60
Siↄna gawi zia
Fɛlɛ tɛkɛ, asa n gupua mↄ̀,
Dii gawi pìsima.
Gwa! Guluuluu kù dṹniaa,
gusia kùlɛ a gbɛ̃́ↄwa.
Mpi sↄ̃, Dii a bilɛma,
aà gawi i bↄma.
Buiↄ mↄ n gupuau,
kíaↄ sↄ̃ n pípia í gbãai.
Wɛzu gugwa ǹ liai,
aa kã̀aa píi, aalɛ mↄ́ n kĩ́i.
N nɛgↄ̃ɛↄ bↄ̀ za zã̀zã, aalɛ su,
wa n nɛnↄɛↄ naaa ń gbã̀tɛ̃ɛu, wàlɛ suńnↄ.
Tó n bee è, n pↄna a pisi n oawa,
n nↄ̀sɛ a yáalↄ kua nzĩa dakĩiwa.
Wa n gba ísia baa àizɛɛↄ,
wa mↄnɛ ń buiↄ pↄmaaↄ.
Yiongo waiↄ li n bùsua,
Madiã ń Efa bùsu yiongo nɛ́ bↄlↄↄ.
Seba bùsudeↄ mↄ píi
vua ń tulaleti gĩnanaↄ sɛa,
aalɛ ma yãkɛaↄ baokpa.
Wa Kedaa bùsu pↄtuoↄ kãaanɛ píi,
wa Nɛbaioↄ sãsaↄ kpama ǹ n bↄↄlɛkɛò,
wi sa pↄ́ ì kamagu oò ma gbagbakĩiwa,
mí a kpɛ́ gawide gawi kã́fĩò.
 
Bↄ́mɛ táa'ò lɛ́ su lán louwa,
lán felenguuluↄ sua ń kpɛ́uwa keei?
Ísiabaadeↄ lɛ́ kãaamazi we,
ísia gó'ilɛnaↄ mɛ́ zɛmikũa we.
Aa bↄ̀ ń n nɛ́ↄ za zã̀zã,
aalɛ mↄ́ ń ń ã́nusuↄ ń ń vuaↄ
ma Dii n Lua tↄbↄi,
asa ma Isailiↄ Lua ma kua adoaɛ,
má gawi pisima.
 
10 Buipãleↄ ɛa n bĩ́iↄ bo,
an kíaↄ zĩkɛnɛ.
Baa kɛ́ ma n gbɛ̃ ń pↄfɛ̃o yãa,
má wɛ̃nadↄ̃nɛ ma sùuu yã́i sa.
11 N bĩ́ibↄlɛↄ aaↄ wɛ̃aɛ gↄↄpii,
aaliↄ taao fãanɛ ń gwãasĩnao,
kɛ́ buiↄ mↄnɛ ń ń àizɛɛↄ
ń ń kíaↄ kpán'aɛkɛa.*
12 Asa bui ge kpala pↄ́ i zↄblenɛo a midɛɛ,
wa ń bùsuↄ dɛɛlɛmpa míↄmiↄ.
 
13 Wa mↄnɛ ń Libã bùsu gawio,
pɛ̃liↄ ń kpɛ̃liↄ ń sɛ̃́liↄ píi,
kɛ́ mà e zãbleò ma kúkĩiwa,
ma gbadibↄpi iↄ gawi vĩ.
14 N wɛtãna nɛ́ↄ mↄ kúlɛnɛ,
gbɛ̃́ pↄ́ aa sakàngupiↄ wúlɛnɛ n gbázĩ,
aai onɛ Dii wɛ̃́lɛ
Siↄna pↄ́ Isailiↄ Lua pↄ́ a kua adoa kàlɛ.
 
15 Baa kɛ́ gbɛ̃́ↄ zàngu yãa
aa pãkpànzi,
gbɛ̃eli gu baavĩ n guuo,
má n kɛ ĩ́andãbↄ láasai ũ,
gbɛ̃́ↄ iↄ pↄnakɛò e ń buiwa.
16 Ńyↄ̃ buiↄ vĩ mi,
an kíaↄ yↄ̃́ kpama,
níↄ dↄ̃ mámɛ máa Dii n Suabana ũ,
Yakↄbu Lua gbãade n Bona ũ.
17 Má mↄ́ ń vuao mↄgotɛ̃ gbɛu,
ã́nusu sↄ̃ mↄsi gbɛu.
Má mↄ́ ń mↄgotɛ̃oli gbɛu,
mↄsi sↄ̃ gbɛ gbɛu.
Má aafia dilɛnɛ n laaidↄmade ũ,
má yã́zɛde danɛ n gbãade ũ.
18 Wa yãpãsĩ súu ma n bùsuu lↄo,
ásoo ń músio a sↄ̃ n bùsu zↄ̃lɛio.
Wa tↄ́kpa n bĩ́iɛ Suaba,
n bↄlɛↄ sↄ̃ Táasi.
19 Ĩatɛ̃ ali gupunɛ fãanɛ lↄo,
mↄvua í gbãa a gupunɛ lↄo.
Ma Dii mámɛ máↄ dɛ n gupua ũ gↄↄpii,
mapi n Lua, mámɛ máↄ dɛ n tɛkɛa ũ.
20 N ĩatɛ̃ a gɛ̃ kpɛ́u bauo,
mɛ́ n mↄ a ↄsikɛo,
asa mámɛ máↄ dɛ n gupua láasai ũ,
n ↄↄlↄ a midɛ sa.
21 N gbɛ̃́ↄ aaↄ maa píiɛ,
mɛ́ aaↄ bùsu vĩ gↄↄpii.
Aaↄ dɛ lí pↄ́ má bà vlãpaa ũ,
ma ↄgbɛ ũ ma zãblea yã́i.
22 An gbɛ̃́ pↄ́ kɛ̃́sãańzi
a kↄ̃ à ka gbɛ̃ↄn ↄ̀aa sↄo,
an gbɛ̃́ pↄ́ kpɛɛ ń guu,
a gↄ̃ bui zↄ̃ↄ ũ.
Mámɛmaa Dii,
má yã́pi kɛ a gↄↄwa ń wãao.
* 60:11 Zia 21.25-26 60:14 Zia 3.9 60:19 Zia 21.23, 22.5