartorure Jesusji. Dukodire umode pameardu kurido pudui rugadu. Umode pameardu kurido boei jamedu. Dukodire paromode boei nono Jesus Cristo ro mogadure.
18 Pao Kurireu meardu kurire jiwu pagudumodukare Pao Kurireu rore pudui jiboeji. Pao Kurireu umode pameardu kurido rugadu dukeje umode pabagudu bokwado. Mare jorduwakare Pao Kurireu jiwu pagudure rugadu. Pagudure turo pegareu jitu kodi. Meardu kurimodukare rugadu.
19 Ča Pao Kurireu meardu kurire boei boetoji dukodire pameardu kuriwo ji jamedu. Pameardu kuriwo boe eiamedu boei rugadu.
20 Pamagomode pameardu kurie Pao Kurireuji mare pardu pegare boei dukejere pawadrarodunure. Pagaidu pemegamodukare pardure jiwu boei dukeje pagaidu pemegamodukare pardukare jiwu Pao Kurireuji.
21 Jesus Cristo makore pai rugadu. Pameardu kuriwo boei. Pameardu kurimode Pao Kurireuji dukeje pameardu kurimode boe eiamedu boei.