21
Yã́ pↄ́ a Babɛli le
Gbáa pↄ́ pãa ísiai yã́.
Lá zàa'ĩana ì pã Nɛgɛvɛa,
màa wà bↄ̀ bùsu pↄ́ wa a vĩa vĩu,
wàlɛ pã guwaiwaia.
Wɛ́pungu pↄ́ má èpi yã́ pãsĩ.
Pↄkaalɛna lɛ́ pↄ́ kaalɛ,
zĩbↄnkpɛde lɛ́ bↄ ń kpɛ.
Elaũↄ, à lɛ́lɛmá!
Mɛdɛↄ, à koezↄ̃ńzi!
Yã́ pↄ́ má è tò ma lɛ́ gↄ̃̀ kpaaũa,
yã́ pↄ́ má mà ma da bíliu.
A wãwã ma kũ gbãa, àlɛ ma wó paa,
à fɛ̀lɛmanↄ lá nↄwãwã ì fɛlɛ nↄɛwawa.
Iwãa kà ma pↄa,
gili gɛ̃̀magu, málɛ lualua.
Oosi mɛ́ ma si,
ↄ̃ à mↄ̀mɛɛ ń kpakpanagaao.
Wàlɛ blɛkalɛ táabũnu musu,
wàlɛ pɛ kpálɛkpalɛ,
wàlɛ pↄble, wàlɛ imi.
Zĩgↄ̃ↄ gbɛ̃zↄ̃ↄↄ,
à fɛlɛ à á gↄ̃kɛbↄↄ sɛ́lɛ!
Yã́ pↄ́ Dii òmɛɛn kɛ:
Gɛ ǹ gbɛ̃́ dilɛ gugwakĩi,
pↄ́ pↄ́ a è i o.
Tó à sↄ̃́ↄ è kpaaĩa plapla,
aalɛ zĩkagoↄ gá
ń gbɛ̃́ↄ didia zàa'ĩnaↄ kpɛ ń yiongoↄ,
aàↄ kú ń laaio maamaa.
Ɔ̃ gugwanapi wiilɛ̀ à mɛ̀: Dii,
miↄ zɛ ma gugwakĩi lá gu lɛ́ dↄɛ,
miↄ ku ma limusudakĩi gwã́ ń gwã́o.
Gwa! Sↄ̃́ kpaaĩa plapla gode lɛ́ mↄ́.
Ɔ̃ godepi mɛ̀: À gà! Babɛli gà!*
A diiↄ kálɛa tↄↄlɛ wíwia.
10 Ma gbɛ̃́ pↄ́ wà á gbɛ̃́ lán pↄ́wɛnawaↄ,
ma yã́ pↄ́ má mà Dii Zĩgↄ̃de Isailiↄ Luawa òɛ́.
Yã́ pↄ́ a Ɛdↄũↄ le
11 Duma yã́.
Gbɛ̃e lɛ́ lɛzumazi za Sei à mɛ̀:
Gudↄ̃ana, gusia kà kpelewai?
Gudↄ̃ana, gusia kà kpelewai?
12 Ɔ̃ gudↄ̃ana òɛ̀: Gu lɛ́ mↄ́ dↄiɛ,
kási gu a gi àↄ siaɛ.
Tó ń ye yãlaɛ, la, ní ɛa su lↄ.
Yã́ pↄ́ a wi Laalubuↄ musu
13 Laalubuↄ yã́.
Á Dedã kyaama pↄ́ ì bòokpa Laalubuↄ bùsu likpɛnauↄ,
14 à gɛ́ dai imidɛnaↄlɛ ń ío.
Á gbɛ̃́ pↄ́ á kú Tema bùsuuↄ,
à gɛ́ dai lala'onaↄlɛ ń pↄbleao.
15 Asa aalɛ bàalɛ fɛ̃ndaɛɛ,
fɛ̃nda wɛ́tɛ̃ ń sákãao ń zĩ̀ pãsĩoɛ.
16 Dii òmɛɛ à mɛ̀: Wɛ̃̀ do lɛ́u lán gbɛ̀wina zĩgↄↄ lɛdilɛawa, Kedaaↄ gawi a láa. 17 Kedaa gↄ̃sa kadeↄ bↄ dasio. Dii Isailiↄ Lua mɛ́ ò.
* 21:9 Zia 14.8, 18.2