Bibeli Luayãtaalá Naokɛa 21

Zĩblea Kanaaↄwa Nɛgɛvɛ

1 Alade pↄ́ kú Nɛgɛvɛ bùsuu kía á Kanaa gbɛ̃́ɛ. Kɛ́ a mà Isailiↄ bɛ Ataliũ zɛ́u, aalɛ mↄ́, ↄ̃ à bↄ̀ dàńlɛ ń zĩo, à ń gbɛ̃eↄ kũ̀kũ. 2 Ɔ̃ Isailiↄ lɛkɛ̀ Diiwa aa mɛ̀: Tó n gbɛ̃́piↄ nàwɛ̃ɛ wá ↄzĩ, wá ń wɛ̃́lɛↄ kaalɛ míↄmiↄɛ. 3 Dii Isailiↄ yãmà, ↄ̃ à Kanaapiↄ kpàmá. Aa ń kaalɛ ń ń wɛ̃́lɛↄ píi, ↄ̃ wà tↄkpà gupiɛ Ɔↄma.*

Mↄgotɛ̃ mlɛ̃

4 Kɛ́ aa fɛ̀lɛ Oo gbɛpi saɛ, aa Ísia Tɛ̃a zɛ́ sɛ̀, kɛ́ aa dↄ Ɛdↄũ bùsuzi yã́i. Ɔ̃ aa fù mɛnawa zɛ́u, 5 aa Lua ń Mↄizio tàae è aa mɛ̀: Bↄ́yãi a wá bↄ́lɛ Egipi, kɛ́ wà gaga guwaiwaiui? Pↄblea kuo, í kuo, wá ye blɛ giaɛ bee gĩyãi lↄo. 6 Ɔ̃ Dii mlɛ̃̀ pãsĩnaↄ zĩ̀má, aa ń soso, ↄ̃ aa gàga dasidasi.† 7 Bíla mↄ̀ Mↄizi kĩ́i aa mɛ̀: Wa duunakɛ̀, asa wa Dii ń mpio tàae è. Awakpaɛ̀wɛ̃ɛ aà mlɛ̃ↄ kɛ̃́wá. Ɔ̃ à awakpàɛ̀nɛ́. 8 Dii òɛ̀: Mlɛ̃ pi ǹ na líwa ǹ pɛ́lɛ. Tó mlɛ̃ gbɛ̃́ sò mɛ́ a gwà, a gao. 9 Ɔ̃ à mlɛ̃ pì ń mↄgotɛ̃o, a nà líwa a pɛ̀lɛ. Tó mlɛ̃ gbɛ̃́ sò, mɛ́ à mↄgotɛ̃ mlɛ̃pi gwà, ìli gao.‡

Isailiↄ dↄa Ɛdↄũ ń Mↄabu bùsuↄzi

10 Isailiↄ dàzɛu, ↄ̃ aa bòokpà Obo. 11 Bↄa Obo aa gɛ̀ bòokpà Iye'abaliũ bɛzia guwaiwaiu Mↄabu bùsu gukpɛ oi. 12 Bↄa we aa gɛ̀ bòokpà Zeledi guzulɛu. 13 Bↄa we aa bòokpà Aanↄ baale, guwaiwai pↄ́ kú Amↄle bùsu zↄ̃lɛu. Aanↄpi mɛ́ Mↄabu ń Amↄle bùsuↄ kↄↄ ũ. 14 Ayãmɛto wa ò Dii zĩkataala guu wà mɛ̀:

Waɛbu pↄ́ kú Sufa bùsuu ń Aanↄ swa'ↄnaↄ,

15 ń a í bàasizɛ pↄ́ ì gɛ́ e Aa ń Mↄabu bùsu zↄ̃lɛo.

16 Bↄa we lↄ aa gɛ̀ Lↄ̀ↄ, gu pↄ́ Dii ò Mↄiziɛ: Bíla kãaa, mí í kpámá. 17 We ↄ̃ Isailiↄ lɛɛ bee sìu:

Lↄ̀ↄ, ibↄ, wí lɛsi n yã́ musu.

18 Dↄaanaↄ lↄ̀ↄ yↄ̃̀ ń ń goↄ,

wá kíaↄ lↄ̀ↄ bↄ̀ ń ń lípanaↄ.

