Bibeli Luayãtaalá Làasoode 8

1 Démɛ dɛ lán ↄ̃nↄnawai?

Démɛ yã́ↄ bↄↄlɛ dↄ̃i?

Ɔ̃nↄ ì gbɛ̃nazĩna oa weeɛ̀,

ì oa pãsĩ lilɛ.

2 Misiilɛ kía yã́ɛ,

asa n lɛkɛ̀wà ń Lua tↄ́oɛ.

3 Ńsu wã ǹ go aà aɛo,

ńsu ǹyↄ̃ yã́ pↄ́ lɛ́ kɛɛ̀ ĩ́i kṹkũao,

asa a yã́ pↄ́ kàagu kɛ píiɛ.

4 Lá kía yã́ mɛ́ zɛvĩ,

démɛ a fↄ̃ oɛ̀, bↄ́ ńlɛ kɛ weii?

5 Gbɛ̃́ pↄ́ misìilɛɛ̀ a ĩa eo,

gbɛ̃́ pↄ́ ↄ̃nↄ a a gↄↄ ń a kɛkɛáo dↄ̃.

6 Yã́pii a gↄↄ ń a kɛkɛáo vĩɛ,

baa tó taasi lɛ́ tↄ̃́ gbɛ̃́wa gbã́ugbãu.

7 Lá gbɛ̃e zia dↄ̃o,

démɛ a fↄ̃ yã́ pↄ́ a mↄ oɛ̀i?

8 Gbɛ̃e a wɛ̃ni kũa gbãa vĩo,

màa gbɛ̃e a fↄ̃ à a gagↄↄ sɛ sↄ̃òo.

Wìli e bↄ̀ sosau zĩgↄↄo,

màa vãi lí a kɛnaↄ gbaɛo.

9 Kɛ́ ma yã́ pↄ́ wàlɛ kɛ dṹniau wàaipà píi, má è gbɛ̃nazĩna ì gbãablemá à ĩakpańzi. 10 Ɔ̃ ma vãikɛna pↄ́ wàlɛ ń vĩↄ è. Gbɛ̃́ↄ bↄ̀ Lua kpɛ́u, aa mↄ̀ ń tↄnasì wɛ̃́lɛ pↄ́ aa ń yãkɛaↄ kɛ̀u guu. Beeá pãɛ lↄ. 11 Tó wi ĩada dàakɛnawa kpakpao, a yã́ ì to gbɛ̃nazĩna zɛò a sↄ̃u à vãikɛ sↄ̃ɛ. 12 Baa tó duunkɛna dàakɛ̀ gɛ̃n basↄo mɛ́ à gɛ̃̀gɛ̃, má dↄ̃ kɛ́ gbɛ̃́ pↄ́ Lua vĩa vĩ aalɛ misiilɛɛ̀ↄ dáama dɛaàla. 13 Vãikɛnaↄ aaↄ dáamavĩo, kɛ́ aa Lua vĩa vĩo yã́i, an gↄↄ a gbã̀akũ lán uenawao.

14 Yãpã pãle lɛ́ kɛ dṹniau. Yã́ ì gbɛ̃maa le lán vãikɛnan aà ũwa, yã́ ì vãikɛna le lán gbɛ̃maan aà ũwa. Ma mɛ̀ beeá pãɛ lↄ. 15 Mi pↄnakɛa sáaukpa, asa a maa ń gbɛ̃nazĩnao dṹniau aà pↄble, aà imi, aà pↄnakɛ, pↄnapi i dↄaaɛ̀ aà zĩkɛa guu lá Lua aà gbà aà wɛ̃ni lɛ́u dṹnia guuɛ.

16 Ma mɛkpà ↄ̃nↄkũawa, ↄ̃ ma bↄↄlɛ pↄ́ wàlɛ kɛ dṹniau, kɛ́ i lí na ń wɛ́uo fãanɛ ń gwãasĩnao wàaipà. 17 Má è Lua tò gbɛ̃e a fↄ̃ yã́ pↄ́ lɛ́ kɛ dṹniau dↄ̃o. Baa tó gbɛ̃́ kpálɛkɛ̀i maamaa, a a midↄ̃o. Baa tó ↄ̃nↄna mɛ̀ á dↄ̃, a fↄ̃ bↄwào.