Bibeli Luayãtaalá Isaia 41

Gbɛ̃́ pↄ́ Dii aà vù iu

1 Ísiabaadeↄ, à kɛ ma aɛ kílikili,

bui píi, à tó á gbãa àↄ kã́fĩ.

À sↄ̃mazi à yã'o,

wà kↄ̃ kãaa wà yã́gↄ̃gↄ̃.

2 Démɛ gukpɛ gbɛ̃́pi vù iu,

gu pↄ́ ì gɛ́u píi ì zĩblei?

Démɛ ì buiↄ naɛ̀ a ↄzĩ,

ì to aàↄ gbãable ń kíaↄwai?

Ì ń kɛ kɛ́lɛkɛlɛ ń a fɛ̃ndao,

ì ń fãaa ń a kaↄ

lán ĩ́ana sɛ̃pisa sɛ́lɛawa.

3 Ì ń yá à ń kpá, ì gɛ́ aɛ aafia

ń zɛ́ pↄ́ aà kɛ̀sɛ i pɛ́lɛu yãaoo.

4 Démɛ bee kɛ̀i? Démɛ mↄ̀òi?

Démɛ tò buiↄ ìↄ tɛtɛ kↄ̃ kpɛ za asĩnizĩi?

Ma Dii, mámɛ má Dↄaana ń Gↄ̃zãnao ũ.

5 Ísiabaadeↄ è, vĩa ń kṹ, aalɛ sↄ̃i,

tↄↄlɛlɛdeↄ lɛ́ mↄ́ ń lualuao.

6 Aalɛ dↄkↄ̃lɛ,

baade lɛ́ o a gbɛ̃́ɛ aà zɛ gbãa.

7 An sia ì mↄ̀kasana gba sↄ̃,

gbɛ̃́ pↄ́ lɛ́ mↄ gaɛ ń masanao

ì o gbɛ̃́ pↄ́ lɛ́ mↄlɛ éewaɛ:

N tã́a pɛɛpɛɛapi kɛ̀ maa,

ↄ̃ aaì pá ń kusao gíũgiũ,

kɛ́ asu lɛ́lɛo yã́i.

8 Ápiↄ sↄ̃ Isaili ma zↄ̀blenaↄ,

á Yakↄbu bui pↄ́ ma á sɛ́ↄ,

ápiↄ ma gbɛ̃na Ablahaũ buiↄ,*

9 ma á naaa za tↄↄlɛ lɛ́wa,

ma á sisi za dṹnia gola síiↄ̃wa,

má òɛ́ ma zↄ̀blenaↄn á ũ,

ma á sɛ́ mɛ́ mi á vũaao.

10 Ásu to vĩa á kũo, asa má kúánↄ,

ásu bílikɛo, asa á Luan ma ũ.

Má á gba gbãa, ao, má dↄálɛ,

ao, má á kṹ ń ma ↄplaa zĩ̀blenao.

11 Wí a gbɛ̃́ pↄ́ fɛ̃̀áziↄ kṹ,

á ibɛɛpiↄ gɛɛ a gↄ̃ kpá ń wɛ́i,

aa gↄ̃ pↄe ũo, aa midɛ.

12 Á á wɛ̀lɛpiↄ wɛɛlɛ kuamá,

gbɛ̃́ pↄ́ zĩkàánↄpiↄ gↄ̃ fooonnↄ.

13 Asa mámɛmaa Dii á Lua,

ma á kṹ á ↄplaawa má òɛ́,

ásu to vĩa á kũo, má dↄálɛ.

14 Á Yakↄbu bui kↄ̀ↄtɛ̃ↄ,

ásu to vĩa á kũo,

á Isaili pↄ́ gbɛ̃e lɛ́ á gwaoↄ,

má dↄálɛ.

Ma Dii Isailiↄ Lua pↄ́ ma kua adoa,

mapi á Bona mámɛ má ò.

