36
Wi taasikɛ wá bↄa maa yã́iɛ
Ɛlihu ɛ̀a pɛ̀ a yã́lɛ à mɛ̀:
Mɛnakɛ yↄↄ, mí ɛa onɛ
yã́ pↄ́ tò Lua yã́ mɛ́ kú.
Mí bↄnɛ ń ma dↄ̃a pↄ́ i bↄ kãioo,
mí yãnakpa ma Kɛnawa.
Ǹyↄ̃ dↄ̃ sã́asã kɛ́ ma yã́ ɛɛ vĩo,
ma ↄ̃nↄpaɛmade má kunnↄ.
 
Lua zↄ̃ↄ, kási ìli saka gbɛ̃eguo,
a zↄ̃ↄ, yã́ pↄ́ à zɛ̀ò lilɛa vĩo.
Ìli gbɛ̃vãi to aàↄ kuo,
ì yã́gↄ̃gↄ̃ wɛ̃nadeↄnɛ a zɛ́waɛ.
Aà wɛ́ lí go gbɛ̃maaↄwao,
ì ń kpá kpalau ń kíaↄ sãnu,
ì to aaↄ kible gↄↄpii, aai tↄbↄ.
Tó wà gbɛ̃́ↄ yèye ń mↄdaonaↄ,
tó wà wɛ́tɛ̃a ba kã̀nɛ́,
Lua ì yã́ pↄ́ aa kɛ̀ↄ onɛ́,
ↄ̃ aai dↄ̃ kɛ́ wà dↄ̀ɛwà, wà tàaekɛ̀ɛ̀.
10 Ì ń swã́ busanɛ́,
kɛ́ aa e yãma yã́i,
ì dilɛnɛ́ aa mikɛ̃ yãvãiwa.
11 Tó aa aà yãmà mɛ́ aa zↄblèɛ̀,
aa láa maa, aai ká ń gↄↄwa ń namao.
12 Tó aa gì mai,
wa ń dɛdɛ ń fɛ̃ndaoɛ,
aa kpagua dↄ̃a kɛ̃́sãma yã́i.
 
13 Luayãdansaiↄ ìↄ ĩ́ikũa ń sↄ̃u,
baa tó Lua ń yé ń mↄdaonaↄ,
aali awakpaɛ̀o.
14 Aaì ɛɛ wà gaga ń ɛ̀waasogↄↄ
lán gↄ̃ɛ káaluaↄ gaawa.
15 Lua ì to wɛ̃na gbɛ̃́ le kɛ́ à aà bↄ yã́iɛ,
ì to wà gbãamↄ gbɛ̃́ɛ, kɛ́ aà swã́ e busa.
 
16 Màa àlɛ n sisi à n bↄ n yooyeau,
i gɛnnↄ dɛ̀ɛpookĩi, ní gↄ̃ nzĩaɛ dↄdↄa,
n táabũnu aↄ fòona vĩo ń blɛ maaↄ.
17 Lua tàae'ea lán gbɛ̃vãiwa lɛ́ í sima,
n aà tàae è, ↄ̃ àlɛ n swãgaga.
18 Laaika kɛ́ àizɛɛ su n wɛ́ bleo,
ńsu to gbagusaɛ zↄ̃ↄ n làasoo liaao.
19 N wiilɛa a fↄ̃ n bↄ taasiue?
Baa ń dɛ̃ɛ sa pↄ́ ńlɛ kao píi.
20 Ńsu gwãasĩna nidɛo,
gbɛ̃nazĩna ã́nuatoa gↄↄpi.
21 Laaika zɛa ń vãioi,
asa wãwãpi n le kɛ́ ǹ kɛ̃ vãiwa yã́iɛ.
Lua mɛ́ gbãa vĩ
22 Lua dɛ pↄ́piia a gbãa yã́i.
Démɛ yãdanɛde ũ laaàwai?
23 Démɛ aà yãkɛaↄ zɛ́ kàlɛɛ̀i?
Démɛ a fↄ̃ oɛ̀ à vãikɛ̀i?
24 To aà zĩ maaboa àↄ dↄngu,
aà yã́ pↄ́ wà lɛdàò wì sipiↄ.
25 Gbɛ̃́pii wɛsì aà pↄkɛapiↄlɛ,
baade lɛ́ gwa kãaa.
26 Lua dɛ pↄ́piia,
aà zↄ̃ↄkɛ dɛ wá dↄ̃ala,
wa fↄ̃ wà aà wɛ̃ dↄdↄ wà a lɛ́ dↄ̃o.
 
27 Ì í pusu gálɛ suowa,
ↄ̃ ì to à ma lou ũ à ɛa ta swai.
28 Ì to lou sisi à kwɛ
à í zↄ̃ↄ bↄ gbɛ̃nazĩnaↄnɛ.
29 Démɛ lousisia daa gua yáasi dↄ̃i?
Démɛ aà kↄ̃fĩ gbãa bↄkĩi gbadↄ̃i?
30 Gwa! Ì to loupilɛa dagua,
a gupua ì kúlɛ ísiaa e títiu.
31 Ì kibleò bui píiwa,
ì blɛ kpaomá àↄ dińzi.
32 A loupilɛa naa a ↄzĩ,
ↄ̃ ì pↄ́ pↄ́ a yei aà suwà oɛ̀.
33 Aà kↄ̃fĩ ìↄ aà baokpa,
baa pↄtuoↄ ì dↄ̃ kɛ́ à kà kãi.