Bibeli Luayãtaalá Yobu 10

10

Ma dɛa yã́i Lua tò wà ma ii

1 Ma kpasa ń ma wɛ̃nio,

má yã́ pↄ́ má kũa o sa.

Pↄsia guu má yãbↄlɛ sa.

2 Má o Luaɛ: Ńsu yãdamalao.

Yã́ pↄ́ ń èa omɛɛ.

3 Gbãamↄa mapi n ↄgbɛɛ kàngu yã̀?

N bↄ ma kpɛ,

ↄ̃ n zɛ ń gbɛ̃vãiↄ lɛkpaaĩaoa?

4 Wá wɛ́ doũ yã̀?

Gudoũ ni e ń gbɛ̃nazĩnaoa?

5 N wɛ̃ni geseũ lán wá pↄ́wa yã̀?

N kua muaa ń wá gbɛ̃nazĩnaↄ yã̀?

6-7 Lá ń dↄ̃̀ tàaeden ma ũo,

mɛ́ gbɛ̃e ku aà ma bↄ n ↄzĩo,

a yã́i n kpálɛkɛ̀ ma yãvãiↄi,

n ma duuna tàasikàa?

8 N ma ikàsa ń nzĩa ↄo,

ↄ̃ ńyↄ̃ ɛa ǹ ma tↄ̀lↄzↄ̃ saa?

9 Kɛ́ n ma kɛ ń bɛ̀lɛo, a yã́ dↄngu.

Ńyↄ̃ ɛa ǹ ma kɛ bùsuti ũ lↄ yã̀?

10 Ni ma kása nↄ'itɛ̃na ũ lán vĩ'ipuwao lé?

Ni to ma i lán vĩ iawao lé?

11 N báa ń bàasio dàmala,

n ma wáↄ pɛ̀pɛkↄ̃wa ń kĩↄ.

12 N gbɛ̃kɛ guu n ma gba wɛ̃ni,

n ma dↄ̃a, n ↄkù ma nisĩnala.

13 Ma n làasoo dↄ̃̀ sa,

yã́ pↄ́ ulɛa n sↄ̃un kɛ:

14 Tó ma duunakɛ̀, niↄ wɛ́tɛmazi,

nili tó ma bↄ pã ma tàaeↄ yã́ musuo.

15 Waiyoo mapi, tó tàaeden ma ũ.

Baa tó ma yã́ na, má fↄ̃ mida íao,

asa wí ma kũ, taasi ma kũ gbãa.

16 Tó ma su midà ía,

ni lↄↄlɛmazi lán nↄ̀ↄmusuwa,

ní ɛa ǹ n gbãa bↄnsaɛ mↄmɛɛ.

17 Ní ma kpakↄ̃a ń seelade pãleↄ,

n pↄfɛ̃amazi i kã́fĩ,

ní tó yã'ĩa ma le mↄ̀ↄmↄↄ.

18 Bↄ́yãi n ma bↄ ma da gbɛɛui?

A maa yãa mà kɛsaiɛ,

kɛ́ gbɛ̃e su wɛsimalɛo.

19 A maa màↄ ku yãao.

A maa yãa ma bↄa nɛasakpɛu

wàↄ ma da mia'ɛu gↄ̃̀ↄɛ.

20 Gↄↄ yↄↄna pↄ́ gↄ̃̀mɛɛ a láa tia.

Gomala, ma pↄ e kɛ na, baa yↄↄ

21 e màↄ gɛ́ gɛ́i gɛ́kĩi,

gu pↄ́ gugɛ̃akↄ̃u ń gusiao kuu.

22 Gupi sì níinii lán gwã́wa,

pↄe ku we zɛ́zɛo,

wɛɛdo mɛ́ a fãanɛ ũ.