Bibeli Luayãtaalá Làasoode 6

1 Ma vãi è dṹnia guu lↄ, à tↄ̃̀ gbɛ̃nazĩnaↄwa. 2 Lua gbɛ̃́ kà ↄdawa, à aà gbà àizɛɛ ń bɛɛɛo, a pↄ́ pↄ́ dɛ àↄ a ni vĩ píi vĩ, ↄ̃ Lua i to à pↄnakɛ̀òo, gbɛ̃pãle mɛ́ gↄ̃̀ vĩ. Beeá pãɛ, yãvãi pãsĩɛ.

3 Tó gbɛ̃́ nɛ'ì mɛ̀n basↄo mɛ́ à zikũ̀ táotao, baa ń aà gɛ̃gɛ̃akɛo, tó i e pↄnakɛ̀ a guuo, tó à gà mɛ́ aà vĩa kpɛlaao, nɛ́ pↄ́ wa ì gɛ̀ sã̀ↄwà. 4 Asa nɛ́pi mↄ̀ pãɛ, ↄ̃ à tà gusiau, aà tↄ́ gↄ̃̀ balau. 5 Baa kɛ́ i ĩatɛ̃ eo mɛ́ a yãe dↄ̃o, à niɛ è dɛ ↄdepia. 6 A dɛ gbɛ̃́ pↄ́ kú wɛ̃̀ ↄ̀aa kwi pↄnakɛsaila. Aali gɛ́ gudoũ ḿpiio lé?

7 Gbɛ̃nazĩna isima pↄ́ a gà lɛ́ kpá,

à pↄ́ e da lɛ́ɛ yã́ɛ,

kási aà gbɛɛ lí kã́o.

8 Bↄ́ ↄ̃nↄna dɛò sↄũai?

Bↄ́ ài yãkɛa a zɛ́wa ì i taasideɛi?

9 Pↄnakɛa ń pↄ́ pↄ́ ń vĩo

maa dɛ a pãle nidɛaa.

Beeá pãɛ lↄ mɛ́ gugiiyaaɛ.

10 Pↄ́ pↄ́ kɛ̀ yãa tↄ́ vĩ kↄ̀,

mɛ́ wa dↄ̃ lá gbɛ̃nazĩna dɛ.

Gbɛ̃nazĩna a fↄ̃ lɛkpaakɛ

ń gbɛ̃́ pↄ́ a gbãa dɛalaoo.

11 Yãbↄlɛ dasi ì yãpã kↄ̃́.

Bↄ́ ài bee vĩ gbɛ̃́ɛi?

12 Démɛ dↄ̃ pↄ́ pↄ́ maa ń gbɛ̃nazĩnao aà wɛ̃ni gii kpòona pↄ́ ì gɛ̃ lán uenawa guui? Démɛ a fↄ̃ yã́ pↄ́ a kɛ aà kpɛ dṹnia guu oɛ̀i?