Bibeli Luayãtaalá Nɛɛmii 3

Yelusalɛũ bĩ́ibonaↄ

1 Sa'ona Ɛliasibu ń a gbɛ̃ sa'onaↄ ɛ̀a Sã Bↄlɛ bò. Aa a sakɛ̃̀, ↄ̃ aa a gbaↄ pɛ̀lɛpɛlɛ. Aa bĩ́i sakɛ̃̀ e za Basↄo Kalanga ń Ananɛli Kalangao. 2 An saɛ Yelikodeↄ bĩ́ibò. An saɛ Imɛli nɛ́ Zakuu bĩ́ibò. 3 Asenaa bɛdeↄ ɛ̀a Kpↄ̀ Bↄlɛ bò, aa a zaↄ dàda, aa a gbaↄ pɛ̀lɛpɛlɛ, aa a mↄↄ ń a gbã́aↄ dàu. 4 An saɛ Ulia nɛ́ Mɛlemↄ, Akozi tↄũna bĩ́i kɛ̀kɛ bò. Aà saɛ Bɛlɛkia nɛ́ Mɛsulaũ, Mɛsezabɛli tↄũna kɛ̀kɛ bò. Aà saɛ Baana nɛ́ Zadoki kɛ̀kɛ bò. 5 Aà saɛ Tekoadeↄ bĩ́i kɛ̀kɛ bò, kási an gbɛ̃zↄ̃ↄↄ gì zĩ gbãa pↄ́ dↄaana dànɛ́ kɛiɛ.

6 An saɛ Pasea nɛ́ Yoiada ń Besodia nɛ́ Mɛsulaũo Bↄlɛ Zi bò. Aa a zaↄ dàda aa a gbaↄ pɛ̀lɛpɛlɛ, aa a mↄↄ ń a gbã́aↄ dàu. 7 An saɛ Gabaↄ̃ↄ gbɛ̃́ Mɛlatia ń Mɛlↄnↄ gbɛ̃́ Yadↄ̃o bĩ́i kɛ̀kɛ bò ń Gabaↄ̃ↄdeↄ ń Mizipadeↄ e za Uflata baala dↄaana bɛ. 8 An saɛ Alaia nɛ́ Uziɛli pↄ́ ì vua zĩ kɛ bĩ́i kɛ̀kɛ bò. Aà saɛ tulalekɛna Anania kɛ̀kɛ bò e za bĩ́i yàasa kĩ́i. 9 Aà saɛ Hulu nɛ́ Lefaia, Yelusalɛũ kpɛdo kía, bĩ́i kɛ̀kɛ bò. 10 Aà saɛ Alumafa nɛ́ Yedaia bĩ́i pↄ́ bↄaa ń a bɛo kɛ̀kɛ bò. Aà saɛ Asabana nɛ́ Atusu kɛ̀kɛ bò. 11 Aliũ nɛ́ Malakia ń Paata Mↄabu nɛ́ Asubuo gupãle kɛ̀kɛ bò ń Kĩna Kalangao. 12 An saɛ Aloese nɛ́ Saluũ, Yelusalɛũ kpɛdo kía, bĩ́i kɛ̀kɛ bò sãnu ń a nɛnↄɛↄ. 13 Anuni ń Zanↄadeↄ Guzulɛ Bↄlɛ kɛ̀kɛ. Aa ɛ̀a bò aa a gbaↄ pɛ̀lɛpɛlɛ, aa a mↄↄ ń a gbã́aↄ dàu. Aa bĩ́i kɛ̀kɛ bò lↄ gã̀sĩsuu ↄ̀aa sↄo e à gɛ̀ pɛ̀ Pↄtuogbↄ̃ Bↄlɛwa. 14 Lekabu nɛ́ Malakia, Bɛtakɛlɛũ fã́ani kí, Pↄtuogbↄ̃ Bↄlɛ kɛ̀kɛ. À ɛ̀a bò, à a gbaↄ pɛ̀lɛpɛlɛ, à a mↄↄ ń a gbã́aↄ dàu. 15 Kↄloze nɛ́ Saluũ, Mizipa fã́ani kí, Nibↄna Bↄlɛ kɛ̀kɛ. À ɛ̀a bò a dↄ̀, à a gbaↄ pɛ̀lɛpɛlɛ, à a mↄↄ ń a gbã́aↄ dàu. À bĩ́i pↄ́ kú Siloe Íkalɛkĩi saɛ kɛ̀kɛ bò lↄ za kibɛ kaa saɛ e à gɛ̀ pɛ̀ Davidi Wɛ̃́lɛ dɛdɛkĩiwa. 16 A gbɛa Azebu nɛ́ Nɛɛmii, Bɛzuu fã́ani kpɛdo kí, bĩ́i kɛ̀kɛ bò e Davidi bɛ gɛvĩkĩi saɛ ń íkalɛkĩi pↄ́ wa yↄ̃̀o ń Nɛgↄ̃naↄ Kpɛ́o.

