3
1 Kɛ́ wá fↄ̃ mɛnakɛ lↄo, wa zɛò wà gↄ̃ Atɛni wátɛ̃ɛ,
2 wa wá gbɛ̃́ Timↄtee, wá Lua zĩkɛndee Kilisi baokpaa guu zĩ̀wá, kɛ́ aà á gba gbãa, i á nↄ̀sɛ níniɛ́ á luanaaikɛa guu,
3 kɛ́ gili su gɛ̃ á gbɛ̃egu ĩadamaɛ bee musuo. Á dↄ̃ ázĩawa, kɛ́ Lua bee taa dìlɛwɛ̃ɛ.
4 Gↄↄ pↄ́ wá kú á kĩ́i, wa dↄaa wá òɛ́ wa mɛ̀ wa gi ĩadaiwáo, ↄ̃ à kɛ̀ lá á dↄ̃wa màa.
5 Ayãmɛto lá má fↄ̃ mɛnakɛ lↄo, ma aà zĩ̀ á luanaaikɛa gwai. Gbɛ̃yↄ̃na á yↄ̃́, wá zĩkɛ̀ pã yã̀, wá dↄ̃o.
6 Ɔ̃ Timↄtee sùwá sa, à á luanaaikɛa ń á yeawázio baokpàwɛ̃ɛ. À mɛ̀ wá yã́ ìↄ dↄágu ń làasoo maao, mɛ́ álɛ wá bɛɛkɛ lá wálɛ á bɛɛkɛwa.
7 Ma gbɛ̃́ↄ, á luanaaikɛ Ayãmɛto wá nↄ̀sɛ nìni á yã́ musu wá ĩadama ń wá taasio píi guu.
8 Asa lá á zɛa gíũgiũ naa Diiwa guu, wá mɛ sù sa.
9 Wá fↄ̃ Lua sáaukpa á yã́ musu. Wa wá Lua sáaukpà maamaa ń pↄna zↄ̃ↄ pↄ́ wi kɛ aà aɛ á yã́io.
10 Gwãasĩna ń fãanɛo wiↄ wabikɛ Luawa maamaa, kɛ́ wà e wɛsikↄ̃lɛ, wí pↄ́ pↄ́ kɛ̃̀sã á luanaaikɛawa bↄↄlɛkɛɛ́.
11 Lua wá Mae ń wá Dii Yesuo zɛpoowɛ̃ɛ wà e mↄ́ á gwai.
12 Dii á yeakↄ̃i ń á yea gbɛ̃́piizio kã́fĩɛ́, i liála lá wá yeáziwa,
13 á sↄ̃ iↄ daa doũ gbãsĩsai, íↄ ku tàaesaideↄ ũ Lua wá Mae aɛ wá Dii Yesu mↄa ń a gbɛ̃́ↄ píi gↄↄzĩ.