☰ Luk 1
Luk
I Fye Tulen gablà ku Dyisas Krayst i Sulat Luk
Kafaglabat i libru sulat Luk
Libru ani sulat Luk na feben di satu to Grik dnagit Tyufilus. Kenen satu ganlal di gubirnu.
Luk satu to gal mulung, na deme Fol sgalak samnagin kenen di kagun mbel i Fye Tulen gablà ku Dyisas di dad to. Luk satu to Grik ise Dyu. Di kdee dad to smulat dad libru di Tnalù Dwata, alò Luk ise Dyu. Là kenen lmen mite ku Dyisas, bay faglut di kenen mdà di katdò Fol. Na mdà di galwe dulê Fol samfulê di dad banwe gutamdoan kel di kbanòla kenen di Roma, là mkah Luk magin kenen.
Na kayè Luk fgadè di kdee dad to na Dyisas too glut Tingà Dwata, na kenen gafalwà dale di dad salàla. Na faglabatan, ise ku alò dad Dyu i tnabeng Dyisas, bay kdee bung dad to di klamang banwe tnabengan. Tnulenan gablà di ktabeng Dyisas i dad to nun tduk, na i dad to mnè di kalima, na lumban i dad to gamsalà. Santulen Luk gablà di gnagu Dyisas mdà di ksutan kel di kfatin na di ktékan.
1
I sulat Luk di ku Tyufilus
1 Mabtas Tyufilus,
Tadee nan dad to tmilew smulat i kdee gdohò di blengmi. 2 Tagsulatla i tagtulen di gami mdà di dad to too mite i dad mgimò ani mdà di katbuan, i dad to tagnè tmulen i Fye Tulen gablà ku Krayst. 3 Na too mgafè Tyufilus, du tatoogu fandam i kdee tatulenla mdà di katbuan, taman fandamgu fye ku sulatgu lêman i kdee ani di ge mdà di katbuan di too fye kasdadol dun, 4 du fye toom gadè i kaglut i kdee tagatdò di ge.
I kafgadè i ksut Dyan Gal Munyag
5 Di muna fa, di bang Harì Hérod magot i banwe Dyudiya, nun satu bà di Dwata dnagit ku Sakaraya. Na to ani satu di lumbuk i dad bà di Dwata mdà di dad bel Abadya. Na i dagit yaanan, Ilisabét. Kenen bel i bà di Dwata Aron. 6 Na i satlamin ani, too matlu di kanfe Dwata, du di kimenla dad flalò na dad fimò Dwata landè gumngak dale du toola glalò. 7 Kabay landè tingàla du tagnè là mngà Ilisabét, na tatua ale nan.
8 Na di satu duh, takel i bang mimò ale Sakaraya alel i dad bà di Bong Gumnè Dwata i gumangamfùla di kenen. 9 Na nun tagnè nimò i dad bà di Dwata, gal ale malék fagu di kasbunut ku simto mtam i fangbun di lam i Bong Gumnè Dwata. Na di duh én, dagit Sakaraya i mgalékla, taman fusuk kenen di lam. 10 Na di bangan mtam i fangbun, dmasal i kdee dad to stifun di lwà. 11 Na nun kasaligan Dwata msut déén di kenen na tadag gsen di kwanan i gal gumtam i fangbun. 12 Di kite Sakaraya i kasaligan, taknal kenen na too likò. 13 Kabay man i kasaligan di kenen, “Sakaraya, nang ge likò, du talinge Dwata i dasalam, na Ilisabét, yaanam, mngà kenen kadang i tingà lagi, na én dagitam kenen Dyan.
14 Na too nun klehewyu kadang di ksutan,
na nun dee dademe dad to magin gamu flehew,
15 du i tingàyu kadang satu too mdatah to di kite Dwata.
Na laan minum binu ku demen i dademe gaflangal.
Na fnò kenen i Mtiu Tulus mdà di ksutan.
16 Na dee kadang bel Israél neben samfulê di kafaglutla di Amu, dunan i Dwata fnangamfù dad tbulla.
17 Na kenen i dek muna di Amu fan kel, na too nun gnagan blé i Tulus Dwata kenen,
salngad i gablé di ku Ilaydya, i tugad Dwata di muna fa.
Na én nimoan, snafyen i dad smà na sngà.
