YOZUEE
Yã́ pↄ́ kú láɛ bee guuↄ
Yozuee lápi lɛ́ a bↄↄlɛkɛwɛ̃ɛ lá Mↄizi gɛ̃ɛ Yozuee dↄ̀aa Isailiↄnɛ, lá aa Kanaa bùsu sì ń lá wà bùsupi kpaalɛnɛ́ bui ń buio, aa zↄ̃̀lɛzↄ̃lɛu. Lápi kpaalɛa lɛɛ àaↄ̃ɛ ↄ̃n kɛ:
Kanaa bùsu sia (1-12)
Bùsupi kpaalɛa (13-21)
Yozuee yã́ gbɛzãↄ (22-24)
Kɛ́ Lua bùsu kpà a gbɛ̃́ↄwa, à lɛ́ pↄ́ a gbɛ̃̀ ń deziↄnɛ ń a pↄ́ pↄ́ a gbɛ̃̀ Mↄiziɛↄ pàpaɛ. Yãa Lua kua ń a gbɛ̃́ↄ guu, an Kanaa bùsu sia yã́ gbianɛ́, lá an bↄa Egipi bùsuu yã́ gbianɛ́wa. Lua mɛ́ zĩkà a gbɛ̃́ↄnɛ, ↄ̃mɛ tò aa zĩblè aa bↄ̀ aafia.
Bùsu pↄ́ aa zĩblèwàↄ ń bùsu pↄ́ gↄ̃̀ aa siↄ, a kpaalɛanɛ́ bui ń buio ua ń uao lɛ́ ↄlↄwɛ̃ɛ lá Lua ì laaidↄmá, asa a tò an baade azĩa tↄↄlɛ vĩɛ.
Kanaa bùsu sia ń a kpaalɛao dau siuawɛ̃ɛ guu wi dↄ̃ kɛ́ Lua náai vĩ, ì lɛ́ pↄ́ a gbɛ̃̀nɛ́ↄ papa, mɛ́ à kũ̀ aa ńzĩa kpawàɛ, aaliↄ aà yã́ kũa. Isailiↄ zↄ̃lɛa buipãle luadↄ̃nsaiↄ guuá kaiɛ, asa ì ń luanaaikɛa bãdɛɛ. Bee yã́i Yozuee fɛ̀lɛ zɛ̀ à Luabaakuańnↄ yã́ bↄↄlɛkɛ̀nɛ́ gↄↄ pↄ́ aa kãaaa Sikɛũ (24). À ń gbálaai maamaa, ↄ̃ gbɛ̃́ↄ zɛ̀o wà zↄble Diiɛ. A gbɛa Isailiↄ ń ń bùsuo yãziↄ dàalɛ. Za gↄↄ bee an ibɛɛ pↄ́ liaańziↄ ìↄ ye ń bùsupi símáɛ gↄↄpii. Isailiↄ sↄ̃, lá Lua mɛ́ ń gbá bùsupi mɛ́ aà bàa kúńnↄ, bee ↄ̃ ãnabiↄ ìↄ dↄńgu mↄ̀ↄmↄↄ. Sema aaↄ yã́ pↄ́ Luapi dìlɛnɛ́ↄ kũa.
1
Dii yãdilɛa Yozueeɛ
1 Dii zↄ̀blena Mↄizi gaa gbɛa Dii yã'ò Mↄizi zↄbãna Yozuee, Nuni nɛ́ɛ à mɛ̀:
2 Ma zↄ̀blena Mↄizi gà. Fɛlɛ bua Yuudɛ̃wa la sa, mpi ń Isailiↄ píi, í gɛ̃ bùsu pↄ́ má kpàwáu.
3 Gu pↄ́ á gbá pɛ̀lɛu píi, má kpàwá lá má ò Mↄiziɛwaɛ.
4 Sɛa za guwaiwaiu e gɛa Libã bùsuu, sɛa za swa zↄ̃ↄ pↄ́ wì mɛ Uflata e gɛa ísia pↄ́ kú bɛ'aɛ oi, Itiↄ bùsupi a gↄ̃ á bùsu ũ píiɛ.
