Bibeli Luayãtaalá Yobu 8

8

Baade ì a tàae gbɛ'eɛ

1 Ɔ̃ Sua gbɛ̃́ Bilidada yã́zãsìwà à mɛ̀:

2 Ńyↄ̃ↄ yã́ bee taa o e bↄɛ ni?

Ńlɛ yãbↄlɛ bùuu.

3 Lua ì yã́zɛde fuangbaa?

Gbãapiide ì yãmaa bãdɛa?

4 Lá n nɛ́ↄ duunakɛ̀ɛ̀,

a tò aa ń tàaeↄ gbɛ'è.

5 Tó n Lua kĩ́i wɛ̀ɛlɛ,

mɛ́ n sùuugbɛ̀a Gbãapiidepiwa,

6 tó ń gbãsĩ vĩo mɛ́ ń maa,

baa e tia a fɛlɛ n wɛ̃nagwa,

i n bɛ yã́ gↄ̃́gↄ̃nɛ a zɛ́wa.

7 N gwea káau a kɛnɛ pↄe ũo,

n gwea gbɛzã aↄ kã́fĩa vĩ maamaaɛ.

8 Gbɛ̃́ ziↄ la,

ní ↄ̃nↄ pↄ́ an deziↄ kpálɛkɛ̀i dↄ̃.

9 Asa nɛ́ zĩ́anaↄn wá ũ, wá yãe dↄ̃o,

wá kua dṹniau ì gɛ̃zɛa lán uenawaɛ.

10 Gbɛ̃́ zipiↄ yã́ a n wɛ́ kɛ̃o lé?

Aa ń nↄ̀sɛ guu yã'onɛ.

11 Kɛfu ì kɛ maa dã̀nasaie?

Fee ì zↄ̃ↄkũ isaia?

12 Tó wi zↄ̃o, baa ń a lá'isikɛo,

a lá ì giigaga àa dɛ sɛ̃ↄla píi.

13 Màa a dɛ ń gbɛ̃́ pↄ́ Lua yã́ sã̀aàguo,

beewa tãmaa a luayãdansai nɛ́.

14 Sↄuba nian do ↄ̃ ì a náaikɛ,

dã̀nsaba ↄ̃ ì gbãa'ewà.

15 Ì sↄ̃kpalɛ bapizi,

ↄ̃ bapi lí fↄ̃ aà kũ̀o.

Ì didi bapiwa, ↄ̃ bapi ì fua.

16 A gↄ̃naↄ ì dagua káau

lán lí pↄ́ ìↄ í vĩ ĩatɛ̃ gbãaiwa,

17 ↄ̃ a zĩ́naↄ ì fĩakↄ̃i gu gbɛdeu,

ì gɛ̃ gbɛↄu.

18 Tó wa ga wòlɛ a pɛ́kĩi,

gupi ì lelekpaaàzi à mɛ:

Má n dↄ̃ yãao.

19 Zɛ́ pↄ́ a sɛ̀pi pↄna lɛ́n we,

ↄ̃ pↄpãleↄ ì bↄlɛ tↄↄlɛpiwa.

20 Lua lí gí tàaesaidezio fá,

mɛ́ ìli vãikɛnaↄ gba gbãao.

21 A to ǹ yáalↄ tia,

ní kúkuakɛ.

22 A wida n zangudeↄwa,

gbɛ̃vãipiↄ bɛ a gↄ̃ bɛzia ũ.