34
Ɛlihu Yobu tàae'ea
Ɛlihu pɛ̀ a yã́lɛ à mɛ̀:
Á ↄ̃nↄnaↄ, à ma yãma!
Á yãdↄ̃naↄ, à swã́kpa à ma!
Asa swã́ ì yã́ dↄ̃kↄ̃ɛ,
lá lɛ́ ì blɛ dↄ̃kↄ̃ɛwaɛ.
Wà zɛ ń yã́zɛdeo,
wíↄ yãmaa dↄ̃ wá zãnguo.
 
Yobu lɛ́ mɛ á tàae vĩo,
ↄ̃ Lua lɛ́ gí a yãnakpáiwà.
À mɛ̀ ń a yã́ nao,
Lua lɛ́ a dilɛ ɛɛde ũɛ,
ń a tàaesaidekɛo a bↄá fↄ̃naɛ.
Démɛ kú lán Yobuwa
dↄ́ɛa ń Luao ìↄ dɛ aà imia ũi?
À gbɛ̃kpà ń duunkɛnaↄ,
à bɛ̀bɛ ń vãikɛnaↄ.
Asa ì mɛ̀
gbɛ̃́ wɛɛlɛa a yã́ ká Luagu ài vĩo.
 
10 Á nↄ̀sɛdeↄ, à ma yãma!
Yãdↄↄsai i kↄ̃'e ń Luaoo,
Gbãapiide lí yãvãikɛo.
11 Ì fĩabo baadeɛ a yãkɛawaɛ,
gbɛ̃́pii zĩa yã́ ↄ̃ ì wiɛ̀ a musu.*
12 Lua lí yãdↄↄsai kɛo fá!
Gbãapiide lí yã́zɛde fuangbao.
13 Démɛ aà dìlɛ dṹnia kía ũi?
Démɛ dṹnia bṹu nàɛ̀ aà ↄzĩi?
14 Tó à zɛ̀ò
à nisĩna ń ĩ́an wɛ̃nideo si baadewa,
15 gbɛ̃́pii a gaga gↄ̃̀ↄɛ,
gbɛ̃nazĩna i ɛa gɛ̃ tíu.
 
16 Yobu, tó n ↄ̃nↄ kà, yã́ɛ bee ma,
swã́sɛ ma yã́i.
17 Gbɛ̃́ pↄ́ ye yã́zɛdeio a kɛ dↄaana ũe?
Lua zↄ̃ↄ mɛ́ a maa, ↄ̃ ńyↄ̃ yãdaaàlaa?
18 Luapi ì o kíaↄnɛ, pↄ́ giaↄ,
ì o kíabuiↄnɛ, gbɛ̃vãiↄ.
19 Ìli kíaↄ dilɛ ńdoao,
ìli zɛ ń ↄdeↄ à bↄ̀ taasideↄ kpɛo,
asa ampiiá aà pↄkɛaↄnɛ.
20 Aaì gaga kã́ndo wɛɛdo,
aaì gbãsĩlɛ aa gɛ̃zɛa,
zɛdeↄ ì ã́nuato gbɛ̃nazĩna ↄ sai.
 
21 Lua ì wɛ́tɛ gbɛ̃nazĩnaↄ yãkɛai,
lá aalɛ gbásɛ, ìↄ e píiɛ.
22 Gusia ge gusisie ku
kɛ́ vãikɛna ulɛuɛ̀o.
23 Lua lí gbɛ̃́ lala yã́i
à gbasa yãdaaàlao.
24 Ì zɛdeↄ wíwi yã́gↄ̃gↄ̃ańnↄ sai,
ↄ̃ ì gbɛ̃pãleↄ dilɛ ń gbɛu.
25 Kɛ́ ìↄ ń yãkɛaↄ e yã́i,
ì ń fuangba gwãasĩna à ń wíwi.
26 Ì ń wɛtã ń vãi yã́i gupuau,
27 kɛ́ aa bↄ̀ aà yã́ kpɛ,
aai laaidↄ aà yã́wao yã́i.
28 Aa tò pↄesaideↄ wii Lua lè,
ↄ̃ à wɛ̃nadepiↄ wii mà.
 
29 Lua nílɛa kpɛ̃́, démɛ a fↄ̃ aà tàae ei?
À azĩa kpàgui, démɛ a bↄwài?
A iko vĩ bui píiwa ń baadeo,
30 kɛ́ luayãdansai su kpalable,
i kↄ̃nikɛ gbɛ̃́ↄnɛo yã́i.
31 Tó gbɛ̃́ ò Luaɛ tàaeden a ũ,
á yãdↄↄsai kɛ lↄo,
32 yã́ pↄ́ á dↄ̃o Lua dadaɛ,
tó a duunakɛ̀ yãaɛ, á kɛ lↄo.
33 Lua a ĩadawà yã̀?
N Lua tàae è, ń è kpelewa ni?
Lá ńlɛ e, o, n yã́ɛ, i kɛ mámɛo.
 
34 Nↄ̀sɛdeↄ òmɛɛ,
ↄ̃nↄna pↄ́ aa ma yãmàↄ mɛ̀,
35 Yobu lɛ́ yã́ pↄ́ á dↄ̃o o,
aà yã'oa dↄ̀ↄ vĩo.
36 Yobu ĩadama aↄ gɛɛ,
asa àlɛ yã́zãsi lán gbɛ̃vãiwaɛ.
37 Àlɛ tàae kã́fĩ duunaa,
àlɛ ↄtaalɛ wá guu,
àlɛ lɛnakasa Luaɛ.
* 34:11 Soũ 62.13