Ⅲ
Paulo Tsa Kutidu a Kĩ Kɔfɛta Asɔli Lɔtɔ Banyanɛ.
Ⅰ Fɔnyɛ ɔnɔkɔali kĩ ntɛ oti odi awɛ kĩ yanya asɔli lɔtɔ ɔnyanɛ ni, adzuma wĩ liti etomɛna.
Ⅱ Kɛnɛ kĩ asɔli lɔtɔ ɔnyanɛ ɛnya oti kĩ nfumusu lɛláa ye akũ, kĩ ɛkɔã ɔtsɔ̃ mɔapɛ, ye adzuni waa yedede, yapi ye akũ ade bati akpa ye obu a. Kɛnɛ kĩ ɛnya oti kĩ yapuli katɛ banɔvɔɛ̃ ade yapuli katsa fɔtsa a.
Ⅲ Kɛtánɛ kĩ ɛnya bavɛ owuganɛ ĩye oti kĩ ye anɛ kamɛ tádɔ, mbom kɛnɛ kĩ ɛnya oti kĩ ɛdɔ, kĩ yaákɛna ɔdzɛ, ade ɛlá anɛngbã nɛ sika akũ a.
Ⅳ Kɛnɛ kĩ epuli ɛdãmɛna ye tɔtɔ akũ kadãmɛna wĩ, lɔkɔa ye babi bibu fɔkɔ nɛ osi nyɛ osi akũ.
Ⅴ Kitonɛkĩ ntɛ onyole lápuli ɛdãmɛna ye tɔtɔ akũ ni, nde yaapuli ɛkpã Baguma asɔli a?
Ⅵ Kɛnɛ kĩ ɛnya oti kĩ ebuna owi nɛ asɔli a kamɛ, ntɛ nnɛ́ aye ni yaadɛla ye akũ nɛ ode, lɔkɔa fɔtsã lukũta kamɛ ɛyaatɔ ndɛ ayekĩ fɔya fɔkpa okesĩnɛ a.
Ⅶ Kɛnɛ kĩ ɛnya oti kĩ bikĩ bɛnyɛ́ batɛ badonɛ a malo abɔa ye dĩ wĩ, ayekĩ ɛláado ye akũ kɔnyɔã lɔkɔa ewo nɛ okesĩnɛ a awɛ kamɛ.
Paulo Tsa Bikĩ Be Kɛnɛ Kĩ Bɛnya Babumɛnanɛ Nɛ Asɔli Kamɛ.
Ⅷ Ade aye lɛmɛ kɛnɛ kĩ asɔli lɔtɔ banyanɛ babumɛnanɛ a malo banya bati kĩ bideĩ ɔbla wĩ mɔ ɔnɔkɔali a. Bɛnya bati kĩ baáwuga bavɛ ade bɛlá anɛngbã nɛ sika lɛmɛ akũ.
Ⅸ Kɛnɛ kĩ bapi katɛkado fɔlɛtsa wĩ a kĩ bɛnyɛ bɛtsa a bidomɔ akũ mɔ ɔsĩ mɔ ɔsĩ, bidzi mɔ tɔwɔlɛ kpalɛwa.
Ⅹ Ade kɛnɛ kĩ basɔ be bɛdã nɛ asɔli tudzuma tidi kakɛna kamɛ. Ntɛ bɛkpɔla ni, baapuli bɛkɛna adzuma ndɛ lɔtɔ banyanɛ babumɛnanɛ aye.
Ⅺ Kɛnɛ kĩ batsɔ̃ malo bɛna tɛbla wĩ, kĩ bɛtanya bati kĩ balɛ bati akũ fɔlɛtsa. Bɛnya batsole kĩ baámɔa bavɛ kawuga, kĩ badi ɔnɔkɔali nɛ lɛtsa nyɛ lɛtsa kakɛna kamɛ.
Ⅻ Dã kĩ babumɛnanɛ kĩĩ be kamɛ odi nyɛ odi deĩ ɔtsɔ̃ mɔapɛ, epuli yadãmɛna ye babi mɔ tɔtɔ kamɛ bati flee akũ kadã wĩ.
ⅩⅢ Babumɛnanɛ a kĩ bakɛna be adzuma kakɛna wĩ a deĩ kadzakɔ̃ wĩ nɛ bati anɛ, ade baapuli bɛna ɔwɔlɛ kɔbɛ̃ bɛlɛ kɔdzɛla nɛ be Kristo Yesu katɛkado akũ a.
Miyi Kalɛ Bɛlawa Kpale a Ɔsũ.
ⅩⅣ-ⅩⅤ Titɔ kĩ matsɛlɛ ovoli kĩĩ mma nɔ malo ni, nlamɛna osi kadã kĩ maayasɛla nɔ nɛ lɔkɔ lukũ kamɛ. Lɛmɛ matsɛlɛ ye ayekĩ ntɛ nkpa liti ni, aanyi ayekĩ bati bipi be akũ nɛ Baguma asɔli a kamɛ. Ade asɔli a nyɛ bikĩ bɛtɛ Baguma a kĩ edzi nkpã daa bido, kĩ fɔnyɛ luku kĩ lɛnɔnɛ ɔnɔkɔali a.
ⅩⅥ Nɛ ɔnɔkɔali kamɛ ni, kalɛ a kĩ bɛkɔa bɛkɔla nɛ Baguma ɔsum kamɛ a nyɛ kalɛ kpale kĩ odima lɛláapuli esĩ ke. Ade foe nyɛ kĩ,
“Kristo ya nɛ katinya kamɛ ndɛ otidziwa aye
Baguma Hũhũ a nyɛ ɛtsa kĩ oti kpalɛwa yanɛ.
Ode fɔtɔ banyanɛ mɔ́ ye,
ade bide lɛtsã nɛ ye akũ nɛ fude fude kamɛ a.
Bɛtɛ ye bido nɛ katinya kamɛ flee,
ade Baguma bɔɛ ye ɛnamɛna ode nɛ kukũkpalɛ kamɛ a.”