Bibeli Luayãtaalá Isaia 6

Lua Isaia dilɛa ãnabi ũ

1 Wɛ̃ pↄ́ kí Uzia gà,* ma Dii è zↄ̃lɛa báawa musumusu, aà gomusu pↄ́ bã̀ɛ aà gbázĩ aà kpɛ́ pà. 2 Malaika gudↄ̃anaↄ ku aà mia, an baade gã̀sĩa soolosooloɛ. Aa a mɛ̀n plapla kù ń oaa, a mɛ̀n plapla sↄ̃ ń mɛwa, a plapla pↄ́ gↄ̃̀ↄ ↄ̃ aaì vuaò. 3 Aalɛ okↄ̃ɛ:

Kuaadoade, Kuaadoade, Kuaadoade Dii Zĩgↄ̃de!

Aà gawi dṹnia pà píi.†

4 Lua kpɛ́ kpɛɛlɛliↄ dèe tↄↄlɛu malaikapiↄ lↄↄ yã́i, ↄ̃ súɛlɛ kpɛ́pi pà.‡

5 Ɔ̃ ma mɛ̀: Yã́ gìaɛ sa, kɛgua, asa ma lɛ́ gbãlɛaɛ, mɛ́ gbɛ̃́ pↄ́ má kú ń guuↄ lɛ́ gbãlɛa, ↄ̃ ma wɛsì Kí Dii Zĩgↄ̃delɛ. 6 Ɔ̃ malaikapiↄ do tɛyↄ̃ sɛ̀ gbagbakĩi ń kpàoo, à vùa mↄ̀ò ma kĩ́i, 7 ↄ̃ a zↄ̃̀ ma lɛ́wa à mɛ̀: Lá à zↄ̃̀ n lɛ́wa, n tàae kɛ̃̀ma, wà lakà n duunaan we. 8 Ɔ̃ ma Dii lↄↄ mà à mɛ̀: Dé má zĩi? Démɛ a gɛ́wɛ̃ɛi? Ɔ̃ ma mɛ̀: Má kɛ́! Ma zĩ mɛ. 9 Ɔ̃ à mɛ̀:

Gɛ ǹ o gbɛ̃́ↄnɛ,

aa swã́kpa aaↄ gɛ́ yãemasai,

aa wɛ́tɛi aaↄ gɛ́ yãedↄ̃sai.

10 Ǹ ń wɛ́ dɛnɛ́ kɛ aasu gu'eo,

ǹ ń swã́ gbãakũnɛ́ kɛ́ yã́ su gɛ̃uo,

ǹ ń nↄ̀sɛ tatanɛ́ kɛ́ aasu yãe dↄ̃

aa ɛa sua, mí ń gbã́gbão yã́i.§

11 Ɔ̃ ma aà là: Aↄ dɛ màa e gↄↄ ũma ni, Dii? Ɔ̃ a wèa:

E gↄↄ pↄ́ an wɛ̃́lɛpiↄ kwɛ̀ wìliũ,

gbɛ̃e ku a guu lↄo,

mɛ́ wà ń bùsupi kàalɛ dɛ̃̀ↄↄ,

à gↄ̃̀ bɛzia ũ,

12 mɛ́ má tò wà tà ń a gbɛ̃́ↄ zã̀zã,

wà bùsupi tò da fↄ̃̀ↄↄ.

13 Baa tó an gbɛ̃́ↄ kwide gↄ̃̀ we,

wa ɛa ń tↄ̀lↄzↄ̃ lↄɛ.

Lá wì kpakpaa ge kpàkɛfↄ̃ↄↄli zↄ̃

a miↄna i vlãpa,

màa bui pↄ́ a kua adoa a gↄ̃ a miↄna ũ.

* 6:1 2Kia 15.7 † 6:3 Zia 4.8 ‡ 6:4 Zia 15.8 § 6:10 Maa 4.12, Zãa 12.40, Zĩn 28.26-27