11
Yudaↄ Dii bàakuańnↄ yãgbooa
Dii yã'ò Zelemiiɛ à mɛ̀: Swã́sɛ ma bàakuaánↄ yã́i, ní o Yelusalɛũdeↄnɛ ń Yudaↄ píi. 3-4 Onɛ́ ma Dii Isailiↄ Lua ma mɛ̀, ma bàakuańnↄ yã́ pↄ́ má dìlɛ ń deziↄnɛ gↄↄ pↄ́ ma ń bↄ́lɛ Egipiↄ tɛmↄanɛu, gbɛ̃́ pↄ́ yã́pi kũaoá láaipↄɛ. Má ònɛ́ aa ma yãma, aaↄ zĩkɛ yã́ pↄ́ má dìlɛnɛ́ↄwa, aaiↄ dɛ ma gbɛ̃́ↄ ũ, míↄ dɛ ń Lua ũ, mí lɛ́ pↄ́ má gbɛ̃̀ an deziↄnɛ papa. Ma mɛ̀ má bùsu pↄ́ vĩ ń zↄ́'io diu kpámá, lá à gↄ̃̀ á pↄ́ ũ gbãɛwa. Ɔ̃ ma mɛ̀: Ãmi, Dii!
Ɔ̃ Dii òmɛɛ: Gɛ ǹ kpàwakɛ Yuda wɛ̃́lɛↄ guu ń Yelusalɛũ gãaɛↄ ǹ onɛ́ aa swã́sɛ ma bàakuańnↄpi yã́i, aaↄ zĩkɛwà. Za gↄↄ pↄ́ ma bↄ ń á deziↄ Egipi e gbã, gↄↄpii miↄ lɛdamáɛ, mi mɛ aa ma yãma. Kási aali swã́sɛio, aali laaidↄwào, ↄ̃ an baade nↄ̀sɛvãi ń swã́gbãao dↄ̀aaɛ̀, ↄ̃ ma láaizĩ̀má ma bàakuańnↄ yã́ musu, asa ma a yãdìlɛnɛ́ɛ, ãma aa kũao.
Ɔ̃ Dii òmɛɛ: Yelusalɛũdeↄ ń Yudaↄ píi aa kú ń lɛkpaaĩamazioɛ. 10 Aa ɛ̀a sù ń dezi pↄ́ gì ma yãmaiↄ duunawa. Aa tɛ̀ tã́aↄzi aa zↄblènɛ́. Isailiↄ ń Yudaↄ píi, aa ma bàa kua ń ń deziↄ yã́ gbòo.
11 A yã́i tò ma Dii ma mɛ̀
má músi pↄ́ aa fↄ̃ bↄuo zĩmá.
Baa tó aa wiilɛ̀a,
má swã́sɛ ń yã́io.
12 Yelusalɛũdeↄ ń Yudaↄ píi
aa bↄlɛ gɛ wiilɛ tã́a pↄ́ aaì tulaletikanɛ́ tɛ́aↄwa.
Aa fↄ̃ ń suaba ń taasikɛgↄↄ sↄ̃o.
13 Á Yudaↄ,
á tã́aↄ dasi kà á wɛ̃́lɛↄwa,
tulaletikatɛakĩi pↄ́ á bò Baaliɛↄ
dasi kà Yelusalɛũ gãaɛↄwa.
14 Mpi sↄ̃ Zelemii,
ńsu wabikɛa gbɛ̃́piↄnɛo,
ńsu wiilɛanɛ́o,
ńsu yãgbɛaa ń yã́ musuo.
 
15 Ma gbɛ̃́ yenzideↄ lɛ́ lɛ́ vãi kpaaĩ,
bↄ aalɛ kɛ ma kpɛ́ guui?
Sa'onↄↄ pↄ́ aaì kpaa a ń sí ĩadamawao,
aaì pↄnakɛ ń vãi pↄ́ dↄ̀aanɛ́o.
16 Ma Dii mi oɛ́ yãa
kuli pↄ́ a lá sia mɛ́ a nɛ́ kɛfɛũ.
Má tɛsↄ̃wáɛ sa
ń zàa'ĩan gbãa kↄ̃fĩo,
á gↄ̃naↄ i golɛgolɛ.
 
17 Á Isailiↄ ń á Yudaↄ,
ma Dii Zĩgↄ̃de ma á báɛ,
kási yã́yiaawá ↄ̃ ma zɛò sa.
Ma za fɛ̃̀ vãi pↄ́ á kɛ̀ yã́i,
asa a tulaletikàtɛa Baaliɛɛ.
Lɛkpaaĩa Zelemiizi
18 Dii yã́ pↄ́ aalɛ kɛ ↄ̀lↄmɛɛ má dↄ̃̀, asa à ma wɛ́ kɛ̃̀mɛɛɛ. 19 Má dɛ yãa lán sãnɛbↄlↄ yãesaide pↄ́ wàlɛ gɛ́ a kòlokpaiwaɛ, mi dↄ̃ kɛ́ aalɛ lɛkpaaĩmazio. Aa mɛ̀ wà lizↄ̃ ń a nɛ́o wà aà bↄ dṹniau, kɛ́ aà tↄ́ su àↄ dↄ gbɛ̃egu lↄo yã́i.
20 Dii Zĩgↄ̃de,
asa ni yã́ gwa a zɛ́waɛ,
ni nↄ̀sɛ ń làasooo tàasika.
Tↄ símá mà gwa,
asa ma azĩa nànɛ n ↄzĩɛ.
 
21 Ayãmɛto ma Dii ma mɛ̀
Anato gbɛ̃́ pↄ́ aalɛ n wɛ aalɛ mɛ,
tó n ãnabikɛkɛ̀ ń ma tↄ́o,
ńyↄ̃ tá ń ń ↄoɛↄ,
má yãvĩ mà o ń musu.
22 Ma Dii Zĩgↄ̃de ma mɛ̀
má ĩadamá,
an ɛ̀waasoↄ gaga zĩlau,
an nɛ́ↄ gaga ń nↄanao,
23 an gbɛ̃́ kↄ̃nae a gↄ̃o,
asa má yã́yia Anatodeↄwa an ĩadamagↄↄɛ.