15 Gwa! Má á kɛ gbáalakɛbↄ dafu swaa sↄ̃́nɛde ũ,

á gbɛ̀sĩsĩↄ gbáala kɛ à ń tibo,

á sĩ̀sĩↄ dɛ̃ↄnzↄ̃ à ń kɛ búlɛbulɛ.

16 Á ń fã́, ĩ́ana i ń sɛ́lɛ,

zàa'ĩana i ń fã́kↄ̃wa.

Á Isailiↄ, á pↄ a kɛ Diiwa na,

á ĩ́anadã ń á Lua pↄ́ a kua adoao.

17 Á taasideↄ ń á wɛ̃nadeↄ

aa kpálɛkɛ íi aa kuawa,

an kòlo a gaga ń imio.

Ma Dii má wemá,

ma Isailiↄ Lua má pãkpańzio.

18 Má nibↄnaↄ bↄ sĩ̀sĩ wáiwaiↄ musu,

má tó swa'iↄ bàalɛ guzulɛↄ guu,

má gbáa lilɛ dã̀na ũ,

tↄↄlɛ gii i gↄ̃ gu ide ũ.

19 Má sɛdɛ líↄ ba gbáau

ń lɛpusialiↄ ń gbɛ́liↄ ń kuliↄ,

má pɛ̃liↄ pɛ gugiiu

ń kpɛ̃liↄ ń sɛ̃́liↄ,

20 kɛ́ gbɛ̃́pii e, aai a wàaipa,

aai làasookɛwà aa dↄ̃

kɛ́ ma ↄ mɛ́ kɛ̀,

ma Isailiↄ Lua pↄ́ ma kua adoa,

mámɛ ma mↄò.

Dii tã́aↄ gbãasaikɛ kaanɛ́ ń ↄzĩ

21 Ma Dii ma mɛ̀,

à su ń á yã́o!

Ma Yakↄbu buiↄ Kía ma mɛ̀,

à á pↄ́ o wà ma!

22 À mↄ́ ń á tã́aↄ,

aa yã́ pↄ́ a mↄ o.

Aa yã́ pↄ́ kɛ̀ za ziↄ o,

wà làasookɛwà, wíↄ a midɛa dↄ̃.

Aa yã́ pↄ́ a mↄ zia o wà ma,

23 aa yã́ pↄ́ a kɛ gbɛzã o,

wí ń dↄ̃ diiↄ ũ sĩana!

Aa yãe kɛ, a maa ge a vãi,

kɛ́ vĩa e wá kṹ, wí kↄ̃ gwagwa.

24 Gwa! Pↄ́ giaↄn ń ũ,

pã sã̀ↄ ń yãkɛaↄwa.

Má ye gbɛ̃́ pↄ́ zɛ̀ńnↄ gĩyãio.

25 Ma gugbãntoo gbɛ̃e vù iu, àlɛ mↄ́,

ma aà sìsi za ĩatɛ̃ bilɛawa.

Ì ↄ̃zↄ̃ gbãadeↄwa lán bɛ̀lɛbↄawa,

lán oobona gĩtotoawa.

26 Démɛ yã́pi ò za asĩnizĩ wà e wàↄ dↄ̃i?

Démɛ ò za káau kɛ́ wà e o sĩanaɛi?

Á gbɛ̃e i a yã'oo, wi yãe mawáo,

á gbɛ̃e i dↄaa kã̀nɛ́ ń swã́wao.

27 Ma dↄaa ò Siↄnadeↄnɛ,

ma baonakpana zĩ̀ Yelusalɛũdeↄwa

ma mɛ̀: À gwa, aalɛ mↄ́!

28 Ma wɛpã̀ tã́apiↄla,

mi ń kee e a fↄ̃ lɛdaao.

Kɛ́ ma yãgbɛ̀amá,

an kee i yã́zãsiao.

29 Gwa! Ampii pↄ́ giaↄnɛ,

pã sã̀ↄ ń yãkɛawa.

Pↄ́ pↄ́ wa pìpiↄá ĩ́an giiↄnɛ.