Bibeli Luayãtaalá Ikoyã 33

Mↄizi Isaili buiↄ gbaa sa'olɛ

(Daa 49.1-28)

1 Sa maa pↄ́ Lua gbɛ̃́ Mↄizi ò Isailiↄnɛ e àↄ gɛ́ gain kɛ, 2 à mɛ̀:

Dii bↄ̀ Sinai à mↄ̀wá,

aà gawi bìlɛwá za Sei,

à pìpiwɛ̃ɛ za Palana gbɛ musu,

à bↄ̀ a gbɛ̃́ dasidasiↄ kĩ́i,

lou lɛ́ pílɛpilɛ aà ↄplaai.

3 Dii ye a gbɛ̃́ↄzi,

gbɛ̃́ pↄ́ an kua ńdoapiↄ ku aà ↄzĩ.

Aaì kãaaaàzi wà aà yãma.

4 Mↄizi ikoyã dìlɛwɛ̃ɛ,

wá Yakↄbu buiↄ pↄ́ ũ.

5 Dii mɛ́ gↄ̃̀ wá bui maa kía ũ,

kɛ́ wá Isaili bui dↄaanaↄ kↄ̃ kã̀aa.

6 Mↄizi mɛ̀:

Lubɛni buiↄ aaↄ kuɛ, aa gao,

kási aaↄ dasio.

7 À yã́ɛ bee ò Yuda buiↄ yã́ musu:

Dii, Yuda buiↄ wii ma,

ní suńnↄ ń gbɛ̃́ↄ guu.

Aalɛ gí ń ńzĩao,

dↄńlɛ an ibɛɛↄ yã́ musu.

8 Levii buiↄ yã́ musu à mɛ̀:

N Tumiũ ń Uliũo kpà n gbɛ̃́ náaideↄwa.*

N ń lɛ́ n ń gwá Masa,

n zↄakàńzi Mɛliba í kĩ́i.†

9 Aai ń de ń ń dao yãdao,

aai ń vĩ̀iↄ ń ń dãunaↄ dↄ̃o ge an nɛ́ↄ.

Aa n yã́ kũa,

aa zɛ̀ ń n bàakuańnↄ yã́o.‡

10 Aaì n yã́ↄ da Yakↄbu buiↄnɛ,

aaì n ikoyã da Isailiↄnɛ.

Aaì tulaletikatɛa n aɛ,

aaì sa pↄ́ wì a pↄ́ kátɛu à tɛ́kũ o ń gbagbakĩiwa.

11 Dii, báaadańgu, ní ń gba gbãa,

kɛ́ zĩ pↄ́ aalɛ kɛↄ e kangu.

Gbɛ̃́ pↄ́ lɛ́ fɛlɛńnↄↄ lɛ́ ń wówa,

ǹ ń zangudeↄ gbɛ̃, aasu fɛlɛ lↄo.

12 Bɛ̃yãmɛɛ buiↄ yã́ musu à mɛ̀:

Dii gbɛ̃́ yenzideↄ zↄ̃lɛaaànↄ dↄdↄa.

Dii aↄ kàedańzi,

aↄ kú ń guu gↄↄpiiɛ.

13 Yosɛfu buiↄ yã́ musu à mɛ̀:

Dii báaada ń bùsuu

ń fíi maa pↄ́ ì bↄ musu à kpao

ń í pↄ́ kálɛa tↄↄlɛ zíɛo

14 ń pↄmaa pↄ́ ĩatɛ̃ ì to aa bↄlɛↄ

ń pↄmaa pↄ́ ì bↄlɛ mↄ ń mↄoↄ

15 ń gbɛ̀sĩsĩ zi musupↄↄ

ń sĩ̀sĩ pↄ́ kú za káauↄ pↄmaaↄ

16 ń pↄmaa pↄ́ kú tↄↄlɛↄ píi.

Yosɛfu buiↄ na ń Lua pↄ́ kú yãa kàelɛuo,

ɛ̀fãaipiↄ i su ń miwa,

asa Yosɛfu á bɛɛɛdeɛ a gbɛ̃́ↄ guu.

