30
Yã́ pↄ́ a bui swã́gbãadeↄ le
1 Ma Dii ma mɛ̀:
Waiyoo nɛ́ swã́gbãadeↄ!
Aaì yã́ pↄ́ ma lɛ́ kú a guuoↄ yá,
aaì kↄ̃ yãma ń gbɛ̃́ↄ,
ma Nisĩnali dↄaanɛ́o,
aaì duuna kã́fĩ duunaa.
2 Aaì fɛlɛ gɛ́ Egipi, aali lɛzaao,
aaì na Falaↄ̃ↄzi ń mìsina ũ,
aaì mikpa Egipi uenai.
3 Kási naa Falaↄ̃ↄzi a widawá,
mikpaa Egipi uenai a á tↄ́ ↄ̃̀ↄkpa.
4 Baa kɛ́ á gbãadeↄ ku Zoã,
mɛ́ á zĩnaↄ kà Anɛsi,
5 wí a ń kṹ ḿpii bui àisaipi yã́i,
aa dↄnlɛ ge kã́fĩa e weo,
sema wí ń tↄ́ ĩ́io.
6 Nɛgɛvɛ nↄ̀bↄↄ yã́.
Wàlɛ guwaiwai pↄ́ yã'ĩa ń taasio vĩ baa vĩ,
nↄ̀ↄmusu saↄ ń nↄ̀ↄmusu daↄ
ń sↄ̀gbalaↄ ń mlɛ̃̀ pãsĩnaↄ di weɛ.
Zàa'ĩnaↄ ń àizɛɛↄ sɛ́sɛa,
yiongoↄ lɛ́ kↄ̃́ↄ ɛ́'ɛ ń ń pↄmaaↄ,
aalɛ gɛò bui àisaipiↄnɛ.
7 Aalɛ gɛò Egipi pↄ́ an dↄnlɛ gia
lán lɛ́'ĩana gbawaɛ.
A yã́i tò mi oɛ̀, Ílɛnↄbↄ zↄ̃ↄ pↄewonsai!
8 Dii mɛ̀ mà gɛ́ yã́pi kɛ̃́nɛ́ láu ge pↄ́ pɛpɛɛnawa,
iↄ dɛnɛ́ gↄↄ pↄ́ lɛ́ mↄ́pi seela ũ gↄↄpii.
9 Buipiá lualɛwɛnaↄnɛ,
nɛ́ sã́sãaↄnɛ,
aaliↄ ye swã́sɛa Dii ikoyãizio.
10 Aaì o gu'enaↄnɛ
aasu gu'e aai a yã'onɛ́ lↄo,
aaì o ãnabiↄnɛ
aasu yã́zɛde manɛ́ lↄo.
Aaì mɛ: À yã́ nana owɛ̃ɛ,
à ãnabikɛyã'òwɛ̃ɛ kpaanla.
11 À kɛ̃́ zɛ́piwa, à pã yãmaaa,
à Isailiↄ Lua pↄ́ a kua adoa gáwɛ̃ɛ zɛ́u.
Ayãmɛto Isailiↄ Lua pↄ́ a kua adoa yã́ɛ bee ò:
12 Lá a gi yã́pi mai,
a gbɛ̃́ↄ bↄ́ↄ'imia náaikɛ̀,
mɛ́ a zɛ ń kↄ̃nio,
13 Ayãmɛto duunapi aↄ dɛɛ́
lán gĩ̀ lɛsĩ paaa kↄ̃́ↄdↄa pↄ́ a kwɛ́ kpóokpoo kã́ndowa.
14 A wíwi kɛ́lɛkɛlɛ
lán lo pↄ́ oobona gotↄ̃̀wàwa.
Wa a kaso e a guu
kɛ́ à ká tɛ́sibↄ ge idãbↄ ũo.
15 Dii Isailiↄ Lua pↄ́ a kua adoa yã́ɛ bee ò:
Zↄ̃lɛa tɛɛɛ ń sↄ̃daadoũo mɛ́ a á bↄ,
laaikpalɛa niɛniɛ mɛ́ á gbãa ũ,
ↄ̃ i weio.
16 A mɛ̀: Beewa no!
Wá di sↄ̃́ kpɛ wà bàalɛɛ!
Á yã́ bee yã́i á bàalɛi sĩana.
A mɛ̀: Wá di sↄ̃ wãa kpɛ!
Á yã́ bee yã́i á gbɛ̀sɛlɛnaↄ wãa.
17 Tó á gbɛ̃ↄn ↄ̀aa sↄoↄ ń gbɛ̃́ mɛ̀ndo wɛpà,
á tílɛɛ.
Tó gbɛ̃ↄn sↄoɛ sa,
á lɛ́kↄ̃wa píiɛ.
Á gbɛ̃́ pↄ́ gↄ̃̀ↄ iↄ zɛ
lán lí pↄ́ pɛ́lɛ gbɛ musuwa,
lán dàlapoo pↄ́ kú sĩ̀sĩ musuwa.
