Bibeli Luayãtaalá Isaia 25

25

Dii sáaukpaa

1 Dii, ma Luan n ũ, má n kpɛla, má n tↄbↄ,

asa ń náai vĩ maamaaɛ,

n yãbↄnsaɛ pↄ́ n zɛò za zi kɛ̀.

2 N mɛɛwia kɛ̀ gbɛ̀zɛ ũ,

n wɛ̃́lɛ bĩ́ide dɛ̀ɛlɛ.

Buipãleↄ wɛ̃́lɛ bĩ́ide dɛ wɛ̃́lɛ ũ lↄo,

mɛ́ wa ɛa kálɛ bau lↄo.

3 Ayãmɛto bui gbãaↄ n kpɛla,

bui pãsĩↄ aaↄ n vĩa vĩ ń wɛ̃́lɛu.

4 Ń dɛ aafia'ekĩi ũ yɛ̃̀ɛɛsaideↄnɛ,

ń dɛ ulɛkĩi ũ wɛ̃nadeↄnɛ ń yooyeau.

Ń dɛ mikpakĩi ũ lou zã́,

ń dɛ uena ũ ĩatɛ̃ zã́,

asa gbɛ̃́ pãsĩↄ lɛ́'ĩana dɛ

lán lou gĩgbɛ̃awaɛ,

5 aa dɛ lán ĩatɛ̃ pusuwa guwaiwaiu.

Ni buipãlepiↄ zↄa midɛ,

lá lou ue ì ĩatɛ̃ pusu kpálɛwa.

Màa gbɛ̃́ pãsĩpiↄ kúkua ì zɛ kyↄ̃́!

6 Dii Zĩgↄ̃de a dikpɛ blɛ kɛ bui píiɛ

gbɛ̀sĩsĩɛ bee musu ń blɛ asaao

ń nↄ̀ↄ nísideo ń vɛ̃ɛ maa kↄↄsↄkɛao.

7 Gbɛ̀sĩsĩɛ bee musu ↄ̃

a sálana pↄ́ kú bui píi wɛ́a bãdɛ,

zwãa pↄ́ kú bùsu píi gbɛ̃́ↄlapi.

8 A ga midɛ, aↄ ku lↄo,*

a wɛ́'i gogo gbɛ̃́piiɛ,†

a wibↄ a gbɛ̃́ↄnɛ dṹnia guu píi.

Dii mɛ́ ò.

9 Gↄↄ bee wa mɛ: Wá Luan kɛ,

wa wɛdↄ̀aàzi, ↄ̃ à wá suabà.

Diin kɛ, wá wɛ́ dↄaàzi.

Wà pↄnakɛ wà yáalↄ,

kɛ́ à wá suabà yã́i.

10 Dii ↄ aↄ ku gbɛ̀sĩsĩɛ beea,

ãma a ↄ̃zↄ̃ Mↄabuↄwa,

lá wì ↄ̃zↄ̃ sɛ̃wa zùgbↄ̃uwa.

11 Aa ↄkɛ a guu

lá kpáa'ona ì íliwa.

Baa ń ń ↄkɛapio,

Dii a ń ĩ́andãa kↄ'ɛ.

12 A ń bĩ́i gbãa lɛsĩↄ gboo,

a pã́lɛ zĩ́lɛ à daaĩ ń bùsutio.

* 25:8 1Kln 15.54 † 25:8 Zia 7.17, 21.4