Bibeli Luayãtaalá Ɛzala 1

ƐZALA

Yã́ pↄ́ kú láɛ bee guuↄ

Pɛɛsiↄ kí Kilusi Yudaↄ gbà zɛ́ aa gɛ́ Dii kpɛ́ kɛkɛ dↄi Yelusalɛũ (1). Gbɛ̃́ pↄ́ wà tàńnↄ yãa Babiloniↄ ɛ̀a lɛ́ tá ń bɛ (2). Yã́ sɛ̃́ia pↄ́ aa kɛ̀ an ɛa sua guu mɛ́ Lua gbagbakĩi kɛkɛ boa ũ, kɛ́ wàli e wàↄ sa'owà lán yãawa (3). Ãma Lua kpɛ́ kɛkɛ dↄa yã́ musu buipãleↄ íbɛlɛsɛ̀ńnↄ, ↄ̃ aa lɛ́kpãsãkɛ̀ Pɛɛsi gbãadeↄnɛ, kɛ́ wà e dↄ̃ tó aa ń gbá zɛ́ wà kpɛ́pi dↄ sĩanaɛ (4-6).

Bee gbɛa Pɛɛsiↄ kí Aatasasa sa'ona Ɛzala zĩ̀ we, ↄ̃ à lousisiyã vù Yelusalɛũ, a tò Yudaↄ nↄ̀sɛlìlɛ aa Lua yã́ kũ̀ ↄplapla. (7-10).

Ɛzala lá gbãakpà luanaaikɛa yã́waɛ ń kua gbãsĩsaio. Sa'ona Ɛzala wↄ́ↄ vĩ, ↄ̃ á kↄaikɛ̀ a tò gbɛ̃́ↄ nↄ̀sɛlìlɛ wà gↄ̃̀ luayãmanaↄ ũ. Ɛzala gↄↄ ↄ̃ Yudaↄ kɛ̀kɛ wà lousisiyã kũ̀ ↄplapla. Wɛ̃ↄ gɛ̃̀ dasi, a gbɛa ↄ̃ wà Yesu Kilisi ì.

Kilusi Isailiↄ gbaɛa

1 Pɛɛsiↄ kí Kilusi kpalablea wɛ̃̀ sɛ̃́ia guu Dii tɛkpàaàgu, kɛ́ yã́ pↄ́ a dà Zelemiiɛ a ò e kɛ yã́i.* Ɔ̃ Kilusi kpàwakɛ̀ a bùsuu píi, ↄ̃ à gbàsa kɛ̃̀ láu à mɛ̀: 2 Yã́ pↄ́ ma Kilusi, Pɛɛsiↄ kía má òn kɛ: Dii Lua Musude tò dṹnia kpala píi gↄ̃̀ ma pↄ́ ũ, ↄ̃ a dìlɛmɛɛ mà kpɛdↄɛ Yelusalɛũ, Yuda bùsuu.† 3 Gbɛ̃́ pↄ́ dɛ aà gbɛ̃́ ũ á guu, Lua kuaànↄ, i ta Yelusalɛũ, Yuda bùsuu, i kpɛdↄ Dii Isailiↄ Lua pↄ́ dɛ Dii ũ Yelusalɛũɛ we. 4 An gbɛ̃́ pↄ́ gↄ̃̀piↄ saɛdeↄ dↄńlɛ ń ã́nusuo ń vuao ń àizɛɛↄ ń pↄtuoↄ ń Lua kpɛ́ pↄ́ aalɛ gɛ́ dↄi Yelusalɛũ gbaↄ.

5 Ɔ̃ Yudaↄ ń Bɛ̃yãmɛɛ buiↄ uabeleↄ ń sa'onaↄ ń Levii buiↄ ń gbɛ̃́ pↄ́ Lua tɛkpàńguↄ fɛ̀lɛ lɛ́ gɛ́ Dii kpɛ́ dↄi Yelusalɛũ. 6 An saɛdeↄ ↄdàmá, aa ń gbá ã́nusu pↄ́ↄ ń vua pↄ́ↄ ń àizɛɛↄ ń pↄtuoↄ ń pↄ́ ↄdeↄ ń Dii kpɛ́ gbaↄ píi. 7 Ɔ̃ Pɛɛsiↄ kí Kilusi bↄ̀ ń Dii kpɛ́ pↄ́ pↄ́ Nɛbukanɛza sɛ̀lɛ yãa Yelusalɛũ a kàlɛ a tã́a kpɛ́uↄ. 8 A ò a ↄ'ulɛna Miledaɛ aà pↄ́piↄ nao aà kpa Yudaↄ kí Sesebazaawa, ↄ̃ a kɛ̀ màa. 9 Pↄ́piↄ dasin kɛ: Vua ta baakwi, ã́nusu ta ↄ̀aa sↄo, tapɛlɛnti baakwi mɛ̀ndosai, 10 vua imibↄ baakwi, ã́nusu imibↄ ↄ̀aa pla ń kwio, ta buipãle ↄ̀aa sↄo. 11 Vua ń ã́nusu taↄ fɛ̀lɛ píi ↄ̀aasↄsↄo lɛɛ sↄo ń ↄ̀aa plao (5.400). Kɛ́ zĩ̀zↄpiↄ bↄ̀lɛ Babɛli aa sù Yelusalɛũ, ↄ̃ Sesebazaa mↄ̀ ń pↄ́piↄ píi.