17 A gbɛa Bani nɛ́ Leuũ ń Levii buiↄ bĩ́i kɛ̀kɛ bò. A gbɛa Asabia, Kɛila fã́ani kpɛdo kí, a fã́ani bĩ́i kɛ̀kɛ bò. 18 A gbɛa Enada nɛ́ Bavai, Kɛila fã́ani kpɛdo kí, a fã́ani bĩ́i kɛ̀kɛ bò. 19 Aà saɛ Yesua nɛ́ Ezɛɛ, Mizipa kí, bĩ́i pↄ́ bↄaa ń gↄ̃kɛbↄkpɛo kɛ̀kɛ bò e bĩ́i golawa. 20 A gbɛa Zabai nɛ́ Baluku kↄaikɛ̀ à bĩ́i kɛ̀kɛ bò za golawa e à gɛ̀ pɛ̀ sa'onkia Ɛliasibu bɛ kpɛɛlɛwa. 21 A gbɛa Ulia nɛ́ Mɛlemↄ, Akozi tↄũna gupãle kɛ̀kɛ bò za Ɛliasibu bɛ kpɛɛlɛ e aà ua lɛ́wa.

22 A gbɛa sa'ona pↄ́ kãi ń Yelusalɛũↄ bĩ́i kɛ̀kɛ bò. 23 A gbɛa Bɛ̃yãmɛɛ ń Asubuo bĩ́i pↄ́ bↄaa ń ń bɛo kɛ̀kɛ bò. A gbɛa Maasea nɛ́ Azalia, Anania tↄũna bĩ́i pↄ́ kú a bɛ saɛ kɛ̀kɛ bò. 24 A gbɛa Enada nɛ́ Binui gupãle kɛ̀kɛ bò za Azalia bɛ e à gɛ̀ pɛ̀ bĩ́i golawa. 25 Uzai nɛ́ Palala bĩ́i kɛ̀kɛ bò za golawa e kalanga pↄ́ bↄaa ń kibɛo dakpɛunaↄ ua saɛ. A gbɛa Palↄsi nɛ́ Pedaia 26 ń Lua ua zĩkɛna pↄ́ kú Ofɛli sĩ̀sĩ musuↄ bĩ́i kɛ̀kɛ bò Í Bↄlɛ kpɛɛlɛ gukpɛ oi e à gɛ̀ pɛ̀ kalangapiwa.

27 A gbɛa Tekoadeↄ bĩ́i kɛ̀kɛ bò za kalanga zↄ̃ↄpi saɛ e sĩ̀sĩpi bĩ́iwa. 28 Sa'onaↄ bĩ́i pↄ́ kú Sↄ̃́ Bↄlɛ saɛ kɛ̀kɛ bò, baade ń bĩ́i pↄ́ kú a bɛ saɛo. 29 A gbɛa Imɛɛ nɛ́ Zadoki bĩ́i pↄ́ kú a bɛ saɛ kɛ̀kɛ bò. A gbɛa Sekania nɛ́ Semaia pↄ́ dɛ Gukpɛ Bↄlɛ dↄ̃̀ana ũ bĩ́i kɛ̀kɛ bò. 30 A gbɛa Selemia nɛ́ Anania ń Zalafa nɛgↄ̃ɛ soolode Anunio gupãle kɛ̀kɛ bò. A gbɛa Bɛlɛkia nɛ́ Mɛsulaũ bĩ́i pↄ́ kú a kpɛ́ saɛ kɛ̀kɛ bò. 31 A gbɛa vuazĩkɛna Malakia bĩ́i kɛ̀kɛ bò e Lua ua zĩkɛnaↄ ń laatanaↄ bɛ Mifɛka Bↄlɛ saɛ e à gɛ̀ pɛ̀ kpɛ́ pↄ́ kú bĩ́i golawa. 32 Vuazĩkɛnaↄ ń laatanaↄ mɛ́ bĩ́i kɛ̀kɛ bò kpɛ́ pↄ́ kú bĩ́i golawa ń Sã Bↄlɛo zãnguo.

Íbɛlɛsɛa ń Yelusalɛũ bĩ́ibonaↄ

33 Kɛ́ Sambala mà wá Yudaↄ wálɛ Yelusalɛũ bĩ́i bo, aà pↄ pà, aà za fɛ̃̀ maamaa, ↄ̃ àlɛ wá awiambↄ. 34 A ò a gbɛ̃́ↄ ń Samali zĩgↄ̃ↄ wáa à mɛ̀: Bↄ́ Yuda gianapiↄ lɛ́ kɛɛɛɛ? Aa fↄ̃ ɛa bĩ́ipi boe? Aa sa'o aai zĩpi nɛ gↄↄ do nia? Aa fↄ̃ wɛ̃́lɛpi vu ń gbɛ pↄ́ tɛkũ̀ à dàaĩpiↄe? 35 Amↄni bui Tobia ku aà saɛ, ↄ̃ à mɛ̀: Bĩ́i pↄ́ aalɛ bopi, tó gbɛ̃gbona dɛ̀dɛwà, a gbɛↄ gbooɛ fá!

36 Ɔ̃ ma mɛ̀: Wá Lua, wá yãma, asa aa nifɛ̃̀wáziɛ. Tó wá awiana pↄ́ aalɛ bↄ wi ń musu. To wà ń kṹkũ wà táńnↄ zĩ̀zↄↄ ũ. 37 Ńsu láka ń tàaeↄlao. Ńsu ǹ ń duuna bãdɛo, asa aa bĩ́ibonaↄ sↄ̃̀sↄ̃ɛ. 38 Màa wa bĩ́ipi bò e à pɛ̀kↄ̃wa mɛ́ a lɛsĩ kà guo, asa gbɛ̃́ↄ lɛ́ zĩpi kɛ ń nↄ̀sɛmɛndooɛ.