Bibeli Luayãtaalá Naokɛa 29

Kã̀aepɛa dikpɛ sa'oa

(Lev 23.23-25)

1 Mↄ soplade gↄↄ sɛ̃́ia zĩ́ àli kↄ̃ kãaa à ma sísi. Zĩbeezĩ ásuli zĩe kɛo. Iↄ dɛɛ́ kã̀aepɛgↄↄ ũ. 2 Àli sa pↄ́ a pↄ́ tɛ́kũa gĩ ì kɛmɛɛ na o ń gáaenao do ń sãsakaoo do ń sãsa wɛ̃donao sopla. Apii iↄ dɛ pↄ́ sãasaiↄ ũ. 3 Íli ma gba pↄ́wɛnti kiloo àaↄ̃ yãalɛa ń nísio gáaenapi pↄ́ ũ, sãsakao pↄ́ kiloo pla, 4 sã mɛ̀n soplapiↄ sↄ̃ kiloo dodo. 5 Íli mↄ́ ń blesanao mɛ̀ndo lↄ duun awakpabↄ ũ á duunakɛ̃awá yã́i. 6 Àliↄ sapiↄ o mↄ dafu sa'oa ń a pↄ́wɛntio bàasi, lá gu lɛ́ dↄ sa'oa ń a pↄ́wɛntio ń a vɛ̃ɛo lá wa dìlɛwa bàasi.

Duunkɛ̃ma dikpɛ sa'oa

(Lev 23.26-32)

7 Mↄ soplade gↄↄ kwide zĩ́ àli kↄ̃ kãaa à ma sísi, í lɛye.* Zĩbeezĩ ásuli zĩe kɛo. 8 Àli sa pↄ́ a pↄ́ tɛ́kũa gĩ ì kɛmɛɛ na o ń gáaenao do ń sãsakaoo do ń sãsa wɛ̃donao sopla. Apii iↄ dɛ pↄ́ sãasaiↄ ũ. 9 Àliↄ ma gba pↄ́wɛnti kiloo àaↄ̃ yãalɛa ń nísio gáaenapi pↄ́ ũ, sãsakao pↄ́ kiloo pla, 10 sã mɛ̀n soplapiↄ sↄ̃ kiloo dodo. 11 Íli sa'o ń blesanao mɛ̀ndo lↄ duun awakpabↄ ũ, duun awakpabↄ pↄ́ ì á duuna kɛ̃́wá bàasi, lá gu lɛ́ dↄ sa pↄ́ wì a pↄ́ kátɛu à tɛ́kũ oa ń a pↄ́wɛntio ń a vɛ̃ɛo bàasi.

Lákpɛdↄa dikpɛ sa'oa

(Lev 23.33-44)

12 Mↄ soplade gↄↄ gɛ̃ode zĩ́ àli kↄ̃ kãaa à ma sísi. Zĩ́ bee ásuli zĩe kɛo. Àli dikpɛkɛmɛɛ e gↄↄ sopla. 13 Íli sa pↄ́ a pↄ́ tɛ́kũa gĩ ì kɛmɛɛ na o ń gáaenao kuɛ'aaↄ̃ ń sãsakaoo pla ń sãsa wɛ̃donao gɛ̃o mɛ̀ndosai. Apii iↄ dɛ pↄ́ sãasaiↄ ũ. 14 Íli ma gba pↄ́wɛnti kiloo àaↄ̃'aaↄ̃ yãalɛa ń nísio gáaena píi miwa, sãsakao pↄ́ kiloo plapla, 15 sã mɛ̀n gɛ̃o mɛ̀ndosaipiↄ sↄ̃ kiloo dodo. 16 Íli sa'o ń blesanao mɛ̀ndo lↄ duun awakpabↄ ũ, lá gu lɛ́ dↄ sa pↄ́ wì a pↄ́ kátɛu à tɛ́kũ oa ń a pↄ́wɛntio ń a vɛ̃ɛo bàasi.

17-19 Dikpɛ gↄↄ plaade zĩ́ àli sa'o màa ń gáaenao kuɛpla ń sãsakaoo pla ń sãsa wɛ̃donao gɛ̃o mɛ̀ndosai.

20-22 Dikpɛ gↄↄ àaↄ̃de zĩ́ àli sa'o màa ń gáaenao kuɛdo ń sãsakaoo pla ń sãsa wɛ̃donao gɛ̃o mɛ̀ndosai.

23-25 Dikpɛ gↄↄ síiↄ̃de zĩ́ àli sa'o màa ń gáaenao kwi ń sãsakaoo pla ń sãsa wɛ̃donao gɛ̃o mɛ̀ndosai.

26-28 Dikpɛ gↄↄ sↄode zĩ́ àli sa'o màa ń gáaenao kɛ̃okwi ń sãsakaoo pla ń sãsa wɛ̃donao gɛ̃o mɛ̀ndosai.

29-31 Dikpɛ gↄↄ soolode zĩ́ àli sa'o màa ń gáaenao swaaↄ̃ ń sãsakaoo pla ń sãsa wɛ̃donao gɛ̃o mɛ̀ndosai.

32-34 Dikpɛ gↄↄ soplade zĩ́ àli sa'o màa ń gáaenao sopla ń sãsakaoo pla ń sãsa wɛ̃donao gɛ̃o mɛ̀ndosai.

35 Dikpɛ gↄↄ swaaↄ̃de zĩ́ àli kↄ̃ kãaa. Zĩ́ bee ásuli zĩe kɛo. 36-38 Àli sa pↄ́ a pↄ́ tɛ́kũa gĩ ì kɛmɛɛ na o màa ń gáaenao do ń sãsakaoo do ń sãsa wɛ̃donao sopla.

39 Sa pↄ́ áliↄ oa á dikpɛↄ guun we, á lɛ́gbãdↄa pↄ́ↄ ń á gbaↄ ń sa pↄ́ wì a pↄ́ kátɛu à tɛ́kũↄ ń a pↄ́wɛntio ń a vɛ̃ɛo ń sáaukpasaↄ bàasi.