5 E ǹ gɛ ǹ gaò gbɛ̃e a e n gã fĩo. Lá má kú ń Mↄizio, màa máↄ kunnↄ. Má n to weo, má pãkpanzi bauo.
6 Sↄ̃dilɛ, níↄ wↄ́ↄ vĩ, asa ḿmɛ ńyↄ̃ bùsu pↄ́ ma a lɛgbɛ̃̀ á dezi káauↄnɛ ma mɛ̀ má kpámá sí, ní kpá gbɛ̃́ɛ beeↄwa.
7 Sↄ̃dilɛ, níↄ wↄ́ↄ vĩ lé! Laaidↄ ikoyã pↄ́ ma zↄ̀blena Mↄizi dànɛwa, níↄ kũa píi. Ńsu kɛ̃wà ǹ na ↄplaai ge zɛɛ oio, n tá ali kɛ naɛ.
8 To Mↄizi ikoyã lápi yã́ àↄ dↄ ń lɛ́u, níↄ làasookɛwà fãanɛ ń gwãasĩnao. Laaidↄ yã́ pↄ́ kú a guuwa píi, ní zĩkɛwà, n tá iↄ na, n yã́ iↄ bↄ maa.
9 Mámɛ ma yãdìlɛnɛo lò? Sↄ̃dilɛ, níↄ wↄ́ↄ vĩ. Ńsu to vĩa n kũo. Ńsu to sↄ̃ kɛ̃nguo, asa ma Dii n Lua, máↄ kunnↄ gu pↄ́ ńlɛ gɛ́u píiɛ.
10 Ɔ̃ Yozuee ò Isaili dↄaanaↄnɛ à mɛ̀:
11 À bòo kɛɛlɛ, í o gbɛ̃́ↄnɛ aa kũ̀sũa sↄukɛ, asa gↄↄ àaↄ̃ gbɛa aa bua Yuudɛ̃wa la, aai gɛ́ bùsu pↄ́ Dii ń Lua kpàmá aaↄ vĩ síi.
12 Yozuee ò Lubɛni buiↄnɛ ń Gada buiↄ ń Manase buiↄ lɛɛ doo à mɛ̀:
13 À to yã́ pↄ́ Dii zↄ̀blena Mↄizi dìlɛɛ́ɛ bee dↄágu, à mɛ̀ Dii á Lua a to à kã́mabokĩi e, à bùsuɛ bee kpàwáɛ.
14 Ayãmɛto á nↄɛↄ ń á nɛ́fɛ̃nɛnaↄ ń á pↄtuoↄ gↄ̃ bùsu pↄ́ Mↄizi kpàwáu Yuudɛ̃ baala, á zĩgↄ̃ↄ i dↄaa bua á gbɛ̃́ↄnɛ ḿpii, aaiↄ ń gↄ̃kɛbↄↄ kũa, aai dↄńlɛ́
15 e Dii àↄ tó á gbɛ̃́ↄ kã́mabokĩi e lá a kɛ̀ɛ́wa, ampiↄ sↄ̃ aai gↄ̃ bùsu pↄ́ Dii á Lua lɛ́ kpámá vĩ. Bee gbɛa í su bùsu pↄ́ gↄ̃̀ á pↄ́ ũɛ beeu, í zↄ̃lɛ bùsu pↄ́ Dii zↄ̀blena Mↄizi kpàwá Yuudɛ̃ baala gukpɛ oipiu.
16 Ɔ̃ aa wèwà aa mɛ̀: Yã́ pↄ́ ń dìlɛwɛ̃ɛ píi wá kɛɛ. Gu pↄ́ n wá zĩ́u píi wá gɛɛ.
17 Lá wa zĩkɛ̀ Mↄizi yã́wa píi, màa wá zĩkɛ n yã́wa lↄ. Dii n Lua aàↄ kunnↄ, lá a kú ń Mↄiziowaɛ.
18 Gbɛ̃́ pↄ́ bↄ̀ n yã́ kpɛ à gì yã́ pↄ́ ń dìlɛɛ kɛi, à gàɛ. Sↄ̃dilɛ, níↄ wↄ́ↄ vĩ lé!