34
Yã́kpalɛkɛa ń dṹniao Ɛdↄũ
Bui ń buio à sↄ̃ kãi à yãma,
bùsu píi gbɛ̃́ↄ à swã́kpa,
dṹnia ń gbɛ̃́ pↄ́ kú a guuↄ à yãma,
tↄↄlɛ ń pↄ́ pↄ́ bↄ̀lɛwàↄ píi.
Asa Dii pↄ pà bui píizi,
à fɛ̃̀ ń ń zĩgↄ̃ↄ.
A ń dɛdɛ, i ń míↄnzↄ̃.
Wa gbɛ̃́ pↄ́ wà ń dɛdɛↄ kↄ́lɛ,
gbɛ̀sĩsĩↄ ń au mi, an gɛↄ gĩdↄ.
Saanaↄ yↄ musu píi,
luabɛ a koo lán pɛwa,
musupↄↄ wolo lán vɛ̃ɛlaↄwa,
aa kwɛ lán kaadↄɛnlaↄwa.
Dii fɛ̃nda gà ń auo musu.
Gwa! Àlɛ su Ɛdↄũwa yã́kpalɛkɛi,*
àlɛ mↄ́ pilai gbɛ̃́ pↄ́ àlɛ ń míↄnzↄ̃piↄwa.
Dii fɛ̃nda tã̀ ń ble ń são auo,
sãsa gòle nísi ìwà,
asa Dii sa'oa vĩ Bↄzɛla,
aà pↄ́ kòlokpakpaa dasi Ɛdↄũ.
An zùsɛ̃lɛↄ ń ń zuswanaↄ kwɛ́ńnↄ sãnu
ń ń gbãadeↄ píi,
an bùsu i ga ń auo,
nísi i i ń tↄↄlɛwa.
Asa Dii tↄsimagↄↄɛ,
aà ĩadama wɛ̃̀ɛ yã́sia ń Siↄnao yã́i.
Ɛdↄũ swaↄ li kↄtaa ũ,
a bùsuti a li ĩatɛ̃gbↄ̃ ũ,
an bùsu i gↄ̃ lán kↄtaa tɛ́wa.
10 Aↄ gaa vĩo fãanɛ ń gwãasĩnao,
a súɛlɛ aↄ dↄ gↄↄpiiɛ.
Wɛ̃ ń wɛ̃o aↄ da wáiwaiɛ,
gbɛ̃e a a baa vĩ lↄo.
11 Gáuↄ ń kpↄbↄ'ilɛnaↄ kɛ ń kúkĩi ũ,
koohũhũnaↄ ń gbagbaaↄ sakpɛda we.
Dii a guyↄ̃bↄ poowà, i gↄ̃ da pã,
a gwa ń gĩsusugwabao, i gↄ̃ gii.
12 Kía buiↄ ku wà ń kpá kpalau lↄo,
an dↄaanaↄ gɛ̃lɛ míↄ.
13 Kàelɛↄ ń lɛaaↄ kúlɛ ń kpɛ́ gbãaↄwa,
lɛsikao ń gàagaao a da ń zɛgikĩiↄla.
Aↄ dɛ gbɛ̃gbonaↄ tòo ũ, kooↄ bɛ ũ.
14 Àwalɛwanaↄ ń maiↄ kpaaũ we,
tã́aↄ fↄkpakpakↄ̃wa,
babayↄ̃ɛↄ zↄ̃lɛkĩi eu, aaↄ kálɛu.
15 Bãso a sakpɛ da we à gbedau,
a nɛpipi, i ń kãaa a zíɛ.
Yãamusuↄ kↄ̃ nↄnↄaau,
sa ìↄ tɛ a nai.
16 À wɛɛlɛ Dii taala guu,
à a kyokɛ,
an kee a kɛ̃́são,
a dae a kua a sawao,
asa aà lɛ́ mɛ́ ò,
aà Nisĩna mɛ́ a ń kãaa.
17 Ɔ̃mɛ ń baa kpàmá,
à ↄdↄ̀ ń baadeɛ a kúkĩiwa.
A gↄ̃ ń pↄ́ ũ gↄↄpii,
aaↄ ka a guu wɛ̃ ń wɛ̃o.
* 34:5 Isa 63.1, Mal 1.4 34:10 Zia 14.11, 19.3