Na i dad to là mimen Dwata neben di fye fandam salngad i dad to matlu,
du fatlagadan i dad to di kakel i Amula.”
18 Na smalek Sakaraya, manan, “Tan i gugmadègu na glut i manam, du tatua agu nan, na tatua yaangu?” 19 Na tmimel i kasaligan, manan, “Agu Gabriél, i salig Dwata gal tadag di kanfen, na dekan agu dini du fgadè ge i fye tulen ani. 20 Kabay du là ge faglut i mangu, mdà ani mbaling ge umu. Silang ge gtalù ku takel i bang kagdohò i gmangu gine.”
21 Na i dad to di lwà fatan ku Sakaraya, tikeng ale du too kenen mlo déén di lam i Bong Gumnè Dwata. 22 Di kalwaan talaan gtalù di dale, taman gadèla nun fite Dwata kenen di lam i Bong Gumnè Dwata. Na sminyas kenen bay laan gtalù.
23 Kafnge Sakaraya mimò di Bong Gumnè Dwata mulê kenen. 24 Na là mlo, tamlalu i yaanan, na lime bulen klon fanak di lam gumnèla, na manan, 25 “Ani nan i kfagu Dwata tmabeng deg, du tanwean i gamlé deg kyà di dad to.”
I kafgadè i kasaligan gablà di fan ksut Dyisas
26 Na di gnam bulen i tien Ilisabét, lêman dek Dwata i kasaliganan Gabriél salu di Nasarét, satu lunsud glam di banwe Galili. 27 Dekan kenen di satu sawang libun dnagit ku Méri, i bliwal satu bel Harì Dabid dnagit ku Dyosif. 28 Na salu i kasaligan di ku Méri, na manan, “Flehew ge! Too ge kando i Amuito Dwata na kenen i magin ge!” 29 Kabay kaklinge Méri i man i kasaligan, too msamuk nawan, na toon fandam ku tan gumtatek i manan. 30 Na man i kasaligan di kenen, “Nang ge likò Méri, du too ge banlé Dwata kafye, 31 du mbaling ge maltien kadang, na lagi i tingaam, na én dagitam kenen Dyisas.
32 Too kenen mdatah to, na tlo kenen Tingà i Too Mdatah Dwata,
na i Amuito Dwata mlé kenen i kagot gutambulan Harì Dabid.
33 Na kenen mebe i dad bel Dyékob kel di landè sen,
landè gusen i kagotan.”
34 Kabay man Méri di kasaligan, “Tan i kibògu mngà du sawang libun agu fa?” 35 Na tmimel i kasaligan, manan, “Salu i Mtiu Tulus di ge kadang, na fnean di ge tulus mdà di Too Mdatah Dwata. Na du ani gumdaam mngà taman too mtiu i tingaam, i to landè salà, na én katlo kenen Tingà Dwata. 36 Fandamam i bong yéam Ilisabét. Gal gman laan gngà, bay ani tanam bulen i tienan, balù tatoo kenen tua, 37 du landè sa là gagan Dwata.” 38 Na man Méri, “Agu salig Dwata. Fye ku kel di deg i kdee manam.” Na tnagak kenen i kasaligan.
I klauy Méri ku Ilisabét
39 Kafnge én, di là mlo, fatlagad Méri, na gasil mdà salu di satu lunsud di dad bulul déén di Dyudiya. 40 Kakelan déén myak kenen di gumnè Sakaraya, na tlon Ilisabét na lkafan. 41 Kaklinge Ilisabét i talù Méri, lamyak i tingà di lam i tienan, na baling fnò Ilisabét i Mtiu Tulus. 42 Taman falbongan i taluan manan di ku Méri, “Di kdee dad libun, ge i too gumlé Dwata kafye! Na too banlé Dwata kafye i tingà kaltienam! 43 Tan i duen banlé agu kafye du nlauy agu i yê Amugu? 44 Du di kaklingegu i taluam lamyak i tingà di tiengu mdà di klehewan. 45 Too nun kafyem du faglut ge dnohò Dwata i fafgadean di ge.”