17 Aà buiↄ aaↄ zↄ̃ↄkɛ vĩ

lán zuswana nɛsana sɛ̃́iawa,

aaↄ gbãa vĩ lán zùsɛ̃lɛ kↄ́baↄwa,

aa málɛ buiↄzi e dṹnia lɛ́wa.

Màa Ɛflaiũ bui aↄ dasi,

màa Manase bui aↄ dasi.

18 Zabulↄni buiↄ yã́ musu à mɛ̀:

Zabulↄni buiↄ,

à pↄnakɛ laa pↄ́ álɛ taↄ guu.

Isakaa buiↄ, à pↄnakɛ bɛ.

19 Aa gbɛ̃́ↄ sísi Dii gbɛ̀sĩsĩwa,

aai samaa'owà we,

asa aa àizɛɛ pↄ́ di ísiauↄ ble

ń pↄ́ pↄ́ ulɛa bùsu'ũfãa guuↄ.

20 Gada buiↄ yã́ musu à mɛ̀:

Wà Gada buiↄ bùsu Kãfĩna sáaukpa!

Aaↄ wúlɛa we lán nↄ̀ↄmusuwaɛ,

aa gbɛ̃́ↄ taitai ń gã̀sĩↄwa ń ń miↄ.

21 Aa tↄↄlɛ sɛ̃́ia sɛ̀ ńzĩa pↄ́ ũ,§

wa gbɛ̃zↄ̃ↄↄ baapi kũanɛ́ we.

Kɛ́ Isailiↄ dↄaanaↄ kã̀aa,

Gada buiↄ zĩkɛ̀ Dii ikoyã zɛdewa

ń yã́ pↄ́ a dìlɛ Isaili bui píiɛo.

22 Dã buiↄ yã́ musu à mɛ̀:

Dã buiↄá nↄ̀ↄmusu nɛ́ bↄlↄↄnɛ,

aai bↄ Basana bùsuu aa kusimá.

23 Nɛfatali buiↄ yã́ musu à mɛ̀:

Nɛfatali buiↄ na ń Diio maamaa,

à báaadàńgu à kɛ̀ zài.

Ísida ń gɛↄmidↄkĩi oi bùsuo

a gↄ̃ ń pↄ́ ũɛ.

24 Asɛɛ buiↄ yã́ musu à mɛ̀:

Pↄnadeↄ Asɛɛ buiↄ dɛ bui kĩniↄla,

aaↄ naaànↄ dɛ ń gbɛ̃́ↄla,

aa ń gbá pípi ń nísio.

25 Aa ń bↄlɛ gbã́aↄ pi

ń mↄsio ń mↄgotɛ̃o,

aaↄ ku dↄdↄaɛ e ń wɛ̃ni lɛ́u.

26 Bui maaↄ, gbɛ̃e muaa ń á Luaoo,

ì di luabɛpuana kpɛ musu,

ì mↄ dↄiálɛ a zↄ̃ↄkɛ guu.

27 Lua pↄ́ kú za zipi mɛ́ á ulɛkĩi ũ,

ìↄ ↄliaázi zĩ́lɛ la gↄↄpiiɛ.

Ì á ibɛɛↄ yáɛ́, ì oɛ́ à ń kaalɛ.

28 Isailiↄ iↄ ku dↄdↄa ńtɛ̃ɛ,

Yakↄbu buipiↄ iↄ ku

bùsu pↄ́ pↄ́wɛna ń vɛ̃ɛo diu,

gu pↄ́ a mↄ̀sɛ ìↄ bↄ musu.

29 Báaadeↄn á Isailiↄ ũ,

asa Dii á suabà.

Démɛ kú lááwai?

Ɔ̃mɛ á sɛ̀ngbao ń á dↄnlɛo

ń á fɛ̃nda gawideo ũ.

Á ibɛɛↄ vlãnauɛ́ á aɛɛ,

íↄ bɛ ń bùsu gulɛsĩↄwa.

* 33:8 Bↄa 28.30 † 33:8 Bↄa 17.7, Nao 20.13 ‡ 33:9 Bↄa 32.26-29 § 33:21 Nao 32.1-5, 31-32