2
1 Ń beeo Isailiↄ aaↄ dasi lán ísialɛ ũfãawaɛ, wa fↄ̃ ń lɛ́ dↄ̃o, wa fↄ̃ ń naoo. Gu pↄ́ má òunɛ́ ma gbɛ̃́ↄ no, we wa ń sísiu Lua bɛ̃́ɛ nɛ́ↄ.
2 Yudaↄ ń Isailiↄ kãaa ń lɛdoũo, aai dↄaana mɛ̀ndona dilɛ ń pↄ́ ũ. Aa bↄlɛ bùsu ń bùsuo, asa Yezɛlɛɛ gↄↄpi aↄ zↄ̃ↄɛ.
3 À o á gbɛ̃́ↄnɛ, gↄ̃ɛ ń nↄɛo, ma gbɛ̃́ↄn ń ũ, ma ń wɛgwà.
Isailiↄ dɛa Dii nↄ gbãsĩkɛna ũ
4 Isailiↄ, à zↄadↄ á dawa,
à zↄadↄwà,
asa ma nↄn aà ũ lↄo,
mɛ́ aà zã́n ma ũ lↄo.
Aà káaluakaa bↄ a wɛ́ɛ,
i mikɛ̃ gbãsĩkɛawa.
5 Tó màa no, má pↄ́ piliwàɛ,
i gↄ̃ puizi,
má tó aà gↄ̃ láilai,
lá wà aà ìwaɛ.
Má tó aà gↄ̃ gbáa ũɛ,
má aà li gugii ũɛ,
mí tó aà ga ń imio.
6 Má aà nɛ́ↄ wɛgwao,
asa gĩnasↄↄnɛↄnɛ.
7 An da dↄ́ɛ'ĩi kɛ̀,
ↄ̃ à ń nↄsì wisaikɛa guu.
À mɛ̀ á gɛ́ a gↄ̃pↄsɛↄwaɛ,
aai a gba pↄblea ń ío ń sãkão
ń bàabaao ń nísio ń vɛ̃ɛo.
8 Ayãmɛto má zɛdɛɛ̀ ń lɛo,
má gĩ liaaàzi,
kɛ́ asu tɛ a dàaio yã́i.
9 Tó à sù bↄ̀ pɛ̀lɛ a gↄ̃pↄsɛↄzi sↄ̃,
a ń leo,
a kpálɛkɛńzi, a ń eo,
i mɛ á ɛa ta a gↄ̃ sɛ̃́iawaɛ,
asa aà pↄ na yãa dɛ tiaa.
10 I dↄ̃ kɛ́ mámɛ ma pↄ́wɛna ń vɛ̃ɛo kpàwao.
Ma nísi ń ã́nusuo ń vuao nↄ̀nↄaaɛ̀,
ↄ̃ à a mↄaokɛ̀ Baaliwa.
11 A yã́i má ɛa mà a pↄ́wɛna síwà
ń ma vɛ̃ɛo a kɛkɛgↄↄ
ń sãkão ń bàabaa pↄ́ à a puizi ùlɛoo,
12 mí aà wisaikɛ kaɛ̀ a ↄzĩ
aà gↄ̃pↄsɛↄ wáa.
Gbɛ̃e a e à aà bↄ ma ↄzĩo.
13 Má aà pↄnakɛa midɛ píiɛ,
dikpɛ pↄ́ ì kɛ wɛ̃ ń wɛ̃o pↄ́ↄ
ń mↄ dafu pↄ́ↄ ń kã́mabogↄↄ pↄ́ↄ.
14 Má aà vɛ̃ɛliↄ ń aà kaadↄɛnliↄ dɛɛlɛɛ,
lí pↄ́ à mɛ̀ a gↄ̃pↄsɛↄ mɛ́ fĩabòòɛpiↄ,
mí tó gupi gↄ̃ tàaa ũ, sɛ̃̀anↄbↄↄ i ble.
15 Lá à tulaletikàtɛa tã́aↄnɛ,
à azĩa kɛ̀kɛ ń tãanaↄ ń nↄamblebↄↄ,
à pɛ̀lɛò a gↄ̃pↄsɛpiↄzi,
ↄ̃ ma yã́ sã̀aàgu,
yã́piↄ yã́i má aà wɛtãɛ.
Ma Dii mámɛ má ò.
16 Má tó Isailiↄ ma yã́zɛ e,
má gɛ́ńnↄ gbáauɛ,
mí ń nↄ̀sɛ níninɛ́.
17 We má ń vɛ̃ɛbuↄ sↄaaunɛ́,
mí Akoo guzulɛ kɛnɛ́ pↄ'ezɛ ũ.
Aa ma yãma lá aa mà ń wɛ̃́ndia gↄↄ,
gↄↄ pↄ́ aa bↄ̀ Egipi.
18 Ma Dii ma mɛ̀:
Gↄↄbeezĩ aa omɛɛ ń zã́,
aa omɛɛ Baali lↄo.
19 Má tã́aↄ tↄbↄ ń lɛ́u,
an tↄ́ aↄ dↄńgu lↄo.
20 Gↄↄ bee má yãdilɛ pↄ́ↄnɛ píi an yã́ musu,
sɛ̃̀anↄbↄↄ ń bãↄ ń pↄ́taa'onkuawaↄ.
Má sá ń fɛ̃ndao ń zĩo midɛ an bùsuu,
mí tó aaↄ ku we dↄdↄa.
21 Má á kɛ ma nↄ ũ e gↄↄpiiɛ,
má á kɛ ma nↄ ũ a zɛ́wa súsuɛ,
mí wɛ̃nadↄ̃ɛ́ gbɛ̃kɛ guu.
22 Má á kɛ ma nↄ ũ ń náaio,
íↄ ma dↄ̃ Dii ũ.
23 Ma Dii ma mɛ̀:
Gↄↄ bee má swãwɛ̃.
Má swã́sɛ musu yã́i,
musu i swã́sɛ tↄↄlɛ yã́i,
24 tↄↄlɛ i swã́sɛ pↄ́wɛna ń vɛ̃ɛo ń nísio yã́i,
aai swã́sɛ bui pↄ́ má tↄ̃̀ yã́i.
25 Má ń tↄ̃́ ń bùsuu mazĩa pↄ́ ũ.
Bui pↄ́ ma tↄkpàɛ̀ Wɛ́gwaakuopi,
má ń wɛgwa.
Bui pↄ́ ma tↄkpàɛ̀ Magbɛ̃ↄnopi,
má onɛ́ ma gbɛ̃́ↄ,
aai omɛɛ ń Lua.