Bↄa guwaiwaiu aa gɛ̀ Matana. 19 Matana gbɛa Naaliɛli, Naaliɛli gbɛa Bamↄti. 20 Bamↄti gbɛa guzulɛ pↄ́ kú Mↄabu bùsuu Pisiga gbɛpↄlɛu bↄaa ń guwaiwaio.

Zĩblea Siↄ̃ ń Oguowa

(Iko 2.26-3.11)

21 Isailiↄ gbɛ̃́ↄ zĩ̀ Amↄleↄ kí Siↄ̃wa aa mɛ̀: 22 Wá gba zɛ́ wà gɛ̃ ń n bùsuo. Wá pã buaↄ ge vɛ̃ɛbuↄlao, wá á lↄ̀ↄ'i mio. Wáↄ bɛ kía zɛ́kpaa guuɛ e wà gɛ vĩò n bùsua. 23 Siↄ̃ i ń gba zɛ́ aa bↄ ń a bùsuoo. À a zĩgↄ̃ↄ kã̀aa píi, aa bↄ̀lɛ lɛ́ gɛ́má guwaiwaiu. Kɛ́ aa kà Yaaza, aa zĩkà ń Isailiↄ, 24 ↄ̃ Isailiↄ ń dɛdɛ ń fɛ̃ndao, aa ń bùsu sìmá za Aanↄ e Yabokoi Amↄni bùsuu, asa Amↄni bùsu zↄ̃lɛpi pãsĩɛ. 25 Isailiↄ Amↄle wɛ̃́lɛↄ sì píi ń Ɛsɛbↄ̃o ń a zↄ̃ɛwiaↄ píi, ↄ̃ aa zↄ̃̀lɛu. 26 Ɛsɛbↄ̃ mɛ́ Amↄleↄ kí Siↄ̃ mɛɛwia ũ. Siↄ̃ zĩkà yãa ń Mↄabuↄ kía káauo, ↄ̃ à aà bùsu sìwà e Aanↄ swai. 27 Ayãmɛto kɛɛↄ ì mɛ:

À mↄ Ɛsɛbↄ̃,

wà Siↄ̃ wɛ̃́lɛpi kɛkɛ kálɛ!

28 Tɛ́ bↄ̀ Ɛsɛbↄ̃ yãa,

zĩgↄ̃ↄ bↄ̀ Siↄ̃ wɛ̃́lɛpiu,

aa Mↄabu bùsu mɛɛwia Aa kàalɛ

ń Aanↄ mi sĩ̀sĩ gbɛ̃́ↄ.

29 Waiyoo Mↄabuↄ!

Kɛmↄsi gbàgbanaↄ, a kaalɛɛ!

Kɛmↄsi tò á gↄ̃ɛↄ fã̀aa,

à á nↄɛↄ kpà Amↄleↄ kí Siↄ̃wa zĩ̀zↄↄ ũ.

30 Ɔ̃ wa ń pã́lɛ,

wa ń dɛdɛ za Ɛsɛbↄ̃ e Dibↄ̃.

Wa ń dɛdɛ e Nↄfa ń Mɛdebao.

31 Màa Isailiↄ zↄ̃̀lɛ Amↄle bùsuu. 32 Mↄizi gbɛ̃́ↄ zĩ̀ Yazɛɛ asiigwai, ↄ̃ Isailiↄ sì ń a zↄ̃ɛwiaↄ píi, aa Amↄle pↄ́ kú weↄ yà.

33 Ɔ̃ Isailiↄ lìlɛ aa Basana zɛ́ sɛ̀. Ɔ̃ Basana kí Ogu gɛ̀má ń a zĩgↄ̃ↄ píi, aa zĩkàńnↄ Ɛdɛlɛi. 34 Dii ò Mↄiziɛ: Ńsu vĩakɛɛ̀o, asa ma aà kpàmaɛ ń aà gbɛ̃́ↄ ń aà bùsuo píi. Kɛɛ̀ lá ń kɛ̀ Amↄleↄ kí Siↄ̃ pↄ́ kía blè Ɛsɛbↄ̃ɛwa. 35 Ɔ̃ aa Ogu dɛ̀ ń aà nɛ́ↄ ń aà gbɛ̃́ↄ píi, baa gbɛ̃́ mɛ̀ndo i bↄo, ↄ̃ aa aà bùsupi sì.§

* 21:3 Bee mɛ̀ kaalɛa. † 21:6 1Kln 10.9 ‡ 21:9 2Kia 18.4, Zãa 3.14 § 21:35 Soũ 136.19-20