40
Gbɛ̃nazĩna lí fↄ̃ Lua bɛ̃̀ɛbòo
Ɔ̃ Dii ɛ̀a ò Yobuɛ:
Ma Gbãapiide,
ńyↄ̃ ma tàae e ǹ ma gba laaia?
Luabɛ̃ɛbona, yã́zãsia sa.
 
Ɔ̃ Yobu wèwà à mɛ̀:
Má pↄe ũo, kpelewa má wemai?
Sema mà ↄku ma lɛ́wa bàasio.
Ma yã'ò gɛ̃n doɛ, má ɛa o lↄo,
má ò gɛ̃n pla se, má a zã́si lↄo.
 
Ɔ̃ Dii ɛ̀a yã'ò Yobuɛ zàa'ĩana guu à mɛ̀:
Sↄukɛ lán gↄ̃sawa,
má yãlalama, ní wea.
Ńyↄ̃ láka ma yãkɛa a zɛ́waa yã̀?
Ń ye ǹ yã́'ĩikpaa, n yãna bↄ yã̀?
N gã̀sa gbãa kàmawaa?
N lↄↄ a fↄ̃ gu dee lamawaa?
10 Zↄ̃ↄkɛ ń kíakɛo da nↄamblebↄↄ ũ,
gawi ń bɛɛɛo da ulada ũ.
11 Ǹ n pↄfɛ̃bↄbↄmá,
waladeↄ gwa ń wɛpãsĩo, widamá.
12 Waladeↄ gwa ń wɛpãsĩo, ní ń lao,
ↄ̃zↄ̃má gu pↄ́ aa kuu,
13 ní ń vĩlɛ tɛ̃́ɛnau píi,
ní pↄ́ fĩ ń oawa miau,
14 mí gbasa mà n sáaukpa,
kɛ́ n fↄ̃ n zĩblè ń n ↄplaao yã́i.
Dalagↄ̃ↄ
15 Dalagↄ̃ↄ gwa,
mámɛ ma aà kɛ̀ lá ma n kɛwa.
Ì sɛ̃ ble lán zuwaɛ.
16 Aà yɛ̃̀ɛɛ ku aà wokpɛɛ,
aà gbãa ku aà kutɛlɛnawaɛ.
17 Ì a vlã́ poo lán sɛdɛ líwa,
aà gbala kĩ dɛ lán bataɛawaɛ.
18 Aà wáↄ dɛ lán mↄgotɛ̃wa,
aà mɛguↄ dɛ lán mↄ̀ gowa.
19 Aà zↄ̃ↄ mɛ́ dɛ pↄ́ bɛ̃́ɛ pↄ́ má kɛ̀ↄla,
mapi aà Kɛna ma fɛ̃nda kɛ̀ɛ̀.
20 Gbɛ̀sĩsĩↄ mɛ́ aà blɛ'ekĩi ũ,
we sɛ̃̀anↄbↄↄ ì kↄ̃̀ↄ'ou píi.
21 Ì wúlɛ íu kↄ̀lↄwɛɛ zíɛ,
ìↄ ye feeu dã̀na guu.
22 Kↄ̀lↄwɛɛ ue ì daaàla,
swagbalalaↄ ì kákaaàla.
23 Baa tó swa gbakàka, ìli leelekɛo,
tó Yuudɛ̃ isukaa lɛ́ aà lɛ́ lé, ìli deeo.
24 Ńlɛ e wa fↄ̃ wà aà wɛ́ wíwi, wi aà kũ nɛe?
Ńlɛ e wa e kↄ̃nikɛɛ̀, wi aà ní fↄ̃́ yã̀?
Kwãsa
25 Ńyↄ̃ fↄ̃ kwãsa kṹ ń kokoao ǹ gálɛ ǹ bↄòe?
Ńyↄ̃ fↄ̃ ba dↄ aà lɛ́nawae?
26 Ńyↄ̃ fↄ̃ bà lɛɛna ká aà níue?
Ńyↄ̃ fↄ̃ ǹ aà lɛtã zíɛ fↄ̃́ ń kúlaoe?
27 A awakpakpanɛe?
A yã́ nana onɛe?
28 A lɛdoũkɛnnↄ
ǹ a sɛ n zↄ ũ e a wɛ̃ni lɛ́u nɛe?
29 Ńyↄ̃ kↄ̃̀ↄ'oò lá wì o ń bãowae?
Ńyↄ̃ ba dↄwà ǹ kpa n nɛnↄɛnaↄwae?
30 Laatanaↄ kwãsapi tↄɛmáe?
Laayianaↄ aa aà tↄ̃nↄnakɛkↄ̃ɛe?
31 Ńyↄ̃ fↄ̃ ǹ aà pápa ń saao ǹ aà báa fↄ̃́e?
Ńyↄ̃ fↄ̃ ǹ aà mi kɛ yáiyai ń sↄ̃naoe?
32 Wɛɛlɛ ↄkãwà ǹ gwa!
Dɛ̃ɛpi a sãnguo,
ńyↄ̃ si a sìawa lↄo.