16
Má seelade vĩ luabɛ
Ɔ̃ Yobu mɛ̀:
Ma yã́ bee taa mà à dasikũ̀,
gbɛ̃nↄsɛnininaↄn á ũ wea?
Á zɛ á lɛ́'ĩanagbaaɛ bↄɛ ni?
Bↄ́ yã́ mɛ́ lɛ́ ↄ̃wá, ↄ̃ álɛ yã́zãsiai?
Tó ámɛ á kú ma kuawa yãa,
má yã'o lááwa sↄ̃ɛ,
mí á dɛ ń yã'oo,
mí a mi kɛɛ́ déũdeũ.
Kási ma yã́ a á gbãa kã́fĩɛ́ɛ,
ma lɛdama a á nↄ̀sɛ níniɛ́ɛ.
 
Tó málɛ yã'o, ma wãwã a láao,
tó má nílɛ sↄ̃, a kpálɛe?
Lua, ń tò ma gↄ̃ gbãasai sa,
n ma gbɛ̃́ↄ dɛ̃ↄnzↄ̃ píi.
Ń tò ma gↄ̃ yooyea seela ũ,
ma ibabaa gↄ̃̀mɛɛ seela bɛ̃̀ɛ ũ.
Lua ì fɛlɛmanↄ ń pↄfɛ̃o,
ì ma zↄ̃ɛzↄ̃ɛ,
ìↄ a swaa lↄlↄmɛɛkↄ̃wa,
ma ibɛɛpi ì wɛbiibiia.
10 Wì lɛ́'ɛ'ɛa, wì yãzↄ̃zↄ̃mɛɛ,
wì ma sãnkɛkɛ, wì fɛlɛmanↄ píi.
11 Lua ma na faasaideↄnɛ ń ↄzĩ,
à ma zu gbɛ̃vãiↄ ↄu.
12 Ma a kuanankɛ kílikiliɛ,
ↄ̃ à mↄ̀ yãyìaa.
À ma kũ ma waa kpɛ
à ma pã pↄ́wa,
à ma kɛ a pↄdɛa ũ.
13 Aà kàzunaↄ lìamazi,
à ma papaò ma pↄawa ma wɛ̃nagwasai,
ma sɛtɛ̃na wì, a í lɛ́ fã́ɛ tↄↄlɛ.
14 Ìↄ pũnaa ń pↄkũmao mↄ̀ↄmↄↄ,
ì sↄ̃́ daa lá nɛgↄ̃na ì kɛwa.
 
15 Ma zwã̀nkasaↄ nàminami má kàkamala,
ma a mi sↄ̀lↄ bùsuu.
16 Ma ↄ́ↄlↄ̀ e ma wɛ́ wò,
ma wɛ́ tà loũloũ.
17 Kási ma ↄ ku yãpãsĩe guuo,
mɛ́ ma wabikɛa Luawa mↄafili vĩo.
 
18 Bùsu, ńsu ka ma auao,
ma wii su kpálɛo.*
19 Baa tia má seelade vĩ luabɛ,
ma zɛnnↄde ku musu we.
20 Ma gbɛ̃napi mɛ́ ma kↄ́ↄ ũ
gↄↄ pↄ́ málɛ wɛ́'i bↄ Luaɛ.
21 A zɛmanↄ Lua aɛ,
lá gbɛ̃́ ì zɛ ń a gbɛ̃naowa.
22 Asa ma gɛa gɛ́kĩi wɛ̃ i gↄ̃ bílao,
gu pↄ́ wìli gɛ́u wà sù lↄopi.
* 16:18 Daa 4.10 16:19 Yob 19.25