29
Yobuá bɛɛɛdeɛ yãa
Yobu ɛ̀a pɛ̀ a yã́lɛ à mɛ̀:
Tó má e màↄ ku ma kua yãa
gↄↄ pↄ́ Lua lɛ́ ma dↄ̃́awa lé!
Gↄↄ bee aà filia ìↄ dia ma mi'aɛwaɛ,
ↄ̃ miↄ bɛ aa gupuau gwã́.
Gↄↄ bee má kú ma gↄↄ soplawa,
Lua gbɛ̃naↄn wá ũ ma ua.
Gↄↄ bee Gbãapiide kumanↄɛ,
ma nɛ́ↄ liaamazi.
Gↄↄ bee vĩ dimaziɛ,
mɛ́ ma gu gbɛde ku bↄ̀, nísi dìɛ.
 
Tó ma gɛ wɛ̃́lɛ bĩ́ibↄlɛu,
ge ma zↄ̃lɛkĩi kũ̀ gãaɛ,
tó málɛ mↄ́, ɛ̀waasoↄ ì gubↄmɛɛɛ,
maezↄ̃ↄↄ ì fɛlɛ aaↄ zɛaɛ.
Gbɛ̃zↄ̃ↄↄ ì kɛ kyↄ̃́,
aaì ↄku ń lɛ́wa.
10 Dↄaanaↄ yã'o ì busa,
an lɛ́ ì gↄ̃ kpaaũa.
 
11 Gbɛ̃́ pↄ́ swãsɛ̀ ma yã́i ì ma tↄnasi,
gbɛ̃́ pↄ́ wɛsìmalɛ ì ma sáaukpa.
12 Asa ma taaside pↄ́ wiilɛ̀ mìsi
ń tonɛo ń gbɛ̃́ pↄ́ ↄdamade vĩoo.
13 Gbɛ̃́ pↄ́ kú ga lɛ́zĩ samaa'òmɛɛ,
má tò gyaa gbɛ̃ando guladↄ̀a.
14 Ma yãkɛa a zɛ́wa dà pↄkasa ũ,
maakɛa dɛmɛɛ ulada ũ fùa ũ.
15 Vĩ̀aↄ wɛ́n ma ũ,
ɛɛↄ gbán ma ũ,
16 taaside maen ma ũ.
Kɛ́ wàlɛ yã́gↄ̃gↄ̃ ń nibↄo, ma lɛdau.
17 Ma faasaideↄ kãnkãnaↄ ɛ̀'ɛ,
ma gbɛ̃́ pↄ́ kpá aà lɛ́zĩ gà má bↄ̀.
 
18 Ɔ̃ ma mɛ̀ ma gↄↄ aↄ dasi lán ũfãawaɛ,
mí ga niɛ guu ma bɛ.
19 Ma zĩ́na a í le,
fíi iↄ kpa ma gↄ̃naↄwa gwã́.
20 Ma gawi aↄ diadiɛ,
ma sá iↄ naa ma ↄzĩ dafudafu.
 
21 Wì zɛ wà swãdↄ ma yã́i,
wì kɛ kílikili wà ma lɛdama ma.
22 Ma yã'oa gbɛa gbɛ̃e lí yã'o lↄo,
ma yã́ mɛ́ ì tↄ̃́má.
23 An wɛ́ ìↄ dↄmazi lá an wɛ́ ìↄ dↄ louziwa,
aaìↄ lua ma yã́i lá wìↄ lua káabuan louziwa.
24 Tó ma yamↄsɛkpàmá, ì bↄ ń saɛ,
ma oa weeama ì kɛnɛ́ na,
gbɛ̃e lí fↄ̃ tò ma oosìsio.
25 Ma zɛmikũ̀nɛ́,
má kú ń guu dↄaana ũ.
Má dɛ pↄsiadeↄ nↄ̀sɛninina ũ
lá kía ìↄ kú ń a ìwaↄwa.