Bibeli Luayãtaalá Làasoode 1

LÀASOODE

Yã́ pↄ́ kú láɛ bee guuↄ

Sɛa za lápi dↄ̀ↄ sɛ̃́iawa lápi kɛ̃na lɛ́ azĩa yã́ bↄↄlɛkɛwɛ̃ɛ lá á ↄ̃nↄ, ãma lápi ↄ̃nↄ yã́ↄ doũ ń Yáasi lá pↄ́oo. Aà ↄ̃nↄ doũ ń fɛlɛkaa pↄ́oo. Aà kua dṹnia guu à yã́ pↄ́ á kɛ̀ↄ ń yã́ pↄ́ a leↄ gwà, ↄ̃ a è nama dɛ lán suawaɛ, mɛ́ gbɛ̃nazĩna ì dɛ̃ɛka, kɛ́ à e namable yã́iɛ, ↄ̃ ìↄ bↄ pã mↄ̀ↄmↄↄ. À làasookɛ̀ azĩawa tó kua dṹniau dↄ̀ↄ vĩ, ge tó a bɛɛɛ vĩ. Ì to gbɛ̃́ pↄ́ lɛ́ lápi kyokɛↄ yã́ doũpiↄ wàaipa. Lá a ku Yobu lá guuwa, yãwea àao. Làasoode ń a ↄ̃nↄkɛo à bílikɛ̀ gbɛ̃nazĩna kuana yã́wa. Ɔ̃ à lɛdàwá wà zĩkɛ maamaa wà pↄnakɛ ń pↄ́ pↄ́ Lua wá gbáↄ e wá wɛ̃ni lɛ́u.

Làasoode yã́ dasiↄ bↄ̀ yã́ↄ kpɛɛ, ì gbɛ̃́ kãdɛ. À zɛ̀ò kɛ́ dɛ̃ɛ pↄ́ wì ká ń pↄna pↄ́ wì e dṹnia guuoá yãpãɛ. Ɛ̀waasokɛ, ↄdekɛ, àizɛɛdekɛ, zĩkɛa, ↄ̃nↄkũa, yãkɛa a zɛ́wa, a dìlɛ yã́piiá pãɛ mɛ́ gugiiyaaɛ. Lá gbɛ̃nazĩnaↄ ìↄ ku ga lɛ́zĩ mɛ́ yã́zɛsai ku, bee tò nama líↄ kuo. Wìliↄ yã́ pↄ́ Lua lɛ́ yá ń dṹniao dↄ̃o, ↄ̃ bee tò wá gbɛ̃nazĩna zia gbá dↄ̃o. Yã́piↄ ì to wà làasookɛ zɛ́ pↄ́ maa wà sɛↄwa.

Bibeli láↄ ì wá wɛ̃ni mi ↄlↄwɛ̃ɛ. A maa wà lápiↄ kyokɛ, wí e dↄ̃, wí bↄ seakɛa ń pↄyaao guu. A maa wà làasookɛ wá kua dṹniauwaɛ, wí zĩkɛ yã́ pↄ́ wa kɛ̃̀ Bibeliuwa, wí e Lua náaikɛ a zɛ́wa. Wɛdↄa Luazi mɛ́ a tó wá kua dṹniau àↄ dɛ gugiiyaa ũo.

Yã́pii pãɛ

1 Làasoode Davidi nɛ́, Yelusalɛũ kía yã́n kɛ:

2 Mámɛmaa Làasoode ma mɛ̀:

Yãpã búubuu,

yãpã búubuu, yã́pii pãɛ.

3 Bↄ́ ài gbɛ̃nazĩna ì e dṹniau

taasi pↄ́ àlɛ kɛ a zĩ píi guuwai?

4 Kpàiↄ ì gɛ̃, Wueↄ ì su,

ń beeo dṹnia ìↄ ku gↄↄpiiɛ.

5 Ĩatɛ̃ ì bilɛ ì gɛ̃ kpɛ́u,

ì wã à ɛa gɛ́ gu pↄ́ a bↄu.

6 Ĩana ì na gɛↄmidↄkĩi oi,

ì liaa su gugbãntoo oi,

ìↄ liaaliaa à gɛ́ le à su la.

7 Swa píi í ìↄ ka ísiauɛ,

kási ísia lí pao,

ípiↄ i ɛa su swapiↄ miwa.

8 Pↄ́pii ì ń kpasa,

kpasapi yã́ gɛ̃̀ oaa.

Gugwaa lí mↄ́ wɛ́wao,

yãmaa lí swã́ pao.

9 Yã́ pↄ́ kú yãa mɛ́ a ɛa àↄ ku lↄ,

yã́ pↄ́ wa kɛ̀ yãa ↄ̃ wa ɛa kɛ lↄ.

A dafue ku dṹniauo.

10 Pↄe ku kɛ́ wà mɛ:

Pↄ́ dafue gwaa?

Aawo! À dↄ̀aa kú wá ãa za zi kↄ̀.

11 Gbɛ̃́ káauↄ yã́ líↄ dↄ gbɛ̃egu lↄo.

Baa gbɛ̃́ pↄ́ aaↄ ku ziaↄ,

an yã́ a dↄ gbɛ̃egu gbɛzão.

12 Ma làasoode ma kɛ Isailiↄ kía ũ Yelusalɛũ. 13 Ma mɛkpà yã́ pↄ́ wàlɛ kɛ dṹniau píi tàasikaawa, má yↄ̀ɛ ↄ̃nↄ'ↄ̃nↄ, má è Lua zĩ pãsĩ dà gbɛ̃nazĩnaↄnɛ aa kɛ. 14 Ma yã́ pↄ́ wàlɛ kɛ dṹniau è píi, a píiá pãɛ mɛ́ gugiiyaaɛ.

15 Pↄ́ fĩaa pooa vĩo,

wìli e pↄ́ pↄ́ kɛ̃̀sã nào ń a kĩniↄo.

16 Ɔ̃ má ò ma nↄ̀sɛu ma mɛ̀: Gwa! Ma ↄ̃nↄ zↄ̃ↄ dɛ gbɛ̃́ pↄ́ kpalablè Yelusalɛũ ma ãaↄla píi, ma ↄ̃nↄ ń ma dↄ̃ao wɛbↄ̀ maamaaɛ.* 17 Ɔ̃ ma mɛkpà ↄ̃nↄ asii dↄ̃awa mà sↄũkɛ ń mìsaiyão asii dↄ̃, ↄ̃ má è beeá gugiiyaaɛ lↄ.

18 Asa ↄ̃nↄ zↄ̃ↄ ì mↄ́ ń pↄyaa zↄ̃ↄoɛ,

mɛ́ wì yã'ↄ̃ma e ń dↄ̃a lɛ́uɛ.