18 Kási Dii lɛ́ á dã́ à e maakɛɛ́,
i fɛlɛ à á wɛ̃nagwa,
asa Dii Lua ì yãkɛ a zɛ́waɛ.
Báaaden gbɛ̃́ pↄ́ sↄ̃́a Diizi ũ.
Dii a a gbɛ̃́ↄ suaba
19 Á Siↄnadeↄ,
á gbɛ̃́ pↄ́ á kú Yelusalɛũↄ,
á ↄ́ↄlↄ bau lↄo.
Tó Dii á ↄↄlↄ mà, a gbɛ̃kɛkɛɛ́,
tó à á wii mà, a wewá.
20 Baa tó Dii taasi dàɛ́ á blɛ ũ,
mɛ́ à á dá wɛ́tɛ̃au á imia ũ,
á yãdanɛde aↄ ulɛaɛ́ lↄo,
á wɛsiaàlɛ.
21 Tó a pãalɛ ↄplaa oi ge zɛɛ oin nò,
á swã́lɛ yã́wa á kpɛ à ma,
wàlɛ mɛ: Zɛ́n kɛ, àↄ bɛu.
22 I gbasa á tã́a pↄ́ wà ã́nusu lɛ̀wàↄ
ń a pↄ́ pↄ́ wà vua lɛ̀wàↄ ↄ̃̀ↄkpa,
í ↄzↄ̃i lán bↄlↄwa,
í o pↄ́piↄnɛ: À gɛ́i!
23 A á gba lou pↄ́ pↄ́ álɛ tↄ̃́ bua yã́i,
tↄↄlɛ a blɛkɛɛ́ maamaa zìtiũ.
Gↄↄ bee á pↄtuoↄ sɛ̃ ble dã́dãkɛkĩi yàasau.
24 Zu ń zàa'ĩna pↄ́ aalɛ bua zĩkɛↄ
sɛ̃la búuna ń tàaa wisideo ble,
wa kálɛnɛ́ ń pɛ́ɛluo ge saa.
25 Gbɛ̃́ↄ dɛdɛa dasidasi gↄↄ,
tó pↄ́ lɛsĩ pↄ́ wa bòↄ kwɛ̀,
swa pↄ́ a í lí zↄ̃ɛo aↄ ku
gbɛ̀sĩsĩↄ ń sĩ̀sĩ lɛsĩↄ musu píi.
26 Tó Dii a gbɛ̃́ↄ gu'ĩaↄ kɛ̀kɛnɛ́,
mɛ́ à ń gbãgbã ń ĩa pↄ́ a kpàńzio,
mↄvua í aↄ gbãa lán ĩatɛ̃ gupuawa,
ĩatɛ̃ gupua a kã́fĩ lɛɛ sopla lán gↄↄ sopla gupuawa.
27 Dii bↄ̀ zã̀zã,
àlɛ mↄ́ luabɛsianau,
àlɛ pↄbↄ a níu,
aà lɛ́baa lɛ́ lua ń kpɛ̃nɛo,
aà lɛ́na dɛ tɛ́ pↄkaalɛna ũ.
28 Aà lɛ́'ĩana dɛ lán swa paa í
pↄ́ kà ń nↄɛ ísↄ̃wa.
Àlɛ buiↄ bobo ń tɛ̃mɛo à ń bãdɛ,
àlɛ ã̀asĩna kánɛ à ń sã́sã.
29 Ápiↄ sↄ̃ áↄ lɛsi,
lá álɛ dikpɛkɛ Diiɛ gwãasĩnawaɛ,
á pↄ a kɛ na,
lá álɛ Dii gbɛ̀sĩsĩkũ ń kulɛpɛao
álɛ gɛ́ Isailiↄ gbɛsi kĩ́iwa.
30 Dii a to gbɛ̃́ↄ a lↄↄ gawide ma,
a to aa a ↄ pↄ́ looańla e.
Àlɛ pila ń pↄkũma zↄ̃ↄo ń tɛ́lɛpiↄ pↄkaalɛnao
ń lou kwɛao ń zàa'ĩanao ń lougbɛo.
31 Dii lↄↄ a gili gɛ̃ Asiliↄgu,
a ń wíwi ń a gopanao.
32 A ń lɛ́ dodo ń go pↄ́ a dìlɛnɛ́o
ń gã̀a ↄ́o ń mↄↄna ↄ́o sãnu.
A zĩkańnↄ ↄzɛsai.
33 À dↄ̀aa tɛkà à gɛ̃̀gɛ̃ an kía pↄ́ ũ,
tɛ́pi kákĩi ɛ zã̀ a yàasa mɛ́ yàa mↄ̀wà.
Ĩatɛ̃gbↄ̃ tɛ́sɛa a bↄ Dii lɛ́u a lɛ́'ĩana ũ, i kũwà.