Bibeli Luayãtaalá Naokɛa 35

Levii buiↄ wɛ̃́lɛↄ

1 Dii yã'ò Mↄiziɛ Mↄabu bùsu sɛ̃u Yuudɛ̃ baale bↄaa ń Yelikoo à mɛ̀: 2 O Isailiↄnɛ aa bùsu pↄ́ aa a kpaalɛsɛ wɛ̃́lɛeↄ kpa Levii buiↄwa, kɛ́ aa e wàↄ kú ń guu, aai tↄↄlɛ pↄ́ liaa wɛ̃́lɛpiↄi kpámá lↄ.* 3 Wɛ̃́lɛpiↄ iↄ dɛ ń zↄ̃lɛkĩi ũ, mɛ́ tↄↄlɛ pↄ́ kú wɛ̃́lɛpiↄ saɛↄ iↄ dɛ ń zuↄ ń ń sãↄ ń ń pↄtuo pãleↄ kúkĩi ũ píi. 4 Tↄↄlɛ pↄ́ liaa wɛ̃́lɛpiↄi yàasa i ka gã̀sĩsuu ↄ̀aa sↄo. 5 À ba yↄ̃ wɛ̃́nkpɛ gukpɛ oi kiloo do, í yↄ̃ gɛↄmidↄkĩi oi kiloo do, í yↄ̃ bɛ'aɛ oi kiloo do, í yↄ̃ gugbãntoo oi kiloo do à pɛɛ píi, wɛ̃́lɛ iↄ ku guoguo, tↄↄlɛ pↄ́ liaai sↄ̃ iↄ dɛ wɛ̃́lɛdeↄ dã́dãkɛkĩi ũ.

6 Wɛ̃́lɛ pↄ́ á kpá Levii buiↄwapiↄ guu, a mɛ̀n soolo iↄ dɛ misiwɛ̃lɛↄ ũ. Tó gbɛ̃́ gbɛ̃dɛ̀, ìli bàalɛ ta wɛ̃́lɛpiↄ dou. An wɛ̃́lɛ kĩniↄ iↄ bla ń plao. 7 Wɛ̃́lɛ mɛ̀n blakwi plasai ↄ̃ á kpámá, wɛ̃́lɛ píi ń a tↄↄlɛo liaai. 8 Lá á buiↄ tↄↄlɛ e lɛ́u, a guu ↄ̃ aa wɛ̃́lɛpiↄ kpa Levii buiↄwa. Bui pↄ́ wɛ̃́lɛ vĩ dasi aa kpa dasi, bui pↄ́ wɛ̃́lɛ vĩ bílao aa kpa bílao.

Misiwɛ̃lɛↄ

(Iko 19.1-13, Yoz 20.1-9)

9 Dii yã'ò Mↄiziɛ à mɛ̀: 10 O Isailiↄnɛ ǹ mɛ, tó a bua Yuudɛ̃wa a gɛ̃ Kanaa bùsuu, 11 à wɛ̃́lɛeↄ dilɛ á misiwɛ̃lɛↄ ũ. Tó kai mɛ́ mↄ̀, ↄ̃ gbɛ̃́ gbɛ̃dɛ̀, ade lí bàalɛ ta we. 12 Wɛ̃́lɛpi iↄ dɛɛ́ misiwɛ̃lɛↄ ũ, kɛ́ gbɛ̃dɛna e bàasi aà daɛ pↄ́ a tↄsiwàɛ à tau. Tó a kɛ̀ màa, a gao, sema wà yã́kpalɛkɛ̀aànↄ bàasio. 13 Wɛ̃́lɛ mɛ̀n soolo pↄ́ á kpá Levii buiↄwa á misiwɛ̃lɛ ũↄ, 14 mɛ̀n àaↄ̃ iↄ ku Yuudɛ̃ baala, mɛ̀n àaↄ̃ iↄ ku baale Kanaa bùsuu. 15 Tó kai mɛ́ mↄ̀, ↄ̃ gbɛ̃́ gbɛ̃dɛ̀, ade lí bàalɛ tau. Wɛ̃́lɛ mɛ̀n soolopiↄ iↄ dɛ misikĩi ũ á Isailiↄnɛ ń bↄ̀mↄ ge nibↄ pↄ́ kúánↄↄ.

