Bibeli Luayãtaalá Isaia 27

27

Isailiↄ suabaa

1 Gↄↄ bee Dii a ĩada kwãsawa,

mlɛ̃̀ kↄ̃̀nikↄ̃ni bàwãadepi,

ń a fɛ̃nda zↄ̃ↄ gbãa pãsĩo,

i ísia kwãsapi dɛ.

2 Gↄↄ bee á lɛsi vɛ̃ɛbu nɛ'ina yã́ musu.

3 Ma Dii miↄ dↄ̃́a,

miↄ íkawà gↄↄpii,

miↄ dↄ̃́a fãanɛ ń gwãasĩnao,

kɛ́ wasu ↄkãwào yã́iɛ.

4 Ma pↄ lí paaàzio.

Tó lɛaa ń lɛsikaoo bↄ̀lɛu yãa,

dↄ̃ ma gɛ lɛlɛmá

mà tɛsↄ̃má míↄ!

5 Sema aa ma sí ń ulɛkĩi ũ,

aai kɛmanↄ na,

ao, aai kɛmanↄ na.

6 Gↄↄewa Yakↄbu buiↄ zĩ́napɛlɛ,

Isailiↄ bↄlↄbↄ, aai vukɛ,

an libɛↄ i li dṹniaa.

7 Dii ń gbɛ̃́ lá à bui pↄ́ ń gbɛ̃́ↄ gbɛ̃̀wae?

Dii ń dɛdɛ lá à gbɛ̃́ pↄ́ ń dɛdɛↄ dɛ̀dɛwae?

8 Dii a yã́kpalɛkɛńnↄ,

i ń yá ń gbaɛ.

A bↄ ń a ĩ́an pãsĩo gukpɛ oi,

i ń sɛ́lɛ.

9 Bee a láka Yakↄbu buiↄ tàaeↄla.

An duunakɛ̃ama gbɛn kɛ:

Aa ń sa'okĩi gbɛↄ wíwi kɛ́lɛkɛlɛ,

mɛ́ aali pↄ́ wa pɛ̀ tã́a ũↄ

ń ń tulaletikatɛakĩiↄ zↄ̃zↄ̃ píi.

10 Wɛ̃́lɛ bĩ́ide gↄ̃̀ bɛzĩ ũ adoa,

a dɛ gu pↄ́ wà pãkpài ũ lán gbáa wáiwaiwa.

Wekĩi zuↄ ì pↄbleu, aai wúlɛu,

aai a líↄ suumpa.

11 Tó a gↄ̃naↄ gàga,

nↄɛↄ mↄ ɛ́'ɛ wa tɛ́kaò.

Wɛ̃́lɛpideↄ nↄ̀sɛ vĩo,

a yã́i tò an Kɛna a ń wɛ̃nagwao,

Lua pↄ́ ń ikàsa a sùuukɛńnↄo.

12 Gↄↄ bee Dii a a pↄ́wɛna gbɛ̃

za Uflata pↄ́ a í lí zↄ̃ɛoi

e à gɛ pɛ Egipi zɛ́ swawa,

i á Isailiↄ pɛɛlɛ dodo.

13 Gↄↄ bee wa kã̀ae zↄ̃ↄ pɛ́,

gbɛ̃́ pↄ́ vũ̀aa Asili bùsuuↄ

ń gbɛ̃́ pↄ́ lala'ò tà Egipi bùsuuↄ

aai ɛa su kúlɛ Diiɛ Yelusalɛũ

a gbɛ̀sĩsĩ pↄ́ a kua adoa musu.