I kdayen Méri di Dwata
46 Na man Méri,
“Toogu dnayen i Amugu Dwata mdà di nawagu,
47 na too lehew nawagu Dwata, i To Falwà deg,
48 du gafaldaman agu, balù agu alò satu saligan too mdanà,
taman mdà ani, man i kdee dad to agu gumlé Dwata too bong kafye,
49 du mdà di dad malbang mgimò Dwata Too Mtulus di deg.
Dnayengu dagitan du too kenen matlu.
50 Fiten i kakdon di kdee dad to nun klikò di kenen,
fandà di muna dad to, kel di kdee tugad i bella.
51 Tafiten i ktulusan fagu di kdee mgimoan,
na fnisanan i dad to fdatah i ktola.
52 Tafdanaan i dad mdatah harì,
na tafdatahan i dad mdanà to.
53 Tafabsolan i dad to bitil fagu di dad fye blén di dale,
bay fuléan i dad to bong knun na landè blén dale.
54 Tadnohoan i dad fakangan di gutambulito,
du tatnabengan dad saligan, i dad bel Israél,
du fye fiten i kakdon.
55 Na là tlag i kakdon ku Abraham
na i belan kel di landè gusenan!”
56 Na mnè Méri di saféd Ilisabét mdadong di tlu bulen, na kafnge én, mulê kenen.
I ksut Dyan Gal Munyag
57 Na kel i bang ksut tingà Ilisabét, lagi tingaan. 58 Kaklinge i dademen saldan na dad gakedan gablà di bong kakdo fite Dwata di ku Ilisabét, magin ale di klehewan.
59 Di gwalun duh mdà di ksut i tingà, stifun i dad to déén du ftulìla. Na tafanla dnagit i tingà én Sakaraya, du fasngadénla di maan, 60 bay man i yéan, “Ise én, Dyan i dagit kenen!”
61 Na manla di kenen, “Kabay landè gakedyu dnagit salngad én!”
62 Na sminyas ale di maan ku tan i kayean dagit i tingaan. 63 Taman mni Sakaraya gusmulat, na sulatan, “Dyan i dagitan.” Na too tikeng kdeela. 64 Na talê gtalù Sakaraya, na flesan dnayen Dwata. 65 Di kaklinge i kdee dad demela saldan ani too ale likò. Na mbel i santulen ani kel di kdee dad bulul di banwe Dyudiya. 66 Na kdee dad to mlinge gablà di mgimò ani, toola fandam, na smalek ale, manla, “Tan i kagkah i tingà ani kadang?” Én manla du toola nilè i tulus Dwata mnè di kenen.
I kdayen Sakaraya di Dwata
67 Na i mà Dyan, dunan Sakaraya, fnò kenen i Mtiu Tulus, taman talù i ftalù Dwata kenen, manan,
68 “Dnayenito Amuito Dwata fnangamfù i dad bel Israél,
du tasalu kenen di gito dad ton,
na banlén ito kagalwà.
69 Dekan dini di gito i to too mtulus falwà gito,
dunan i bel saligan Dabid,
70 du én sa fakangan di gito fagu di dad tugadan di muna,
71 manan falwaan ito mdà di dad to dmuen gito,
na mdà di kagot kdee dad to mnang nawa gito.
72 Fite Dwata i kakdon di dad gutambulito,
fagu di kdohoan i fakangan di dale.
73-74 Makang kenen di gutambulito Abraham,
na manan toon dnohò i fakangan du falwaan ito mdà di dad to dmuen gito,
du fye gmagan ito mimò i knayean di landè klikoito,
75 du én i kayean ku mnè ito di klandè salà na di katlu déén di kanfen,
kloito mnè di tah tanà ani.
76 Na ge, tingàgu, matlo ge kadang Tugad i Too Mdatah Dwata,
du muna ge di Mdatah Amu, fye fatlagadam i dalan gumagun,
77 du fgadeam i dad ton nun kagalwà, fagu di klifet Dwata i salàla,
78-79 du Dwataito too kamdo gito.
I kakel i To Falwà kadang gambet i ksut i duh
di gito dad to mnè di gukmifun na di klikò i fati.
Na fiten gito i dalan di ktanak nawa.”
80 Na lamnok i tingà Sakaraya na Ilisabét, na mbaling matnù i ksaligan di Dwata. Na mnè kenen di banwe landè to mnè déén kel di katbuan tamdò i dademen bel Israél.
☰