Bibeli Luayãtaalá Naokɛa 23

Balaaũ yã́ sɛ̃́ia pↄ́ a è oa

1 Balaaũ ò Balakiɛ: Gbagbakĩi bomɛɛ la mɛ̀n sopla, ní mↄmɛɛ ń gáaeↄ mɛ̀n sopla ń sãsaↄ mɛ̀n sopla. 2 Balaki kɛ̀ lá Balaaũ òɛwa, ↄ̃ aa sa'ò ń gáaeↄ ń sãsaↄ gbagbakĩipiↄwa píi. 3 Ɔ̃ Balaaũ òɛ̀: Zɛ n sa'obↄi. Má gɛ́ mà gwa tó Dii a mↄ yã'omɛɛ, mí yã́ pↄ́ a omɛɛ onɛ. Ɔ̃ à gɛ̀ zɛ̀ gbɛ̀ misonawa. 4 Lua mↄ̀ aà lè, ↄ̃ Balaaũ òɛ̀: Ma gbagbakĩi bò mɛ̀n sopla, ↄ̃ ma sa'òmá píi ń gáaeↄ ń sãsaↄ. 5 Dii yãdàɛ̀, ↄ̃ à mɛ̀: Ɛa gɛ ǹ Balaki le, ní oɛ̀ màa. 6 Kɛ́ à ɛ̀a gɛ̀ aà lè zɛa a sa'obↄi ń Mↄabu kíaↄ píi, 7 ↄ̃ à yã́ pↄ́ á è ònɛ́ à mɛ̀:

Mↄabuↄ kí Balaki ma sisi Sili bùsuu,

ↄ̃ ma bↄ gukpɛ gbɛ̀sĩsĩↄ musu ma mↄ.

À mɛ̀ mà bↄɛ Isailiↄ kpɛ,

mà mↄ savãi'oɛ Yakↄbu buipiↄnɛ.

8 Kpelewa má gbɛ̃́ pↄ́ Lua i ń kaoↄ kai?

Kpelewa má bↄ gbɛ̃́ pↄ́ Dii i bↄ ń kpɛoↄ kpɛi?

9 Za gbɛ̀ misonaa málɛ ń e,

za gbɛ̀sĩsĩ musu málɛ wɛsińlɛ.

Gbɛ̃́piↄ kua ńdoa,

aa dodoa kↄ̃ɛ ń buipãleↄɛ.

10 Yakↄbu buiↄ dasi lán ũfãawa,

wa fↄ̃ Isailiↄ nao wà ń lɛ́ dↄ̃o.

Lua to mà ga a gbɛ̃́ↄ gaawa,

mà láa an láaawa.

11 Ɔ̃ Balaki òɛ̀: Ń kɛ̀mɛɛ kpelewan wei? Ma mↄnnↄ ǹ ma ibɛɛↄ kamɛɛ, ↄ̃ samaa ń ònɛ́a? 12 A wèwà à mɛ̀: Yã́ pↄ́ Dii dàmɛɛ ma lɛ́u ↄ̃ má oo lò?

Balaaũ yã́ plaade pↄ́ a è oa

13 Balaki òɛ̀: Mↄ wà gɛ́ gupãlei, gu pↄ́ ńyↄ̃ ń eu, ní ń kámɛɛ we, asa an kpɛdo ń è, ni ń e píio. 14 Ɔ̃ à gɛ̀aànↄ gudↄ̃anaↄ bua Pisiga gbɛ musu. À gbagbakĩi bò mɛ̀n sopla, ↄ̃ à sa'òmá píi ń gáaeo ń sãsao. 15 Ɔ̃ Balaaũ òɛ̀: Zɛ n sa'obↄi la, mí gɛ Dii le we mà gwa. 16 Ɔ̃ Dii mↄ̀ à yãdàɛ̀, ↄ̃ a òɛ̀: Ɛa gɛ ǹ Balaki le, ní oɛ̀ màa. 17 Ɔ̃ à ɛ̀a gɛ̀ à aà lè zɛa a sa'obↄi ń Mↄabu kíaↄ. Balaki aà là à mɛ̀: Dii mɛ̀ kpelewa ni? 18 Ɔ̃ à yã́ pↄ́ á è ònɛ́ à mɛ̀:

Zipoo nɛ́ Balaki,

swã́kpa ǹ ma yãma!

19 Luaá gbɛ̃nazĩnaɛ kɛ́ aà gbasa ɛɛtoo,

ìli lɛlilɛ lán gbɛ̃nazĩnawao.

Ìli yã́ pↄ́ á ò kɛo lé?

Ìli zĩkɛ lɛ́ pↄ́ á gbɛ̃̀wao lé?

20 A òmɛɛ mà samaa'onɛ́ɛ.

À báaadàńguɛ, má fↄ̃ gio.

21 Mi yã'ĩae e Yakↄbu buiↄwao,

mi yã'ↄ̃mae e Isailiↄwao.

Dii an Lua kúńnↄ,

Kía kúkua dↄ ń guu.

22 Lua ń bↄ́lɛ Egipi,

aa gbãa vĩ lán zùsɛ̃lɛwa.

23 Wa fↄ̃ pↄda Yakↄbu buiↄwao,

wa fↄ̃ àsi bɛ̃̀ɛ kpaaĩ ń Isailiↄo.

Za gbã waↄ o ń yã́ musu,

yã́ pↄ́ Lua kɛ̀n we.

24 Buipi ì fɛlɛ lán nↄ̀ↄmusuwa,

ì azĩa sɛ lán gbɛaanawa.

Ìli wúlɛo e à gɛ pↄ́ kũ soò,

e à gɛ pↄ́ pↄ́ a dɛ̀ↄ au miò.

25 Balaki òɛ̀: Ńsu ǹ ń kao. Ńsu samaa'onɛ́ sↄ̃o. 26 Balaaũ òɛ̀: Mi onɛ yã́ pↄ́ Dii dàmɛɛ ↄ̃ má oo lé?

Balaaũ yã́ àaↄ̃de pↄ́ a è oa

27 Balaki ò Balaaũɛ: Mↄ, má gɛnnↄ gupãleiɛ sa. Wìliↄ dↄ̃o tó a maa Luaɛ ǹ gbɛ̃́piↄ kamɛɛ we sa. 28 Ɔ̃ Balaki gɛ̀aànↄ Peoo gbɛ musu bↄaa ń guwaiwaio. 29 Balaaũ òɛ̀: Gbagbakĩi bomɛɛ la mɛ̀n sopla, ní mↄmɛɛ ń gáaeↄ mɛ̀n sopla ń sãsaↄ mɛ̀n sopla. 30 Balaki kɛ̀ lá a òɛwa, à sa'òmá ń gáaepiↄ ń sãsapiↄ.