16 Tó gbɛ̃́ gbɛ̃́ lɛ̀ ń mↄo a dɛ̀, ade á gbɛ̃dɛnaɛ. Sema wà ade dɛ sↄ̃. 17 Tó gbɛ̃́ gbɛ kũa mɛ́ à gbɛ̃́ lɛ̀ò a dɛ̀, gbɛ̃dɛnan aà ũ, sema wà aà dɛ sↄ̃. 18 Tó lí a kũa mɛ́ à gbɛ̃́ lɛ̀ò a dɛ̀, gbɛ̃dɛnan aà ũ, sema wà aà dɛ. 19 Daɛ pↄ́ a tↄsiwà mɛ́ ali gbɛ̃́ pↄ́ gbɛ̃dɛ̀pi dɛ, tó à kpàaũaànↄ. 20 Tó gbɛ̃́ gbɛ̃́ kpàkpa, ↄ̃ à ↄzↄ̃̀aàzi, ge à aà pà ń pↄ́o, kɛ́ a zaaàgu yã́i, a dɛ̀, 21 ge tó à aà lɛ̀ ń ↄkũo a dɛ̀ ĩ́i pↄ́ a sɛ̀aànↄ yã́i, gbɛ̃dɛnan aà ũ, sema wà aà dɛ. Daɛ pↄ́ a tↄsiwà mɛ́ a aà dɛ, tó à kpàaũaànↄ.

22 Tó i aà kpákpa sↄ̃o, ↄ̃ à ↄzↄ̃̀aàzi, ge à aà pà ń pↄ́o kã́ndo ĩ́isɛaaànↄ sai, 23 ge i aà eo, ↄ̃ gbɛ sìwà à gà, lá i íbɛlɛsɛaànↄoɛ, mɛ́ àlɛ wɛɛlɛ à aà kɛ'ĩao, 24 wa yã́gↄ̃gↄ̃ gbɛ̃dɛnapi ń daɛ pↄ́ a tↄsiwàoɛ ikoyãɛ beeↄ musuɛ. 25 Wi gbɛ̃dɛnapi si daɛ pↄ́ a tↄsiwàwa, aai aà gbaɛ misiwɛ̃lɛ pↄ́ à bàalɛ̀ tàu yãa guu, iↄ ku wɛ̃́lɛpiu e sa'onkia pↄ́ wa dìlɛ gɛ́ gaò. 26 Tó gbɛ̃dɛnapi kɛ̀sɛ sù vĩ̀ wɛ̃́lɛpi lɛ́a, 27 mɛ́ daɛ pↄ́ a tↄsiwàpi kpàaũaànↄ, a ku misiwɛ̃lɛpi guuo, aà aà dɛ, aↄ tàae vĩ aà dɛa guuo. 28 Sema gbɛ̃dɛnapi aàↄ ku misiwɛ̃lɛpiu e sa'onkia gɛ gaò. Sa'onkiapi gaa gbɛa ↄ̃ a gbasa ta a bɛ. 29 Gu pↄ́ á kúu píi e á buiwa, àↄ ikoyãpi kũa.

30 Gbɛ̃dɛa yã́ guu, wa gbɛ̃dɛna dɛ gbɛ̃́ↄ seeladekɛ yã́ musu, ãma ásu gbɛ̃dɛ gbɛ̃́ mɛ̀ndo seeladekɛ yã́io.† 31 Ásu to gbɛ̃dɛna pↄ́ kũ̀ wà dɛ azĩa boo, sema wà aà dɛ. 32 Tó sa'onkia i ga gĩao, ásu ↄ̃asi gbɛ̃́ pↄ́ bàasi tà misiwɛ̃lɛuwa à aà gba zɛ́ aà ta a bɛo. 33 Ásu to bùsu pↄ́ áↄ kuu gbãlɛo. Gbɛ̃dɛa mɛ́ ì bùsu gbãlɛ. Wa fↄ̃ gbãbↄ bùsu pↄ́ wà gbɛ̃dɛ̀uɛo, mɛ́ i kɛ wà gbɛ̃́ pↄ́ gbɛ̃́pi dɛ̀ dɛ bàasio. 34 Ásu to bùsu pↄ́ áↄ kuu, mɛ́ mapi sↄ̃ máↄ kuu gbãlɛo, asa má Dii má kú á Isailiↄ guuɛ.