Salmo 105
105
I lingag dmayen Dwata i too dmohò i dad fakangan
1 Mlé gamu fye di Amuito Dwata, na fdatahyu dagitan;
fgadèyu di kdee to di dad sahal banwe i mgimoan.
2 Mlingag gamu di kenen lingag i kdayenyu kenen,
na tulenyu i kdee kafye mgimoan.
3 Fdatahyu i dagit i Amuito Dwata;
na flehew gamu i dad to mayè fdadong di kenen.
4 Fdadong gamu di kenen na mni gamu gal mdà di kenen,
na nang gamu tlag fdadong di kenen.
5-6 E gamu bel Abraham, i to salig Dwata,
gamu bel Dyékob, i to mgalék Dwata,
fandamyu i dad kafye mgimò Dwata, i dad gamtikeng mgimoan,
na i dad kukuman i dad to dmuen kenen.
7 I Amuito Dwata, kenen i Dwata gusmaligito,
na kenen i mukum kdee to di klamang banwe.
8 I fakangan, laan nlifet dun kel di landè sen;
dnohoan i fakangan di dad to kel di file libu tugad i bella,
9 dunan i fakangan di ku Abraham,
i too fakang Dwata lêman di ku Isaak.
10 Na nulitan lêman di ku Dyékob, dunan Israél, i fakang én;
fgadean kenen, landè gusen i fakangan,
11 manan, “Blégu di ge i banwe Kanaan,
du nfunam.”
12 Di bang i kfakangan ani là fa dee bel Israél;
na tatì ale alò magu di banwe Kanaan.
13 Alò ale lamngab di dad sahal banwe déén,
mdà di banwe satu bung dad to, ditù di banwe satu bung dad to.
14 Kabay balù ani kagkah knèla, là faloh Dwata ku nun mkut dale,
nngakan dad harì mayè smamuk dale,
15 manan, “Nangyu fansasè i dad salig i tamgalékgu,
na nangyu fanlayam i dad tugadgu.”
16 Di kafkel Dwata i bong kbitil di banwe én,
du nwean i kdee knaanla,
17 tafeben satu to muna di dale,
dunan Dyosif i fablila na gfasak.
18 Gseey i dad blian mdà di sangkalì ikatla di kenen,
na nlabédla tek i lialan.
19 Ani i dad ktandak Amuito Dwata ku Dyosif,
kel di bang Dwata too dmohò i kubad Dyosif i dad kna.
20 Kagdohò i dad kna, fafalwà kenen i harì di bilanggù,
Én fafalwà kenen dunan i mebe i banwe Idyif.
21 Na nimoan Dyosif ulu di kdee di bong gumnean,
na fagotan fa kenen kdee nfunan.
22 Nun glal Dyosif mdek i dad ganlal di banwe nagot i harì,
na tamdò i dad tua gal mebe, fye nun kfulungla mebe.
23 Na salu ale Dyékob di banwe Idyif,
na mnè ale déén flo.
24 Di klola déén too fbel Amuito Dwata i dad ton,
na mbaling ale dee fa di dad to dmuen dale.
25 I nimò Dwata ani i gumdà dad to Idyif mbaling mnang nawa i dad to Dwata,
na neyela dalanla mgaw dad salig Dwata ani.
26 Kabay dek Dwata i saligan Mosis,
na i mgalékan Aron salu ditù.
27 Na fitela di dad to dad ilè i bong gnagan Dwata,
na nimòla dad gamtikeng di banwe Idyif.
28 Na febe Dwata i kifu di klamang banwela,
bay là mimen i dad to Idyif i manan di dale.
29 Na fanbalingan litè i dad yéélla,
na mati dad nalaf déén.
30 Na kafnge én, i banwela tì fnò fak,
balù di lam dad sibay i dad mebe i banwe di bong gumnè i harì.
31 Kafnge én, talù Dwata,
na mdà di kmanan tì msut i too dee dad langad na blabang di klamang banwela.
32 Na ise ulen i fulenan di klamang banwela,
bay én fulenan dad malbang lbatù tno magin i silà.
33 Na én gafalmo i fulela grép na i fulela kayu fig,
na dad fanga i dademe kayu di banwela mti tfò.
34 Na lêman talù Dwata,
na mdà di kmanan tì msut i bong dee tlangas i là gagan mse i kdeela.
35 Na kdee fulela, mtila knaan;
kdee bunge i fulela, knaan i dad tlangas.
36 Na i kdee ngà lagi sangal twege di dad to Idyif, fnati Dwata;
i tnanin ngàla, én fnatin.
37 Na kafnge én, neben i bel Israél lamwà di banwe Idyif;
nebela i dad kalyak nimò mdà di salafì na blawen,
na kdeela too fye lawehla na mgal ale.
38 Lehew i dad to Idyif di kalwà i bel Israél di banwela,
du talikò ale di dale.
39 Na di kagu i dad to Dwata gnalungan ale i labun;
na banlén ale lifoh du tmuyal di butang.
40 Mni ale, na fneben ale anuk di bnas,
na banlén ale knaan mdà di langit dnagit mana du fabsol dale.
41 Tafulétan satu batu, na fatbulan mdà déén i yéél;
na maloh i yéél én salngad di satu bong yéél di kafag tanà di banwe gulandè to.
42 Tanimò Dwata kdee ani, du laan nlifet i fakangan di saligan Abraham.
43 Ani i kagkah keben i dad ton, i dad mgalékan, lamwà di banwe Idyif;
na too ale mkit na mlingag di klehewla.
44 Na tablén dale i tanà i dademe to mnè di banwe fakangan di ku Abraham,
na déén gumwèla knaanla di fule dad to déén.
45 Mgimò Dwata kdee ani du fye nun ayèla mlalò i manan dale,
na fye nimenla i flaloan.
Dnayenito Amuito Dwata!