Bibeli Luayãtaalá Isaia 23

Yã́ pↄ́ a Tiideↄ le*

1 Tii yã́. Ísia gó'ilɛnadeↄ,

à ↄ́ↄlↄ, asa Tii gↄ̃̀ yàaaɛ,

kpɛ́e i gↄ̃ lↄo, godↄkĩi kú lↄo.

Sipi bùsudeↄ mɛ́ baopi kpànɛ́.

2 À kɛ kílikili ísialɛdeↄ

ń Sidↄ̃ laatana pↄ́ aa kã̀ ísiatagɛnaↄ musuↄ.

3 Bua pↄ́ kú Niili saɛ mɛ́ Tiideↄ pↄ'ekĩi ũ.

We aaì pↄ́wɛna lúluu wà buaò í zↄ̃ↄwa,

ↄ̃ Tii gↄ̃̀ buiↄ ɛlɛblekĩi ũ.

4 Sidↄ̃deↄ ń ísia gũgũna wɛ̃́lɛ bĩ́ideↄ,

á gɛɛ a gↄ̃ kpá á wɛ́iɛ, asa ísia mɛ̀:

Mi nↄwãwãkɛo, mi nɛ'io,

mi nɛgↄ̃ɛ gwao, mi nɛnↄɛ tòlokɛo.

5 Tó Egipiↄ Tiideↄ baopi mà,

aa bã̀abãabo.

6 À bua ta Taasisi,

à ↄ́ↄlↄ á ísialɛdeↄ!

7 Á wɛ̃́lɛ pↄnade pↄ́ kálɛa za zin weo lò?

Wɛ̃́lɛpi gbɛ̃eↄ mɛ́ fã̀aa

aa gɛ̀ zↄ̃̀lɛ bùsu zã̀zãↄuo lò?

8 Tiideↄ gbɛ̃́ↄ kpà kpalau yãa,

an laatanaↄá kíaↄnɛ,

an pↄyianaↄ tↄbↄ̀ dṹniau.

Démɛ dìlɛ yã́pi Tii lei?

9 Dii Zĩgↄ̃de mɛ́ dìlɛ

à ĩ́andãnapiↄ gawi kↄ'ɛ,

i gbɛ̃́ pↄ́ aa tↄbↄ̀ dṹniaupiↄ busa.

10 Taasisiↄ, à dagua lán Niili í paawa,

gbɛ̃e ku à kpáɛ́ lↄo.

11 Dii ↄlòo ísiaa,

a tò bùsu pↄ́ kú a saɛↄ lùalua.

À yãdìlɛ Kanaa bùsu yã́ musu,

à mɛ̀ wà a wɛ̃́lɛ bĩ́ideↄ dɛɛlɛ.

12 À mɛ̀: Sidↄ̃ wɛ̃́lɛ

pↄ́ gbɛ̃e i zĩblema yãao,

wà lɛ̀lɛma ń gbãao saɛ,

ńyↄ̃ e ĩ́anadã lↄo.

Tó a fɛlɛ bua íwa e Sipi bùsuu,

baa wekĩi á ĩ́ampakĩi eo.

13 À bùsupi gwa,

Babiloniↄ tò à gↄ̃̀ gbɛ̃gbonaↄ tòo ũ,

i kɛ Asiliↄ no.

Aa gbà lɛsĩ dà wa kpàaĩ ń a bĩ́iↄ,

aa a kpɛ́ maaↄ dɛ̀ɛlɛ,

gupi gↄ̃̀ yáiyai.

14 Ísia gó'ilɛnadeↄ, à ↄ́ↄlↄ,

asa á wɛ̃́lɛ gbãa gↄ̃̀ yàaaɛ.

15 Gↄↄ bee Tii yã́ a sã gbɛ̃́ↄgu wɛ̃̀ bàaↄ̃kwi lán kía wɛ̃̀ dasilɛwa. Tó wɛ̃̀ bàaↄ̃kwipi làa, lá wa ò lɛ pↄ́ wa dà ń káaluao guuwa, màa aↄ dɛ ń Tiio wà mɛ̀:

16 Káalua pↄ́ gbɛ̃e lɛ́ mↄma lↄo,

ǹ n mↄↄna sɛ da wɛ̃́lɛa.

Lɛ maamaa, ní lɛↄ siò dasidasi,

kɛ́ n yã́ e dↄ gbɛ̃́ↄgu yã́i.

17 Wɛ̃̀ bàaↄ̃kwipi gbɛa Dii a ɛa aɛdↄ Tiiwa. Tii a ɛa na a laataawa, i káaluaka ń dṹnia bùsuↄ píi. 18 Aà zĩa yíaa ài aↄ dɛ Dii pↄ́ ũɛ. Wa àipi dilɛo, wa ulɛo, aↄ dɛ Dii sìsinaↄ pↄ́ ũɛ, kɛ́ aa e pↄble maamaa, aai pↄkasa ↄdeↄ lú.