Bibeli Luayãtaalá Naokɛa 2

Bòokpaa zɛ́kalɛa

1 Dii yã'ò Mↄiziɛ ń Aalonao à mɛ̀: 2 Isailiↄ baade lí bòokpa a dàlapoo gbáu ń a ua seelao pɛ́lɛa. Aali bòokpa wà lia kpaaũkpɛi kɛ̃awà yↄↄ.

3 Yuda bui gãliↄ mɛ́ aali bòokpa gukpɛ oi ń ń dàlapooo. An dↄaanan Aminadabu nɛ́ Naasↄ̃ ũ. 4 Aà zĩgↄ̃ↄ gbɛ̃ↄn ↄ̀aasↄsↄo lɛɛ bàaↄ̃kwi ń síiↄ̃o ń ↄ̀aa àaↄ̃oɛ (74.600). 5 Isakaa bui gãliↄ lí bòokpa ń saɛ. An dↄaanan Zuaa nɛ́ Nɛtanɛli ũ. 6 Aà zĩgↄ̃ↄ gbɛ̃ↄn ↄ̀aasↄsↄo lɛɛ blakwi ń síiↄ̃o ń ↄ̀aa plaoɛ (54.400). 7 An saɛ Zabulↄni buiↄ. An dↄaanan Heloni nɛ́ Ɛliabu ũ. 8 Aà zĩgↄ̃ↄ gbɛ̃ↄn ↄ̀aasↄsↄo lɛɛ blakwi ń soplao ń ↄ̀aa plaoɛ (57.400). 9 Ampii an bòo wì mɛ Yuda buiↄ bòo, aa gbɛ̃ↄn ↄ̀aasↄsↄo lɛɛ ↄ̀aa do, gɛ̃o mɛ̀ndosai mɛ́ kuo, ń ↄ̀aa plaoɛ. (186.400) Aamɛ aali dazɛu káau.

10 Lubɛni bui gãliↄ mɛ́ aali bòokpa gɛↄmidↄkĩi oi ń ń dàlapooo. An dↄaanan Sedeu nɛ́ Ɛlizuu ũ. 11 Aà zĩgↄ̃ↄ gbɛ̃ↄn ↄ̀aasↄsↄo lɛɛ blakwi ń sooloo ń ↄ̀aa pla ń basↄooɛ (46.500). 12 Simɛↄ buiↄ lí bòokpa ń saɛ. An dↄaanan Zulisadai nɛ́ Selumiɛ ũ. 13 Aà zĩgↄ̃ↄ gbɛ̃ↄn ↄ̀aasↄsↄo lɛɛ bàaↄ̃ mɛ̀ndosai ń ↄ̀aa do ń basↄooɛ (59.300). 14 An saɛ Gada buiↄ. An dↄaanan Deuɛli nɛ́ Ɛliasafa ũ. 15 Aà zĩgↄ̃ↄ gbɛ̃ↄn ↄ̀aasↄsↄo lɛɛ blasↄo ń ↄ̀aa àaↄ̃ ń blakwioɛ (45.650). 16 Ampii an bòo wì mɛ Lubɛni buiↄ bòo, aa gbɛ̃ↄn ↄ̀aasↄsↄo lɛɛ basoplakwi ń mɛ̀ndoo ń ↄ̀aa pla ń blakwioɛ (151.450). Aamɛ aali dazɛu plaade ũ.

17 Levii bui bòodeↄ mɛ́ aali kpaaũkpɛ sɛ aa daò zɛ́u, aaiↄ bɛ guoguo. Lá an bòo kálɛa dɛ, màa aaliↄ bɛ zɛ́u. Baade iↄ ku a ↄi tɛa a dàlapoozi.

18 Ɛflaiũ bui gãliↄ lí bòokpa bɛ'aɛ oi ń ń dàlapooo. An dↄaanan Amihudu nɛ́ Ɛlisama ũ. 19 Aà zĩgↄ̃ↄ gbɛ̃ↄn ↄ̀aasↄsↄo lɛɛ bla ń ↄ̀aa pla ń basↄooɛ (40.500). 20 Manase buiↄ líↄ kú ń saɛ. An dↄaanan Pedazuu nɛ́ Gamaliɛli ũ. 21 Aà zĩgↄ̃ↄ gbɛ̃ↄn ↄ̀aasↄsↄo lɛɛ baakwi ń plao ń ↄ̀aa dooɛ (32.200). 22 An saɛ Bɛ̃yãmɛɛ buiↄ. An dↄaanan Gidoni nɛ́ Abidã ũ. 23 Aà zĩgↄ̃ↄ gbɛ̃ↄn ↄ̀aasↄsↄo lɛɛ baakwi ń sↄoo ń ↄ̀aa plaoɛ (35.400). 24 Ampii an bòo wì mɛ Ɛflaiũ buiↄ bòo, aa gbɛ̃ↄn ↄ̀aasↄsↄo lɛɛ basↄokwi plasai ń basↄooɛ (108.100). Aamɛ aali dazɛu àaↄ̃de ũ Levii buiↄ gbɛa.

25 Dã bui gãliↄ mɛ́ aali bòokpa gugbãntoo oi ń ń dàlapooo. An dↄaanan Amisadai nɛ́ Ahiɛzɛɛ ũ. 26 Aà zĩgↄ̃ↄ gbɛ̃ↄn ↄ̀aasↄsↄo lɛɛ bàaↄ̃ ń plao ń ↄ̀aa àaↄ̃ ń basↄooɛ (62.700). 27 Asɛɛ buiↄ mɛ́ aali bòokpa ń saɛ. An dↄaanan Ɔkɛlana nɛ́ Pagiɛli ũ. 28 Aà zĩgↄ̃ↄ gbɛ̃ↄn ↄ̀aasↄsↄo lɛɛ bla ń mɛ̀ndoo ń ↄ̀aa pla ń basↄooɛ (41.500). 29 An saɛ Nɛfatali buiↄ. An dↄaanan Enana nɛ́ Ahila ũ. 30 Aà zĩgↄ̃ↄ gbɛ̃ↄn ↄ̀aasↄsↄo lɛɛ blakwi ń àaↄ̃o ń ↄ̀aa plaoɛ (53.400). 31 Ampii an bòo wì mɛ Dã buiↄ bòo, aa gbɛ̃ↄn ↄ̀aasↄsↄo lɛɛ basoplakwi ń soplao ń ↄ̀aa àaↄ̃oɛ (157.600). Aali dazɛu gbɛzã ń ń dàlapooo.

32 Isaili pↄ́ wà ń nao ualɛ ń ualɛoↄn we. An zĩgↄ̃ↄ píi gbɛ̃ↄn ↄ̀aasↄsↄo lɛɛ ↄ̀aa àaↄ̃ ń àaↄ̃o ń basoplakwioɛ (603.550). 33 Kási wi Levii buiↄ da naopi guu ń ń Isaili deeↄo, lá Dii ò Mↄiziɛwa. 34 Isailiↄ kɛ̀ lá Dii ò Mↄiziɛwa, aa bòokpà ń ń dàlapooo màa, ↄ̃ aa dàzɛu daɛdaɛ ualɛ ń ualɛo.