Bibeli Luayãtaalá Daalɛa 3

Gbɛ̃nazĩna kɛ̃akↄ̃wa ń Luao

1 Mlɛ̃* mɛ́ kↄ̃ni vĩ dɛ sɛ̃̀anↄbↄ pↄ́ Dii Lua kɛ̀ↄla píi, ↄ̃ à nↄɛ là à mɛ̀: Lua mɛ̀ ásu lupi líe bɛ bleoɛa? 2 Ɔ̃ nↄɛ wè mlɛ̃piwa: Wá fↄ̃ wà lupi libɛ ble, 3 ãma lí pↄ́ kú lupi guo, Lua mɛ̀ wásu wà a bɛ bleo, wásu ↄkãwà seo, kɛ́ wásu gao yã́i. 4 Ɔ̃ mlɛ̃ òɛ̀: Á ga seo!† 5 Lua dↄ̃ tó á blè, á wɛ́ a kɛ̃́, í gↄ̃ láawa, íↄ maa ń vãio dↄ̃.

6 Kɛ́ nↄɛ è lípi bɛ kɛfɛũ mɛ́ a blea aↄ na, a to gbɛ̃́ wɛ́ kɛ̃́, ↄ̃ à a bɛ bò a blè.‡ A kpà a zã́wa, ↄ̃ a blè sↄ̃.§ 7 An pla ḿpii an wɛ́ kɛ̃̀, ↄ̃ aa dↄ̃̀ sa kɛ́ wa ku puizi. Ɔ̃ aa goola lá nàmi aa nàńzi.

8 Kɛ́ gↄ̃ɛ ń a nao Dii Lua kĩ́i mà, àlɛ bɛbɛ luu oosiɛlɛ, ↄ̃ aa ùlɛɛ̀ lupi láu. 9 Ɔ̃ Dii Lua lɛzù gↄ̃ɛzi à mɛ̀: Ń kú má ni? 10 A wèwà à mɛ̀: Kɛ́ ma n kĩ́i mà, ↄ̃ vĩa ma kũ, kɛ́ má kú puizi yã́i, ↄ̃ ma ulɛ. 11 Ɔ̃ Dii Lua aà là à mɛ̀: Démɛ ònɛ ń kú puiziɛi? Lí pↄ́ ma ginɛ ǹ a bɛ ble, ń blè yã̀? 12 A wèwà à mɛ̀: Nↄɛ pↄ́ ń kpàa àↄ kumanↄ mɛ́ lípi bɛ kpàa, ↄ̃ má blè. 13 Ɔ̃ Dii Lua nↄɛ là à mɛ̀: Bↄ́yãi ń kɛ̀i màai? A wèwà à mɛ̀: Mlɛ̃ mɛ́ ma sãsã, ↄ̃ má blè.* 14 Ɔ̃ Dii Lua ò mlɛ̃ɛ:

Lá ń kɛ̀ màa, ńyↄ̃ↄ dɛ láaipↄ ũ

dɛ pↄtuoↄ ń sɛ̃̀anↄbↄↄla píi,

ńyↄ̃ↄ táa'o n gbɛɛwaɛ,

luutɛ̃ iↄ gɛ̃ n lɛ́u e n wɛ̃ni lɛ́u.

15 Mpi ń nↄɛo, má ĩ́ida á zãnguo,

n bui ń aà buio zãnguo.

Aà bui a n mi wí,†

mɛ́ ńyↄ̃ aà gbatoe kɛ'ĩa.

16 Ɔ̃ a ò nↄɛɛ:

Má n nↄsia taasi kã́fĩnɛ,

níↄ nɛ'i ń wãwão.‡

N zã́ ni aliↄ kumaɛ,

mɛ́ aↄ iko vĩmaɛ.

17 Ɔ̃ a ò gↄ̃ɛɛ:

Lá n n na yãmà,

n lí pↄ́ ma ginɛ ǹ a bɛ ble blè,

tↄↄlɛ a gↄ̃ láaipↄ ũ n yã́i,§

taasi guu ↄ̃ ńyↄ̃li blɛ eu e n wɛ̃ni lɛ́u.

18 Bua pↄ́ↄ ↄ̃ ńyↄ̃li ble,

ali lɛↄ ń lá ṹadeↄ bↄlɛnɛ.

19 Isimagakpaa guu ↄ̃ ńyↄ̃li blɛbleu,*

e ǹ ɛa ǹ gɛ̃ò tíu,

asa wekĩi ma n bↄu.

Bùsutin n ũ,

mɛ́ ńyↄ̃ ɛa gↄ̃ bùsutipi ũɛ.†

20 Adamu‡ tↄkpà a naɛ Ɛva,§ asa gbɛ̃́pii daziɛ. 21 Dii Lua báa ula kɛ̀ Adamuɛ ń a nao a dànɛ́. 22 Ɔ̃ à mɛ̀: Gbɛ̃nazĩna maa ń vãio dↄ̃̀ sa, à gↄ̃̀ láwáwa. Wà giɛ̀ aà lí wɛ̃nide bɛ bo ble, kɛ́ asu àↄ ku gↄↄpiio yã́i.* 23 Ɔ̃ Dii Lua aà yà à aà bↄ̀ Edɛni lupi guu. Ɔ̃ Adamu gɛ̀ tↄↄlɛ pↄ́ Lua aà kɛ̀ò zĩkɛ̀. 24 Kɛ́ Dii Lua aà yà, ↄ̃ à malaika gã̀sĩadeↄ kàlɛ Edɛni lupi gukpɛ oi, aaↄ lí wɛ̃nide zɛ́ dↄ̃́a ń fɛ̃nda pↄ́ lɛ́ liasãizↄ̃, a wɛ́tɛ̃ lɛ́ tɛkɛo.

* 3:1 Zia 12.9, 20.2 † 3:4 Zãa 8.44 ‡ 3:6 2Kln 11.3 § 3:6 Lom 5.12-21 * 3:13 2Kln 11.3, 1Tim 2.14 † 3:15 Lom 16.20, Zia 12.17 ‡ 3:16 1Tim 2.15 § 3:17 Lom 8.20 * 3:19 2Tɛs 3.12 † 3:19 Soũ 90.3 ‡ 3:20 Bee mɛ̀ gbɛ̃nazĩna. § 3:20 Bee mɛ̀ wɛ̃ni. * 3:22 Zia 22.14