Bibeli Luayãtaalá Dↄaanaↄ 5

Lɛ pↄ́ Debolaa dà

1 Zĩbeezĩ Debolaa ń Abinↄaũ nɛ́ Balakuo lɛɛ bee sì:

2 Kɛ́ Isaili dↄaanaↄ bↄ̀ dↄ̀aa,

gbɛ̃́ kĩniↄ tɛ́ńzi teasisai.

À Dii sáaukpa!

3 Kíaↄ, à yã́ɛ bee ma!

Gbãadeↄ, à swã́kpa!

Má lɛsi Dii yã́ musu,

má Dii Isailiↄ Lua táasilɛ.

4 Kɛ́ Dii bↄ̀ Sei gbɛ musu,

tↄↄlɛ lùalua,

kɛ́ àlɛ pã Ɛdↄũↄ bùsupia,

loupↄↄ fↄ̃̀, lou mà maamaa.

5 Gbɛ̀sĩsĩↄ dèedee Dii aɛ,

Isailiↄ Lua pↄ́ bↄ̀ mↄ̀má Sinaipi.*

6 Anata nɛ́ Samɛgaa gↄↄ, Yaeli gↄↄ,

gbɛ̃e lí zɛda sɛ lↄo,

zɛ́wɛwɛna ↄ̃ wɛ̃́lɛgɛna ì sɛ́.

7 Kíaↄ lɛ́ midɛ Isaili bùsuu,

ↄ̃ ma Debolaa ma gↄ̃ Isailiↄ da ũ.

8 Kɛ́ aa zɛ̀ ń dii dafuↄ,

ↄ̃ zĩ kↄ̃ kũ̀ wɛ̃́lɛ bĩ́ibↄlɛu.

Baa gbɛ̃ↄn ↄ̀aasↄsↄo lɛɛ bla (40.000) guu

gbɛ̃e sɛ̀ngbao ge sↄ̃na vĩo.

9 Ma pↄ dↄ Isailiↄ dↄaanaↄwa

ń gbɛ̃́ pↄ́ tɛ́ńzi teasisaiↄ.

À Dii sáaukpa!

10 Á gbɛ̃́ pↄ́ á di zàa'ĩn pua kpɛↄ

á gbɛ̃́ pↄ́ á zↄ̃lɛ tɛfɛniwapiↄ

ń á gbɛ̃́ pↄ́ á bɛ kɛ̀sɛↄ, à a yã'o.

11 Gbɛ̃́ pↄ́ kãaaa ítↄkĩiↄ zↄa dↄ,

aa Dii maakɛaↄ dàu lɛ́ siunɛ́,

Isailiↄ kíaↄ zĩblè,

ↄ̃ Dii gbɛ̃́ↄ sù ń wɛ̃́lɛↄ guu.

12 Fɛlɛ Debolaa! Fɛlɛ!

Fɛlɛ lɛsi! Fɛlɛ!

Abinↄaũ nɛ́ Balaku,

fɛlɛ dↄaa n zĩ̀zↄↄnɛ.

13 Ɔ̃ gbɛ̃́ pↄ́ gↄ̃̀ↄ bↄ̀ mↄ̀ kíaↄ kĩ́i,

Dii gbɛ̃́ↄ mↄ̀ ma kĩ́i ń nɛgↄ̃naↄ.

14 Ɛflaiũ bui pↄ́ aa Amalɛki buiↄ fùↄ

ń Bɛ̃yãmɛɛ buieↄ tɛnzi.

Makii buieↄ dɛ dↄaanaↄ ũ,

Zabulↄni buieↄ gopana kũa.

15 Isakaa bui kíaↄ kú ń Debolaao,

Isakaa buiↄ kú ń Balakuo,

aa sìaànↄ gusalalau.

Lubɛni bui gãliↄ seakɛ̀.

16 Àkɛa a gↄ̃ kĩnaↄ saɛ,

álɛ kulɛpɛa sãↄnɛ mai?

