Bibeli Luayãtaalá Isaia 3

3

Yãdaa Yelusalɛũdeↄ ń Yudaↄla

1 Gwa! Dii Lua Zĩgↄ̃de

a lípana pↄ́ Yelusalɛũdeↄ ń Yudaↄ lɛ́ gbãa'ewà gá,

a ń kũ̀sũa ń ń ío símá píi.

2 A ń nɛgↄ̃naↄ ń ń zĩgↄ̃ↄ símáɛ

ń ń dↄaanaↄ ń ń ãnabiↄ

ń ń màsokɛnaↄ ń ń gbɛ̃zↄ̃ↄↄ.

3 A ń sosa badeↄ ń ń gbãadeↄ símáɛ

ń ń lɛdamadeↄ ń ń ↄzĩkɛnaↄ

ń ń wɛɛlɛkɛnɛde kàsaaↄ.

4 A ɛ̀waasonaↄ kpánɛ́ kíaↄ ũ.

Gbɛ̃́ pↄ́ an yã́ ì gɛ́ ń kpɛo à su ń aɛoↄ mɛ́ aa dↄaanɛ́.

5 Wa kↄ̃ bↄ́ↄ'i mi,

gbɛ̃́ ń a gbɛ̃́o, gbɛ̃́ ń a gbɛ̃́deeo.

Ɛ̀waaso a gbɛ̃zↄ̃ↄ lele,

bɛɛɛsaide a zↄadↄ gawidewa.

6 Gbɛ̃́ a a dãuna kũ a mae bɛ, i oɛ̀:

Ń ula vĩ, kɛwɛ̃ɛ dↄaana ũ,

kaaũaɛ bee kɛkɛa gↄ̃̀ n yã́ ũɛ.

7 Zĩbeezĩ sa i pũna à mɛ:

Ma gɛ̃nɛ no.

Pↄblea ge pↄkasa ku ma bɛo,

ńsu ma kpa gbɛ̃́ↄnɛ kía ũo.

8 Yelusalɛũdeↄ lɛ́ fua,

Yudaↄ lɛ́ kɛ kɛ́lɛkɛlɛ.

An yã'oa ń ń yãkɛao bↄ̀ Dii kpɛ,

aa lɛ'ɛ̀ Dii gawidewa.

9 Wa ń tàae dↄ̃ ń wɛ́wa,

aaì ń duunakɛ gupuau lán Sↄdↄũdeↄwaɛ,

aali kpaguio.

Waiyoo ampiↄ, aa kìsia ì ńzĩaɛ.

10 À o gbɛ̃maaↄnɛ aaↄ ku aafia,

asa aa ń yãkɛaↄ gbɛ'e.

11 Waiyoo vãikɛnaↄ! Aa yã'e,

asa pↄ́ pↄ́ aa tↄ̃̀ mɛ́ a bↄlɛnɛ́.

12 Ɛ̀waasonaↄ lɛ́ ma gbɛ̃́ↄ wɛtã,

nↄɛↄ mɛ́ lɛ́ kiblemá.

Ma gbɛ̃́ↄ, á dↄaanaↄ mɛ́ lɛ́ á sãsã,

aalɛ á da zɛ́ vãiwa.

13 Dii mↄ̀ zↄ̃̀lɛ a gĩ́naa,

à fɛ̀lɛ lɛ́ yã́kpalɛkɛ ń gbɛ̃́ↄ.

14 Dii lɛ́ yãda a gbɛ̃́ gbɛ̃zↄ̃ↄↄ ń ń dↄaanaↄla à mɛ̀:

Ámɛ a ↄmàlɛ ma vɛ̃ɛbuu,

a taasideↄ pↄ́ↄ nàaa á kàlɛ á kpɛ́ↄu.

15 Démɛ á gbá zɛ́ à ma gbɛ̃́ↄ wíwi

à taasideↄ dɛ̃ↄnzↄ̃i?

Ma Dii Zĩgↄ̃de, mámɛ málɛ á la.

Yelusalɛũ nↄɛↄ

16 Dii mɛ̀, Siↄna nↄɛↄ yↄ̃̀ↄ vĩ,

aaìↄ bɛbɛ wàↄ ń waa bↄbↄ ń aɛ,

wàↄ wɛ́blaavu bilɛbilɛnɛ́,

aaìↄ táa'o mɛtɛɛmɛtɛɛ

ń zã̀ kↄ̃fĩdeↄ daa ń gbáwa.

17 A yã́i Dii a to Siↄna nↄɛↄ mi bↄkeleka,

a to an mi gbáa kɛ.

18 Zĩbeezĩ Dii a ń nↄamblebↄↄ wolomá,

zãdangbawaↄ ń falanaↄ ń ↄ̃nɛɛↄ

19 ń swã́liↄ ń zãↄ ń sálanaↄ

20 ń pↄ́kummusuↄ ń gã̀sĩgbɛↄ

ń seↄ ń tulaleↄ ń ɛsɛbaↄ

21 ń tãanaↄ ń tãana ní pↄ́ↄ

22 ń zwãaↄ ń pↄlↄgãuↄ

ń ula gbã̀aↄ ń kiopɛ̃naↄ

23 ń díiↄ ń pↄ́lɛ lɛɛnaↄ

ń tulu pↄ́ aaì diↄ ń gomusuↄ.

24 An gĩ na gbɛu, gĩ ĩ́i mɛ́ a gↄ̃ dↄ,

an se gbɛu, zↄ̀ ba mɛ́ aↄ dↄ ń pi.

An mitãa gbɛu, migbaa mɛ́ a gↄ̃,

an pↄkasaↄ gbɛu, zwã̀nkasa aaↄ yea,

an maa gbɛu, mↄ̀ wãa seela mɛ́ aↄ ku.

25 Wa á zã́ↄ dɛdɛ ń fɛ̃ndaoɛ,

wa á nɛgↄ̃naↄ dɛdɛ zĩ guuɛ.

26 Siↄnadeↄ wɛ̃nakɛ aa ↄ́ↄlↄ,

aa gↄ̃ kálɛa tↄↄlɛ ↄgii.