Bibeli Luayãtaalá Daalɛa 22

Ablahaũ Izaaki kpaa sa'obↄ ũ

1 Bee gbɛa Lua Ablahaũ lɛ̀ a gwà. A òɛ̀: Ablahaũ! Ɔ̃ a wèwà à mɛ̀: Má kɛ́! 2 Ɔ̃ Lua òɛ̀: Ǹ n nɛ́ mɛ̀ndona yenzide* Izaaki sɛ ǹ gɛò Mↄlia† bùsuu, ní sa pↄ́ wì a pↄ́ kátɛu à tɛ́kũ oò gbɛ̀sĩsĩ pↄ́ má onɛwa. 3 Kɛ́ à fɛ̀lɛ kↄↄkↄↄ, à káoyè a zàa'ĩnaɛ, ↄ̃ à a zĩkɛna gbɛ̃ↄn plaↄ sɛ̀ ń a nɛ́ Izaakipio. À sa'oyaa pàa, ↄ̃ à dàzɛu, àlɛ gɛ́ gu pↄ́ Lua òɛu. 4 A gↄↄ àaↄ̃de zĩkɛ́ à wɛzù, à gupi è kãaa. 5 Ɔ̃ a ò a zĩkɛnapiↄnɛ: À gↄ̃ ń zàa'ĩnao la. Mapi ń ɛ̀waasonaɛ beeo wá gɛ́ aɛ kúlɛi Luaɛ, wí ɛa su wà á le la.

6 Ablahaũ sa'oyaa sɛ dì a nɛ́piɛ,‡ ↄ̃ a tɛ́kũa ń fɛ̃nao, aalɛ gɛ́ sãnu. 7 Ɔ̃ Izaaki ò a maeɛ à mɛ̀: Baa! Ɔ̃ a wèwà à mɛ̀: Bↄ́ ni nɛ́? Ɔ̃ nɛ́pi òɛ̀: Wá tɛ́ kũa ń yàao, sã pↄ́ wá sa'oò ku má ni? 8 Ɔ̃ Ablahaũ mɛ̀: Ma nɛ́, Lua mɛ́ a sa'osã kpá.§ Ɔ̃ aa tɛkↄ̃i, aalɛ gɛ́. 9 Kɛ́ aa kà gu pↄ́ Lua òɛ̀u, à sa'okĩi bò we, à yàakàa. Ɔ̃ à a nɛ́pi yè a dà yàapila sa'okĩi musu.* 10 Kɛ́ à fɛ̃ɛ sɛ̀, à ↄbↄ̀ à a nɛ́pi kòlokpa, 11 ↄ̃ Dii Malaika lɛzùaàzi za musu à mɛ̀: Ablahaũ! Ablahaũ! A wèwà à mɛ̀: Má kɛ́! 12 Ɔ̃ à mɛ̀: Ńsu ↄkã nɛ́piwao, ńsu yãe kɛɛ̀o. Má dↄ̃̀ sa kɛ́ ń ma vĩa vĩ, ni gimɛɛ ń n nɛ́ mɛ̀ndonaoo.† 13 Ablahaũ wɛzù, ↄ̃ à sãsakao è dↄa a kↄ́bawa kã́na guu. Ɔ̃ à gɛ kũ̀, à sa pↄ́ wì a pↄ́ kátɛu à tɛ́kũ òò a nɛ́ gbɛu. 14 Ɔ̃ à tↄkpà gupiɛ Diiakpa, ↄ̃ wìↄ o e ń a gbão wì mɛ: Dii a kpa a gbɛ̀sĩsĩ musu.‡

15 Dii Malaika ɛ̀a lɛzù Ablahaũzi za musu lↄ 16 à mɛ̀: Ma Dii ma lɛgbɛ̃̀ ń ma kuao§ ma mɛ̀, lá n yã́pi kɛ̀, ni gí ń n nɛ́ mɛ̀ndonaoo, 17 má báaadangu, mí n bui kã́fĩnɛ lán saanaↄwa, aaↄ dasi lán ísialɛ ũfãawa.* N buiↄ aaↄ iko vĩ ń ibɛɛↄwa. 18 Má báaada dṹnia bui píigu n bui sabai,† kɛ́ n ma yãmà yã́i.

19 Kɛ́ Ablahaũ ɛ̀a sù a zĩkɛnaↄwa, aa fɛ̀lɛ tà Bɛɛsɛba, ↄ̃ à gↄↄplakɛ̀ we.

20 Bee gbɛa wa ò Ablahaũɛ wà mɛ̀: N vĩ̀i Nakↄↄ na Milika nɛgↄ̃ɛↄ ì. 21 Aà nɛgↄ̃ɛ sɛ̃́ia tↄ́n Uzu. Aà dãunaↄ tↄ́n kɛ: Buzu, Alaũ de'ia Kɛmuɛ, 22 Kɛsɛdi, Azo, Pidasi, Yidafi, Bɛtuɛ. 23 Bɛtuɛpi mɛ́ Lɛbɛka ì. Nɛgↄ̃ɛ gbɛ̃ↄn swaaↄ̃ pↄ́ Milika ì ń Ablahaũ vĩ̀i Nakↄↄoↄn we. 24 Aà nↄ Lɛuma pↄ́ i mɛ́sɛdilɛɛ̀o nɛ́ↄ tↄ́n kɛ: Teba, Gaaũ, Taasu ń Maakao.

* 22:2 Mat 3.17 † 22:2 2Lad 3.1 ‡ 22:6 Zãa 19.17 § 22:8 Zãa 1.29 * 22:9 Ɛbɛ 11.17-19, Zaa 2.21 † 22:12 Lom 8.32 ‡ 22:14 Zãa 3.16 § 22:16 Ɛbɛ 6.13-14 * 22:17 Ɛbɛ 11.12 † 22:18 Zĩn 3.25