Lubɛni bui gãliↄ seakɛ̀ maamaaɛ.

17 Galada bùsudeↄ gↄ̃̀ Yuudɛ̃ baale.

Àkɛa Dã buiↄ zɛ̀ ń ń gó'ilɛnaↄi?

Asɛɛ buiↄ zↄ̃lɛ ísialɛ,

aa gↄ̃̀ ń godↄkĩiↄ.

18 Zabulↄni buiↄ fɛ̃na wò,

aa a kpɛ́ vũ̀aa,

Nɛfatali buiↄ kɛ̀ gulɛsĩↄu màa lↄ.

19 Kanaa bùsu kíaↄ mↄ̀,

aa zĩkà Taanaki Mɛgido swa saɛ,

kási aai àizɛɛ sɛ́lɛ tàòo.

20 Za musu saanaↄ zĩkà,

aa bↄ̀ ń zɛ́u, aa zĩkà ń Siselao.

21 Kisↄ̃ swa zipi tàńnↄ.

Má gɛ́ aɛ, mí gɛ́ ń gbãao.

22 Sↄ̃́ gbãaↄ lɛ́ bàalɛ,

an kɛ̀sɛ kↄ̃fĩ dↄ.

23 Dii Malaika mɛ̀: À Mɛlozu ká,

à lɛkɛ Mɛlozudeↄnɛ maamaa,

asa aai mↄ dↄ̀ Diilɛo,

aai dↄ Dii nɛgↄ̃naↄlɛo.

24 Nↄɛ báaaden Ɛbɛɛ na Yaeli ũ,

Keni bui nↄɛpi báaa vĩ zwã̀akpɛdeↄ guu.

25 Sisela í gbɛ̀awà,

ↄ̃ à vĩ kpàwà,

à vĩfãai kpàwà ta ↄde guu.

26 À ↄbↄ̀ zwã̀akpɛ kálo sɛ̀,

à masana kũ̀ ń a ↄplaao,

ↄ̃ à Sisela lɛ̀ò à aà mi wì,

à aà swãgɛ̃zĩ fↄ̃̀ à aà tↄ̀lↄzↄ̃̀.

27 Sisela gofanlɛ à lɛ̀lɛ aà gbá saɛ,

ↄ̃ à gↄ̃̀ wúlɛa we.

À gofanlɛ à lɛ̀lɛ aà gbá saɛ,

gu pↄ́ à gofanlɛ à lɛ̀lɛu, we à gàu.

28 Sisela da wɛkpàlɛ fɛnɛntiu,

à wiilɛ̀ fɛnɛnti mↄↄ fòou à mɛ̀:

Bↄ́yãi aà sↄ̃́go kpɛ́ e tiai?

Àkɛa aà gbɛ̃́ↄ sↄ̃́goↄ kↄ̃fĩ dↄo ni?

29 Aà nↄɛ zĩkɛna ↄ̃nↄnaↄ lɛ́ oɛ̀,

ↄ̃ a tɛ́ ń lɛgbɛi láasai à mɛ̀:

30 Aalɛ pↄ́ↄ naaaɛ,

aalɛ kpaalɛkↄ̃ɛɛ,

baade ń a wɛ̃́ndiao mɛ̀ndodo ge plapla.

Aalɛ zwã̀a wɛdeↄ naaa Siselaɛɛ,

zwã̀a wɛde wɛ̃̀sãdeↄnɛ,

pↄlↄgãu pↄ́ wà ba kɛ̃̀wàↄɛ.

31 Dii, to n ibɛɛↄ ga màa ḿpii,

gbɛ̃́ pↄ́ aa yenziↄ gbãa iↄ dɛdɛ

lán ĩatɛ̃ dɛdɛawa.

Ɔ̃ an bùsu gↄ̃̀ dↄdↄa e wɛ̃̀ bla.